ດ່ານສາກົນຂົວມິດຕະພາບລາວ-ໄທ 1 ກຽມທົດລອງເກັບເງິນຜ່ານປະຕູດຽວ ເພື່ອອັດປ່ອງຮົ່ວໄຫລງົບປະມານ
ອີກບໍ່ດົນການຂ້າມໄປ-ມາຂອງຄົນ ແລະ ພາຫະນະ ຢູ່ດ່ານສາກົນຂົວມິດຕະພາບລາວ-ໄທ 1 ຈະສະດວກສະບາຍຫລາຍຂຶ້ນ, ຫລັງຈາກລັດຖະບານຈະເກັບຄ່າຜ່ານດ່ານລະບົບປະຕູດຽວນັບແຕ່ເດືອນຕຸລານີ້ເປັນຕົ້ນໄປ.
ທ່ານຮັກສາການຫົວໜ້າຫ້ອງການຄຸ້ມຄອງ ແລະ ບໍລິການດ່ານສາກົນຂົວມິດຕະພາບລາວ-ໄທ 1 ໃຫ້ຮູ້ວ່າ: ພາຍຫລັງກົມພາສີໄດ້ເຊັນສັນຍາກັບທະນາຄານ ການຄ້າຕ່າງປະເທດລາວມະຫາຊົນ ໃນການປັບປຸງການເກັບເງິນຜ່ານແບບປະຕູດຽວ, ໝາຍວ່າຈະບໍ່ໃຫ້ພະນັກງານແຕ່ລະພາກສ່ວນທີ່ປະຈຳດ່ານເປັນຜູ້ເກັບອີກຕໍ່ໄປ, ເຊິ່ງຄາດວ່າຈະເລີ່ມປະຕິບັດໃນເດືອນຕຸລາ 2018 ນີ້ເປັນຕົ້ນໄປ ເພື່ອໃຫ້ການຈັດເກັບລາຍຮັບເຂົ້າງົບປະມານຢູ່ດ່ານແຫ່ງນີ້ບໍ່ຮົ່ວໄຫລ, ພາຍຫລັງລັດຖະບານໄດ້ກຳນົດເອົາດ່ານແຫ່ງນີ້ເປັນຕົວແບບໃນການເກັບເງິນເຂົ້າງົບປະມານໃຫ້ຄົບຖ້ວນ, ບໍ່ຮົ່ວໄຫລ, ບໍລິການວ່ອງໄວ ແລະ ປະຊາຊົນມາບໍລິການມີຄວາມເຊື່ອໝັ້ນຫລາຍຂຶ້ນ.
ທ່ານຮັກສາການຫົວໜ້າຫ້ອງການດັ່ງກ່າວ ໃຫ້ຮູ້ວ່າ: ດ່ານແຫ່ງນີ້, ມີຜູ້ໂດຍສານເຂົ້າ-ອອກສະເລ່ຍ 6.500-7.000 ຄົນ ແລະ ພາຫະນະຫລາຍກວ່າ ພັນຄັນຕໍ່ວັນ ແລະ ສໍາລັບແຜນຈັດເກັບລາຍຮັບເຂົ້າງົບປະມານປີ 2018 ນັບທັງຢູ່ດ່ານທ່ານາແລ້ງ ແລະ ດ່ານຂົວມິດຕະພາບໃຫ້ໄດ້ 3.240 ຕື້ກວ່າກີບ, ແຕ່ຜ່ານການປະຕິບັດມາຮອດເດືອນກໍລະກົດ 2018 ແມ່ນໄດ້ປະມານ 1.469 ຕື້ກີບ, ເທົ່າກັບ 46,05% ແລະ ຄາດວ່າໝົດປີຈະໄດ້ພຽງ 90% ຂອງແຜນການ, ໂດຍລາຍຮັບຕົ້ນຕໍໄດ້ຈາກພາສີນຳເຂົ້ານ້ຳມັນເຊື້ອໄຟ, ພາຫະນະ ແລະ ເຄື່ອງກໍ່ສ້າງຕ່າງໆ.
