ນັກຮຽນລາວເຂົ້າຮ່ວມໂຄງການແລກປ່ຽນໄວໜຸ່ມຍີ່ປຸ່ນ-ອາຊີ ດ້ານວິທະຍາສາດ
ພິທີສົ່ງນັກຮຽນມັດທະຍົມສຶກສາລາວທັງ 10 ຄົນ ແລະ ຜູ້ນໍາພາອີກ 2 ທ່ານ ຈາກກະຊວງສຶກສາທິການ ແລະ ກິລາ ເພື່ອເຂົ້າຮ່ວມໂຄງການແລກປ່ຽນໄວໜຸ່ມຍີ່ປຸ່ນ-ອາຊີ ທາງດ້ານວິທະຍາສາດ (SAKURA Science), ເຊິ່ງ ໄດ້ຮັບການສະໜັບສະໜູນໂດຍອົງການວິທະຍາສາດ ແລະ ເຕັກໂນໂລຢີ ຍີ່ປຸ່ນ (JST) ໄດ້ມີຂຶ້ນເມື່ອທ້າຍອາທິດຜ່ານມານີ້.
ໂຄງການ“SAKURA Science Plan” ນີ້ເພື່ອສົ່ງເສີມການແລກປ່ຽນລະຫວ່າງນັກຮຽນ ຍີ່ປຸ່ນ ແລະ ອາຊີ ທີ່ມີບົດບາດສໍາຄັນໃນຂະແໜງວິທະຍາສາດ ແລະ ເຕັກໂນໂລຢີ ໃນອານະຄົດ, ໂດຍຜ່ານການ ຮ່ວມມື ລະຫວ່າງຂະແໜງອຸດສາຫະກໍາ, ສະຖາບັນການສຶກສາ ແລະ ລັດຖະບານ ໂດຍການອໍານວຍຄວາມສະດວກ ໃນການເຂົ້າໄປຢ້ຽມຢາມຍີ່ປຸ່ນໄລຍະສັັ້ນຂອງເຍົາວະຊົນຜູ້ທີ່ມີຄວາມສາມາດຈາກອາຊີ . ປະເທດໃນກຸ່ມເປົ້າໝາຍ ມີບັນດາປະເທດຈາກອາຊີ ຕາເວັນອອກ, ອາຊີ ຕາເວັນອອກສຽງໃຕ້, ອາຊີ ຕາເວັນຕົກສຽງໃຕ້, ອາຊີ ກາງ ແລະ ບັນດາໝູ່ເກາະໃນປາຊີຟິກ. ໂຄງການນີ້, ມີເປົ້າໝາຍທີ່ຈະເພີ່ມຄວາມສົນໃຈໃຫ້ແກ່ນັກຮຽນໃນເຂດອາຊີ ກ່ຽວກັບຂະແໜງວິທະຍາສາດ ແລະ ເຕັກໂນໂລຢີ ທີ່ເປັນລະດັບຊັັ້ນນໍາຂອງປະເທດຍີ່ປຸ່ນຕາມ ມະຫາວິທະຍາໄລ, ສະຖາບັນການຄົ້ນຄ້ວາ ແລະ ບໍລິສັດເອກະຊົນຕ່າງໆຢູ່ປະເທດຍີ່ປຸ່ນ. ນັກຮຽນເຫລົ່ານີ້ແມ່ນມາຈາກໂຮງຮຽນມັດທະຍົມພາຍໃນນະຄອນຫລວງວຽງຈັນ ແລະ ຕ່າງແຂວງ, ເຊິ່ງ ເປັນນັກຮຽນເກັ່ງໃນສາຂາວິທະຍາສາດ ແລະ ໄດ້ຮັບຄະແນນສູງສຸດໃນວິຊາຄະນິດສາດ, ຟິຊິກສາດ, ເຄມີສາດ ແລະ ພາສາລາວ-ວັນນະຄະດີ ປະຈໍາປີ ຂອງ “ການສອບເສັງນັກຮຽນເກັ່ງລະດັບຊາດ”. ໃນລະຫວ່າງການໄປຍີ່ປຸ່ນ, ນັກຮຽນລາວຈະໄດ້ໄປຢ້ຽມແຂວງໂອກາຢາມະ ແລະ ນະຄອນຫລວງໂຕກຽວເຊັ່ນ: ມັດທະຍົມຕອນປາຍໂອກາຢາມະ ອິຈິໂນມິຢະ, ສະຖາບັນ ທາມາງາວະ (ສະຖາບັນ ການສຶກສາເອກະຊົນໃນລະດັບອະນຸບານໄປເຖິງລະດັບມະຫາວິທະຍາໄລ), ມະຫາວິທະຍາໄລໂທ່ໄກ່, ມະຫາວິທະຍາໄລເອເລັກໂຕຣນິກ ແລະ ການສື່ສານ, ອົງການວິໄຈເລັ່ງຄວາມໄວສູງ (KEK) ແລະ Miraikan (ຫໍພິພິຕະພັນທາງດ້ານວິທະຍາສາດ ແລະ ນະວັດຕະກໍາທີ່ລໍ້າສະໄໝແຫ່ງຊາດ). ຮັບຟັງການປະຖະກະຖາໂດຍຜູ້ໄດ້ຮັບລາງວັນໂນເບວໃນສາຂາຟິຊິກສາດຄົນຍີ່ປຸ່ນ ທ່ານອາຈານ ມາໂກໂຕ ໂຄບາຢາຊິ.
