ສປປ ເກົາຫລີ ເລີ່ມຮື້ຖອນສິ່ງປຸກສ້າງ ໃນສູນອະວະກາດໂຊແຮ
ພາບຖ່າຍດາວທຽມຊຸດຫລ້າສຸດເປີດເຜີຍໃຫ້ເຫັນການເຄື່ອນໄຫວທີ່ສູນປ່ອຍຈະຫລວດໂຊແຮຂອງ ສປປ ເກົາຫລີ ວ່າເລີ່ມມີການຮື້ຖອນ ແລະ ທຳລາຍສິ່ງປຸກສ້າງທີ່ຢູພາຍໃນບໍລິເວນນັ້ນແລ້ວ.
▪FIRST STEP?
North Korea begins dismantling Sohae Satellite Launching Station: #38North#NorthKorea #Denucelarization pic.twitter.com/ATSBqnacfZ
— Arirang News (@arirangtvnews) July 24, 2018
ສຳນັກຂ່າວຕ່າງປະເທດລາຍງານວ່າ: ເວັບໄຊ 38north.org ເປີດເຜີຍພາບຖ່າຍດາວທຽມລະບຸວັນທີ 22 ກໍລະກົດວ່າ: ສປປ ເກົາຫລີ ເລີ່ມດຳເນີນການຮື້ຖອນ ແລະ ທຳລາຍສິ່ງປຸກສ້າງພາຍໃນສະຖານີອະວະກາດໂຊແຮ ທີ່ຕັ້ງຢູ່ທາງຕາເວັນຕົກສຽງເໜືອຂອງປະເທດ ໂດຍນັບແຕ່ສູນໂຊແຮເປີດດຳເນີນການໃນປີ 2012 ລັດຖະບານພຽງຢາງໃຊ້ສະຖານທີ່ແຫ່ງນີ້ທົດລອງເຄື່ອງຈັກຈະຫລວດ, ພັດທະນາເຊື້ອໄຟເຫລວສຳລັບເຄື່ອງຈັກຈະຫລວດ ແລະ ໃຊ້ເປັນຖານປ່ອຍຈະຫລວດສູ່ຊັ້ນບັນຍາກາດໂລກມາແລ້ວຫລາຍຄັ້ງ.
ຖ້າການເຄື່ອນໄຫວດັ່ງກ່າວເປັນຄວາມຈິງ ຈະຖືເປັນອີກໜຶ່ງການພັດທະນາສຳຄັນຂອງ ສປປ ເກົາຫລີ ໃນການເຂົ້າສູ່ຂະບວນການປົດອາວຸດນິວເຄຼຍ ເຊິ່ງເປັນການຕໍ່ຍອດຈາກກອງປະຊຸມຮ່ວມກັນລະຫວ່າງ ທ່ານ ກິມ ຈ໋ອງອຸນ ຜູ້ນຳສູງສຸດຄົນປັດຈຸບັນ ກັບປະທານາທິບໍດີ ໂດນັລ ທຣຳ ຜູ້ນຳອາເມລິກາ ທີ່ປະເທດສິງກະໂປ ໃນວັນທີ 12 ມິຖຸນາຜ່ານມາ.
ໃນເວລາດຽວກັນ, ກະຊວງປ້ອງກັນຄວາມສະຫງົບ ສ.ເກົາຫລີ ຍື່ນລາຍງານຕໍ່ຄະນະກຳມາທິການປ້ອງກັນຄວາມສະຫງົບຂອງສະພານິຕິບັນຍັດແຫ່ງຊາດ ສະເໜີຮ່າງແຜນການຖອນກຳລັງເຈົ້າໜ້າທີ່ ແລະ ສັບພາວຸດບາງສ່ວນອອກຈາກຖານປະຈຳການຕາມເຂດປອດທະຫານ (DMC), ເຖິງວ່າແຜນການດັ່ງກ່າວຍັງຖືເປັນ “ການທົດລອງ” ແຕ່ສາມາດນຳໄປສູ່ການຖອນກຳລັງ “ຢ່າງເຕັມລະບົບ” ໄດ້ໃນອະນາຄົດ ເພື່ອໃຫ້ເປັນໄປຕາມແນວທາງຂອງປະລິນຍາປານມູນຈອມ ເຊິ່ງປະທານາທິບໍດີ ມຸນ ແຈອິນ ຜູ້ນຳ ສ.ເກົາຫລີ ແລະ ທ່ານ ກິມ ຈ໋ອງອຸນ ລົງນາມຮ່ວມກັນ ໃນວັນທີ 27 ເມສາຜ່ານມາວ່າ: ຕ້ອງການປ່ຽນສະພາບ DMC ໃຫ້ເປັນ “ເຂດສັນຕິພາບ”.
