ຍິງປືນນະຄອນຫລວງ 12 ຄົນ ກຽມຝຶກຊ້ອມເຂົ້າຮ່ວມຊຽງຂວາງເກມ
ສະຫະພັນຍິງປືນ ນະຄອນຫລວງວຽງຈັນ ໄດ້ນັກແມ້ນປືນ ຈຳນວນ 12 ຄົນ ກຽມເຂົ້າສູນຝຶກຊ້ອມໃນເດືອນສິງຫານີ້ ທີ່ສະໜາມຍິງປືນ 5 ເມສາ ເພື່ອກຽມສົ່ງເຂົ້າຮ່ວມໃນງານມະຫາກຳກິລາແຫ່ງຊາດ ຄັ້ງທີ 11 ຫລື ຊຽງຂວາງ ເກມ ທີ່ແຂວງຊຽງຂວາງເປັນເຈົ້າພາບ ຈະຈັດຂຶ້ນໃນທ້າຍປີນີ້.
ຕາມການລາຍງານຂອງທ່ານ ພຸດທະສັກ ສຸກອາລຸນ ປະທານສະຫະພັນຍິງປືນ ນະຄອນຫລວງວຽງຈັນວ່າ: ພາຍຫລັງໄດ້ຮັບແຈ້ງການຈາກນະຄອນຫລວງວຽງຈັນ ເພື່ອໃຫ້ກຽມພ້ອມອຸປະກອນ ແລະ ນັກກິລາຕາງໜ້ານະຄອນຫລວງວຽງຈັນ ເຂົ້າຮ່ວມການແຂ່ງຂັນງານມະຫາກຳກິລາແຫ່ງຊາດ ຄັ້ງທີ 11 ຫລື ຊຽງຂວາງ ເກມ ທີ່ແຂວງຊຽງຂວາງ ຮັບກຽດເປັນເຈົ້າພາບ ຈະຈັດຂຶ້ນໃນວັນທີ 11-21 ພະຈິກ 2018. ດັ່ງນັ້ນ, ສະຫະພັນຍິງປືນ ນະຄອນຫລວງວຽງຈັນ ຈຶ່ງໄດ້ວາງແຜນກະກຽມຝຶກຊ້ອມນັກກິລາ ແລະ ຄູເຝິກ, ພ້ອມທັງຊອກງົບປະມານ ແລະ ອຸປະກອນກິລາຍິງປືນທຸກປະເພດ. ສໍາລັບແຜນຝຶກຊ້ອມຄາດວ່າຈະເລີ່ມປະຕິບັດໃນເດືອນສິງຫານີ້ ທີ່ສະໜາມກິລາຍິງປືນ 5 ເມສາ ເມືອງໄຊເຊດຖາ.
ທ່ານ ພຸດທະສັກ ສຸກອາລຸນ ກ່າວຕື່ມອີກວ່າ: ສຳລັບແຜນການເຄື່ອນໄຫວຂອງນັກກິລາຍິງປືນໄອພີເອັສຊີລາວ 30 ກວ່າຄົນ ໃນປັດຈຸບັນໄດ້ມີການເຄື່ອນໄຫວຝຶກຊ້ອມຢ່າງເປັນປົກກະຕິ ທີ່ສະໜາມກິລາຍິງປືນ 5 ເມສາ ເພື່ອກຽມສົ່ງເຂົ້າຮ່ວມແຂ່ງຂັນຍິງປືນໄອພີເອັສຊີ ຊີງແຊ້ມນາໆຊາດ ຫລື ລາຍການ ເລໂວ້ 4 ທີ່ແຂວງພັດທະຍາ ປະເທດໄທ ໃນເດືອນກັນຍາ 2018.
