ລົດແກ້ວຍາດໄດ້ອັນດັບທີ 1 ໃນລຸ້ນອາຍຸ 16-29 ປີ
ນາງ ລົດແກ້ວ ອິນທະກຸມມານ ນັກກິລາແລ່ນທີມຊາດລາວ ສາມາດຍາດໄດ້ອັນດັບທີ 1 ໃນລຸ້ນອາຍຸ 16-29 ປີ ໃນລາຍການ 21 ກິໂລແມັດ ຂອງການແຂ່ງຂັນອຸບົນລາດຊະທານີ ຮາຟມາລາທອນ 2018 ທີ່ຈັດຂຶ້ນໃນວັນທີ 22 ກໍລະກົດຜ່ານມານີ້ ເພື່ອກຽມຄວາມພ້ອມເຂົ້າຮ່ວມແຂ່ງຂັນໃນມະຫາກໍາເອຊຽນເກມ 2018 ທີ່ປະເທດອິນໂດເນເຊຍ.
ນາງ ລົດແກ້ວ ອິນທະກຸມມານ ໄດ້ໃຫ້ສໍາພາດວ່າ: ການແຂ່ງຂັນລາຍການດັ່ງກ່າວ ມີນັກກິລາເຂົ້າຮ່ວມຫລາຍກວ່າ 6.000 ຄົນ ເຊິ່ງໃນນັ້ນມີນັກກິລາສະໝັກຫລິ້ນ ແລະ ອາຊີບເຂົ້າຮ່ວມ ເຊິ່ງການແຂ່ງຂັນໄດ້ດໍາເນີນໄປດ້ວຍບັນຍາກາດຄຶກຄື້ນຫລາຍ. ສໍາລັບການແຂ່ງຂັນຄັ້ງທີ 3 ໃນການແຂ່ງຂັນຢູ່ປະເທດໄທ ແລະ ສາມາດຍາດໄດ້ອັນດັບທີດີຢ່າງຕໍ່ເນື່ອງ ເຊິ່ງຫລ້າສຸດໃນເດືອນກໍລະກົດນີ້ ຕົນເອງສາມາດຍາດໄດ້ອັນດັບທີ 1 ຂອງທັງສອງລາຍການຄື: ລາຍການຢູ່ ພັດທະຍາ ຣາຟມາຣາທອນ 2018 ເຊິ່ງສາມາດຍາດໄດ້ 2 ລຸ້ນຄື: ລຸ້ນ 21 ກິໂລແມັດ ແລະ ລຸ້ນທົ່ວໄປ.
ນາງ ລົດແກ້ວ ອິນທະກຸມມານ ກຽມເຂົ້າຮ່ວມການແຂ່ງຂັນ 800 ແມັດ ແລະ 1.500 ແມັດ ໃນງານມະຫາກໍາເອຊຽນເກມ 2018 ທີ່ປະເທດອິນໂດເນເຊຍ ທີ່ຈະຈັດຂຶ້ນໃນເດືອນສິງຫານີ້.
