ລັດຖະບານ ເລັ່ງແກ້ 4 ບັນຫາສໍາຄັນລະດັບຊາດ
ປັດຈຸບັນ ລັດຖະບານ ພວມສຸມໃສ່ແກ້ໄຂ 4 ບັນຫາສໍາຄັນລະດັບຊາດ ເປັນຕົ້ນການຄຸ້ມຄອງລາຄາສິນຄ້າ ແລະ ຄ່າບໍລິການ; ການຜັນຂະ ຫຍາຍ ແລະ ແຜນການຈັດຕັ້ງປະຕິບັດມາດຕະການໃນການກະຕຸ້ນເສດຖະກິດໃນໄລຍະ 6 ເດືອນທ້າຍປີ 2018; ນະໂຍບາຍຂອງລັດຖະບານກ່ຽວ ກັບການພັດທະນາລັດວິສາຫະກິດ ແລະ ການຜະລິດເປັນສິນຄ້າຂອງສະຫະກອນແບບໃໝ່ ແລະ ການລາຍງານສະພາບການຈັດຕັ້ງປະຕິບັດການຜະ ລິດລະດູແລ້ງ ແລະ ແຜນການຊຸກຍູ້ການຜະລິດລະດູຝົນ ເຊິ່ງ 4 ວຽກດັ່ງກ່າວ ໄດ້ຖືກຮັບຮອງເອົາໃນກອງປະຊຸມລັດຖະບານສະໄໝສາມັນ ປະຈໍາ ເດືອນມິຖຸນາ ທີ່ຜ່ານມາ.
ບັນຫາ 4 ວຽກໃຫຍ່ດັ່ງກ່າວທີ່ພວມຈັດຕັ້ງປະຕິບັດໃນຂະນະນີ້ ກໍມີຜົນຕໍ່ເນື່ອງຂອງກອງປະຊຸມສະໄໝສາມັນ ເທື່ອທີ 5 ສະພາແຫ່ງຊາດ ຊຸດທີ VIII ທີ່ມີມະຕິກະຕຸ້ນເສດຖະກິດ ໂດຍໃຫ້ເອົາໃຈໃສ່ປະຕິບັດນະໂຍບາຍເສດຖະກິດມະຫາພາກໃຫ້ມີສະຖຽນລະພາບ ສືບຕໍ່ຂະຫຍາຍຕົວ ແລະ ມີຄວາມໝັ້ນທ່ຽງ, ພ້ອມທັງ ຄົ້ນຄ້ວາແກ້ໄຂບາງຕົວຊີ້ວັດທີ່ມີຄວາມບອບບາງທາງດ້ານເສດຖະກິດ ແລະ ມີຄວາມສ່ຽງສູງ ຢ່າງມີຈຸດສຸມ ເປັນຕົ້ນອັດຕາສ່ວນໜີ້ສາທາລະນະຕໍ່ GDP, ຄວາມບໍ່ມີສະຖຽນລະພາບຂອງການນໍາເຂົ້າ-ສົ່ງອອກສິນຄ້າ ແລະ ການບໍລິການ, ອັດຕາສ່ວນຂອງຂະແໜງ ກະສິກໍາ-ປ່າໄມ້ຕໍ່ GDP ໃນນັ້ນແມ່ນຄວາມບໍ່ມີສະຖຽນລະພາບຂອງການຜະລິດກະສິກໍາ, ຄວາມບໍ່ດຸ່ນດ່ຽງມາດຕະຖານການຜະລິດກະສິກໍາ ແລະ ຜົນກະທົບຂອງໄພພິບັດ. ດ້ານເສດຖະກິດຈຸລະພາກ ແມ່ນໃຫ້ເອົາໃຈໃສ່ການຜະລິດກະສິກໍາປອດສານພິດໃຫ້ມີຕົ້ນທຶນຕໍ່າ ໂດຍສະເພາະການຜະລິດເຂົ້າ ແລະ ອື່ນໆຕາມເງື່ອນໄຂ ແລະ ທ່າແຮງທີ່ເຮົາມີ ເພື່ອສະໜອງໃຫ້ພຽງພໍກັບຄວາມຕ້ອງການຂອງຕະຫຼາດພາຍໃນ ແລະ ຕ່າງປະເທດ; ປັບປຸງລະ ບຽບການຄຸ້ມຄອງກອງທຶນສະໜັບສະໜູນວິສາຫະກິດຂະໜາດນ້ອຍ ແລະ ຂະໜາດກາງ (SME) ໃຫ້ສາມາດເຄື່ອນໄຫວໄດ້ຢ່າງຄ່ອງຕົວ ແລະ ມີປະສິດທິພາບ ໂດຍເພີ່ມທຶນພາຍໃນຈາກງົບປະມານຂອງລັດຈໍານວນ 200 ຕື້ກີບ ແລະ ຈໍານວນ 300 ລ້ານໂດລາ ຈາກແຫຼ່ງທຶນອື່ນ ພ້ອມທັງສ້າງເງື່ອນໄຂໃຫ້ຜູ້ປະກອບການສາມາດເຂົ້າເຖິງແຫຼ່ງທຶນດ້ວຍອັດຕາດອກເບ້ຍສົ່ງເສີມ, ການກໍານົດໄລຍະກູ້ຢືມໃຫ້ເໝາະສົມ ແລະ ປັບປຸງຄຸນນະພາບ ຂອງການຜະລິດໃຫ້ສາມາດແຂ່ງຂັນຢູ່ຕະຫຼາດພາຍໃນ ແລະ ຕ່າງປະເທດ; ສືບຕໍ່ຄຸ້ມຄອງ, ກວດກາການຈັດຕັ້ງປະຕິບັດມາດຕະການສະກັດກັ້ນ ແລະ ຕ້ານການລັກລອບນໍາເຂົ້າສິນຄ້າຜິດກົດໝາຍ, ສິນຄ້າໝົດອາຍຸການນໍາໃຊ້, ສິນຄ້າປອມແປງ, ສິນຄ້າຜ່ານແດນ ແລະ ການຄ້າຂາຍເຖື່ອນ, ການຄຸ້ມຄອງລາຄາໃຫ້ສອດຄ່ອງກັບຄຸນນະພາບສິນຄ້າ ຢ່າງເປັນຮູບປະທໍາ ແລະ ເຂັ້ມງວດ ແລະບັນຫາສໍາຄັນອື່ນໆຈໍານວນໜຶ່ງ.
ລັດຖະບານ ໄດ້ຊີ້ນໍາໃຫ້ບັນດາກະຊວງ ແລະ ອົງການທຽບເທົ່າຕ້ອງນໍາໄປປັບປຸງ, ໂດຍສະເພາະການຈັດຕັ້ງປະຕິບັດແຜນພັດທະນາເສດຖະ ກິດ-ສັງຄົມແຫ່ງຊາດ ແລະ ແຜນງົບປະມານແຫ່ງລັດປະຈໍາປີ 2018, ສືບຕໍ່ປະຕິບັດບັນດາຄາດໝາຍທິດທາງ ແລະ ວຽກງານຈຸດສຸມທີ່ກໍານົດໃນດໍາ ລັດດັ່ງກ່າວໃຫ້ມີປະສິດທິຜົນ ໃນນີ້ໄດ້ກໍານົດແຈ້ງບົດບາດໜ້າທີ່ຂອງແຕ່ລະຂະແໜງທີ່ຈະເປັນເຈົ້າການຮັບຜິດຊອບຈັດຕັ້ງປະຕິບັດຢ່າງເອົາຈິງເອົາຈັງ, ລົງເລິກແກ້ໄຂບັນດາຂໍ້ຄົງຄ້າງ ແລະ ວຽກທີ່ຍັງຄ້າງຄາທີ່ຖອດຖອນໄດ້ໃນໄລຍະ 6 ເດືອນຕົ້ນປີ ແລະ ຕ້ອງຈັດຕັ້ງປະຕິບັດ 8 ມາດຕະການກະຕຸ້ນເສດຖະກິດທີ່ລັດຖະບານ ໄດ້ສະເໜີຕໍ່ກອງປະຊຸມສະໄໝ ສາມັນ ເທື່ອທີ 5 ສະພາແຫ່ງຊາດ ຊຸດທີ VIII ໂດຍມີມາດຕະການສະກັດກັ້ນໄພເງິນເຟີ້ ແລະ ປັບປຸງນະໂຍບາຍເງິນຕາ; ປັບປຸງສະພາບແວດລ້ອມ ແລະ ອໍານວຍຄວາມສະດວກໃນການດໍາເນີນທຸລະກິດ; ສືບຕໍ່ແກ້ໄຂໜີ້ສິນພາຍໃນ; ການເກັບລາຍຮັບ ແລະ ຄຸ້ມຄອງລາຍຈ່າຍ; ການພັດທະນາ SME; ການປັບປຸງໂຄງສ້າງການລົງທຶນ; ການຄຸ້ມຄອງທີ່ດິນ ແລະ ການເກັບລາຍຮັບຈາກທີ່ດິນ ແລະ ມາດຕະການຕິດຕາມກວດກາການຈັດຕັ້ງປະຕິບັດລະບຽບກົດໝາຍຢ່າງເຂັ້ມງວດ.
ເຖິງຢ່າງໃດກໍຕາມ, ໃນດ້ານການຄຸ້ມຄອງລາຄາສິນຄ້າ ເຊິ່ງມີສິນຄ້າທີ່ຜົນກະທົບຕໍ່ຊີວິດການເປັນຢູ່ຂອງປະຊາຊົນ, ການຜະລິດທຸລະກິດ ກໍຄືການສ້າງເສດຖະກິດແຫ່ງຊາດ, ໃນນັ້ນ ລວມເຖິງໄພເງິນເຟີ້; ດັ່ງນັ້ນ ຈຶ່ງຈໍາເປັນຕ້ອງມີມາດຕະການຄຸ້ມຄອງລາຄາສິນຄ້າ ຢ່າງເໝາະສົມ, ຮັດກຸມແຕ່ກໍບໍ່ໃຫ້ສວນທາງກັບກົນໄກຂອງເສດຖະກິດຕະຫຼາດ; ການຄຸ້ມຄອງລາຄາສິນຄ້າໃນສະເພາະໜ້າ ຕ້ອງສຸມໃສ່ໝວດລາຍການສິນຄ້າທີ່ມີຜົນກະທົບຕໍ່ໄພເງິນເຟີ້ ຊຶ່ງປະກອບດ້ວຍໝວດຄົມມະນາຄົມ ແລະ ການຂົນສົ່ງ ໂດຍສະເພາະນໍ້າມັນເຊື້ອໄຟ, ໝວດອາຫານ ແລະ ໂຮງແຮມ, ໝວດເຄື່ອງດື່ມບໍ່ມີທາດເຫຼົ້າ (ປະເພດສະບຽງອາຫານ); ໝວດຮັກສາສຸຂະພາບ, ໝວດການສຶກສາ ແລະ ອື່ນໆ.
ບັນຫາການນະໂຍບາຍພັດທະນາລັດວິສາຫະກິດ ແລະ ສະຫະກອນແບບໃໝ່ນັ້ນ ແມ່ນສະຖາບັນຄົ້ນຄ້ວາເສດຖະກິດແຫ່ງຊາດສົມທົບກັບຂະແໜງການກ່ຽວຂ້ອງນໍາໄປປັບປຸງຕື່ມ; ສະຫຼຸບລາຄາ ແລະ ວິເຄາະ-ວິໃຈ ຕື່ມເຖິງສາເຫດທີ່ເຮັດໃຫ້ການພັດທະນາລັດວິສາຫະກິດ ແລະ ສະ ຫະກອນຜ່ານມາ ຍັງບໍ່ທັນໄດ້ຮັບໝາກຜົນດີເທົ່າທີ່ຄວນ; ຄົ້ນຄ້ວາບົດຮຽນການພັດທະນາລັດວິສາຫະກິດ ຫຼື ວິສາຫະກິດລັດລົງທຶນຂອງສາກົນ ເພື່ອເອົາມາໝູນໃຊ້ໃຫ້ສອດຄ່ອງກັບສະພາບເງື່ອນໄຂຂອງການພັດທະນາລັດວິສາຫະກິດຂອງປະເທດເຮົາ.
ກ່ຽວກັບການປະຕິບັດການຜະລິດລະດູແລ້ງ ແລະ ແຜນຊຸກຍູ້ການຜະລິດລະດູຝົນ ແມ່ນໃຫ້ກະຊວງກະສິກໍາ ແລະ ປ່າໄມ້ເປັນເຈົ້າການສົມທົບກັບພາກສ່ວນກ່ຽວຂ້ອງກວດກາຄືນນິຕິກໍາ, ກົນໄກ ຫຼື ຂອດອຸດຕັນທີ່ສ້າງຄວາມຫຍຸ້ງຍາກ ຫຼື ກີດຂວາງຕໍ່ປະສິດທິພາບຂອງການຜະລິດລະດູແລ້ງ ແລະ ລະດູຝົນຜ່ານມາແລ້ວຮີບຮ້ອນແກ້ໄຂໃຫ້ສໍາເລັດໂດຍໄວ; ລົງຊຸກຍູ້ສົ່ງເສີມການຜະລິດລະດູຝົນ ໂດຍຫັນພະນັກງານວິຊາການລົງຊ່ວຍປະຊາຊົນເຮັດໂຕຈິງກັບທີ່, ຊຸກຍູ້ສົ່ງເສີມການຜະລິດກະສິກໍາໃຫ້ມີຄວາມຫຼາກຫຼາຍ ແລະ ກ້ວາງຂວາງ ໂດຍໃຫ້ສືບຕໍ່ສົ່ງເສີມ ແລະ ດຶງດູດການລົງທຶນຈາກພາກເອກະຊົນພາຍໃນ ແລະ ຕ່າງປະເທດເຂົ້າມາໃນການຜະລິດ ແລະ ປຸງແຕ່ງເປັນສິນຄ້າ; ຄຽງຄູ່ກັນນັ້ນ ກໍ່ໃຫ້ຊຸກຍູ້ປະຊາຊົນປູກເຂົ້າພັນພື້ນເມືອງຂອງທ້ອງຖິ່ນຕ່າງໆໃຫ້ສາມາດແຂ່ງຂັນກັບປະເທດອ້ອມຂ້າງ; ສະໜອງແນວພັນ, ນໍາໃຊ້ເຕັກນິກເຄື່ອງມືທັນສະໄໝເຂົ້າຊ່ວຍການຜະລິດ; ຈັດສັນຕະຫຼາດຖາວອນໃຫ້ກຸ່ມການການຜະລິດພືດຜັກອິນຊີ ແລະ ກະສິກໍາສະອາດ ພ້ອມທັງຊອກຕະຫຼາດໃຫ້ກ້ວາງກ່ວາເກົ່າໃຫ້ປະຊາຊົນ ສາມາດຂາຍເປັນສິນຄ້າໄດ້ຫຼາຍຂຶ້ນ.
# ໂດຍ: ຣັດສະໝີ ດວງສັດຈະ.
