ນັກກິລາວໄດ້ແລ້ວ 2 ຫລຽນທອງ ງານກິລານັກຮຽນອາຊຽນຄັ້ງທີ 10
ນັກກິລານັກຮຽນລາວສາມາດຍາດໄດ້ແລ້ວ 2 ຫລຽນທອງ ໃນການແຂ່ງຂັນກິລານັກຮຽນອາຊຽນຄັ້ງທີ 10 ທີ່ປະເທດມາເລເຊຍ ຈັດຂຶ້ນລະຫວ່າງວັນທີ 19-27 ກໍລະກົດນີ້. ຂະນະທີ່ ສປປ ລາວ ສົ່ງນັກກິລາເຂົ້າຮ່ວມ 4 ປະເພດກິລາຄື: ແລ່ນ-ລານ, ກະຕໍ້, ດອກປີກໄກ່ ແລະ ລອຍນໍ້າ.
ການແຂ່ງຂັນຄັ້ງນີ້ ນັກກິລາລາວເຮົາສາມາດຍາດໄດ້ຫລຽນທອງທໍາອິດຈາກກະຕໍ້ປະເພດທີມດ່ຽວຊາຍ (3 ຄົນ) ໃນຮອບ 8 ທີມ ຊະນະ ມຽນມາ 2-0 ເຊັດ, ຜ່ານເຂົ້າຮອບ 4 ທີມ ເສຍໃຫ້ ໄທ 0-2 ເຊັດ: 19-21, 14-21 ແລະ ສາມາດຍາດໄດ້ຫລຽນທອງຮ່ວມກັບອິນໂດເນເຊຍ, ສ່ວນຫລຽນຄຳຕົກເປັນຂອງທີມຊາດໄທ, ຫລຽນເງິນຕົກເປັນຂອງທີມຊາດມາເລເຊຍ. ສໍາລັບອີກ 1 ຫລຽນທອງໄດ້ຈາກກິລາດອກປີກໄກ່ ປະເພດທີມຊຸດຊາຍ ຮອບຄັດເລືອກກຸ່ມບີ ນັດທີ 1 ເສຍໃຫ້ ສິງກະໂປ 0-5 ຄູ່, ນັດທີ 2 ຊະນະ ມຽນມາ 5-0 ຄູ່ ແລະ ນັດທີ 3 ຊະນະ ກຳປູເຈຍ 3-2 ຄູ່, ເຂົ້າຮອບ 4 ທີມເປັນທີສອງຂອງກຸ່ມ ພົບກັບ ອິນໂດເນເຊຍ ແລະ ເສຍໃຫ້ ອິນໂດເນເຊຍ 0-3 ຄູ່ ໄດ້ຫລຽນທອງຮ່ວມກັບ ສິງກະໂປ, ສ່ວນອິນໂດເນເຊຍ ກຽມຊີງຫລຽນຄໍາກັບທີມຊາດມາເລເຊຍ.
