ກຸ່ມ G20 ຮຽກຮ້ອງໃຫ້ໃຊ້ວິທີການເຈລະຈາ ເພື່ອແກ້ໄຂບັນຫາຄວາມເຄັ່ງຕຶງທາງການຄ້າ
ກຸ່ມປະເທດເສດຖະກິດຂະໜາດໃຫຍ່ ຫລື G20 ກ່າວໃນວັນທີ 22 ກໍລະກົດ ຮຽກຮ້ອງໃຫ້ເພີ່ມການເຈລະຈາ ເພື່ອຫລຸດຄວາມເຄັ່ງຕຶງທາງການຄ້າລະຫວ່າງປະເທດທີ່ກຳລັງເພີ່ມຂຶ້ນໃນປັດຈຸບັນນີ້ ເຊິ່ງອາດຈະສົ່ງຜົນກະທົບຕໍ່ການຂະຫຍາຍຕົວທາງເສດຖະກິດຂອງປະເທດທົ່ວໂລກຢ່າງຮຸນແຮງ.
ລັດຖະມົນຕີການເງິນ ແລະ ຜູ້ວ່າການທະນາຄານກາງຂອງກຸ່ມ G20 ເຊິ່ງປິດກອງປະຊຸມຮ່ວມກັນເປັນເວລາ 2 ວັນ ທີ່ນະຄອນຫລວງບູເອໂນສ ໄອເຣສ ຂອງອາກຊັງຕິນ ໃນວັນທີ 22 ກໍລະກົດ ກ່າວເຕືອນວ່າ: ຄວາມເຄັ່ງຕຶງທາງການຄ້າ ແລະ ການເມືອງລະດັບພາກພື້ນທີ່ກຳລັງເພີ່ມຂຶ້ນ ສົ່ງຜົນກະທົບຕໍ່ການຂະຫຍາຍຕົວທາງເສດຖະກິດ. ຖະແຫລງການຮ່ວມຂອງກອງປະຊຸມຍັງໄດ້ເນັ້ນເຖິງຄວາມຈຳເປັນທີ່ຈະເລັ່ງການເຈລະຈາ ແລະ ການລົງມືດຳເນີນການເພື່ອຫລຸດຄວາມສ່ຽງ ແລະ ເພີ່ມຄວາມໄວ້ວາງໃຈທ່າມກາງກະແສຄວາມກັງວົນວ່າຈະເກີດສົງຄາມການຄ້າ. ລັດຖະມົນຕີການເງິນ ແລະ ຜູ້ວ່າການທະນາຄານກາງຂອງກຸ່ມ G20 ອອກຖະແຫລງການຮ່ວມສະບັບນີ້ໃນຂະນະທີ່ນະໂຍບາຍປົກປ້ອງທາງການຄ້າຂອງປະທານາທິບໍດີ ໂດນັລ ທຣຳ ຂອງອາເມລິກາ ເຮັດໃຫ້ເກີດຄວາມບໍ່ພໍໃຈໃຫ້ແກ່ພັນທະມິດຄື: ສະຫະພາບເອີຣົບ, ການາດາ ແລະ ເມັກຊິກ ແລະ ສົ່ງຜົນໃຫ້ເກີດມາດຕະການຕອບໂຕ້ທາງການຄ້າໄປມາລະຫວ່າງກັນ, ເຖິງວ່າຖະແຫລງການຮ່ວມຈະບໍ່ໄດ້ກ່າວເຖິງອາເມລິກາ ເຊິ່ງເປັນປະເທດທີ່ສ້າງຂໍ້ຂັດແຍ່ງທາງການຄ້າກັບຈີນ, ອີຢູ ແລະ ປະເທດອື່ນໆ ໂດຍກົງ, ແຕ່ກໍສະແດງເຖິງຄວາມກັງວົນຫລາຍກວ່າເມື່ອຕອນທີ່ອອກຖະແຫລງການຮ່ວມເທື່ອກ່ອນ ໃນເດືອນມີນາຜ່ານມາ ທີ່ທາງກຸ່ມຫລີກເວັ້ນຈະກ່າວເຖິງເລື່ອງນີ້.
