ສໍາເລັດການແຂ່ງຂັນຊີງຂັນເລຂາ ຊປປລ ປະຈຳປີ 2018
ໃນວັນທີ 17 ກໍລະກົດນີ້ ທີ່ສະໜາມກິລາບານເຕະຫຍ້າທຽມໄອເຕັກ ເມືອງໄຊເຊດຖາ ນະຄອນຫລວງວຽງຈັນ ມີທ່ານ ອາລຸນໄຊ ສູນນະລາດ ເລຂາຄະນະບໍລິຫານງານສູນກາງ ຊປປລ ພ້ອມດ້ວຍຄະນະ, ແຂກທີ່ຖືກເຊີນ, ຄະນະນຳ, ຄູຝຶກ ແລະ ນັກກິລາແຕ່ລະພາກສ່ວນເຂົ້າຮ່ວມ.
ການແຂ່ງຂັນຄັ້ງນີ້ ມີທີມເຂົ້າຮ່ວມທັງໝົດ 31 ພາກສ່ວນທີ່ເປັນຕົວແທນຊາວໜຸ່ມຈາກບັນດາກະຊວງ ແລະ ອົງການຈັດຕັ້ງຕ່າງໆ ພາຍໃນສູນກາງ ເຊິ່ງໄດ້ແບ່ງການແຂ່ງຂັນອອກເປັນທັງໝົດ 8 ສາຍ. ຜ່ານການແຂ່ງຂັນຜົນປາກົດວ່າ: ອັນດັບ 1 ຊາວໜຸ່ມກະຊວງປ້ອງກັນປະເທດ (ກອງທັບ) ໄດ້ຮັບຂັນ 1 ໜ່ວຍ ພ້ອມເງິນສົດ 5 ລ້ານກີບ, ອັນດັບ 2 ຊາວໜຸ່ມມະຫາວິທະຍາໄລແຫ່ງຊາດ ໄດ້ຮັບຂັນ 1 ໜ່ວຍ ພ້ອມເງິນສົດ 3 ລ້ານກີບ, ອັນດັບ 3 ຊາວໜຸ່ມກະຊວງສາທາລະນະສຸກ ໄດ້ຮັບຂັນ 1 ໜ່ວຍ ພ້ອມເງິນສົດ 2 ລ້ານກີບ ແລະ ອັນດັບ 4 ໄດ້ຮັບເງິນລາງວັນ 1 ລ້ານກີບ. ຂະນະທີ່ລາງວັນທີມມາລະຍາດດີເດັ່ນ ແມ່ນທີມຊາວໜຸ່ມນະຄອນຫລວງວຽງຈັນ ໄດ້ຮັບຂັນ 1 ໜ່ວຍ ພ້ອມເງິນສົດ 5 ແສນກີບ ແລະ ລາງວັນຜູ້ທີ່ຍິງປະຕູໄດ້ຫຼາຍທີ່ສຸດ ທ້າວ ຄໍາພາວັນ ອິນທະວົງ ຊາວໜຸ່ມນະຄອນຫລວງວຽງຈັນ ໄດ້ຮັບຂັນ 1 ໜ່ວຍ ພ້ອມເງິນສົດ 2 ແສນກີບ.
