5 ຄູຝຶກທີ່ໄດ້ຮັບໃບປະກາດສະນີບັດ AFC A
ສະຫະພັນບານເຕະແຫ່ງຊາດລາວ ໄດ້ຝຶກອົບຮົມຄູຝຶກບານເຕະລະດັບ A ຂອງສະຫະພັນບານເຕະອາຊີ AFC ‘A’ Coaching Certificate Course ໃນທ້າຍເດືອນເມສາຜ່ານມານີ້ ໂດຍມີສໍາມະນາກອນເຂົ້າຮ່ວມທັງໝົດ 22 ຄົນ, ຍິງ 2 ຄົນ ເຊິ່ງໃນນັ້ນມາຈາກປະເທດໄທ 3 ຄົນ ແລະ ມາເລເຊຍ 1 ຄົນ, ຂະນະທີ່ຄູຝຶກທີ່ຜ່ານການທົດສອບໄດ້ພຽງ 5 ຄົນເທົ່ານັ້ນ.
ການຝຶກອົບຮົມໄດ້ດໍາເນີນມາແຕ່ວັນທີ 30 ເມສາ ຫາ 26 ພຶດສະພາ 2018 ໂດຍຝຶກເປັນເວລາ 1 ເດືອນ ໂດຍນັກສໍາມະນາກອນໄດ້ສອບເສັງ 5 ຄັ້ງ (ຕົວຈິງ 3 ຄັ້ງ ແລະ ທິດສະດີ 2 ຄັ້ງ) ຜ່ານການສອບເສັງຜົນປາກົດວ່າ: ຄູຝຶກຈໍານວນ 5 ຄົນໄດ້ສອບເສັງຜ່ານ ແລະ ໄດ້ຮັບໃບປະກາດຄູຝຶກລາຍເຊັນ A ແລ້ວ ປະກອບມີ: ທ່ານ ຈັນດາລາພອນ ລຽບວິໄຊ ຈາກ ແບລາວ ອະຄາເດມີ, ທ່ານ ໂກວັນ ນາມທະວີໄຊ ຈາກ ສະໂມສອນ ກອງທັບ ເອັຟຊີ, ທ່ານ ນາງ ພອນທິບ ແສງມະນີ ຈາກສະຫະພັນບານເຕະແຫ່ງຊາດລາວ, Mr Patanapong Sripramote ຈາກສະໂມສອນ ຂອນແກ່ນ ເອັຟຊີ ປະເທດໄທ, Mr Mohd Zaiham Bin Abd Hamid ຈາກປະເທດມາເລເຊຍ; ສ່ວນຄູຝຶກອີກຈໍານວນ 5 ຄົນຕ້ອງໄດ້ສອບເສັງຄືນພາກທິດສະດີ ປະກອບມີ 5 ທ່ານຄື: ທ່ານ ບຸນລັບ ເຄນກິຕິສັກ ຈາກ ສະໂມສອນ ວຽງຈັນ ເອັຟຊີ, ທ່ານ ບຸນມາ ປະຖຳມະວົງ ຈາກສະໂມສອນ ປກສ ເອັຟຊີ, ທ່ານ ກັນລະຍາ ສີສົມຫວັງ ຈາກສະຫະພັນບານເຕະແຫ່ງຊາດລາວ, Mr Chusak Sriphum ຄູຝຶກທີມຊາດລາວ ຢູ19 ຈາກປະເທດໄທ, Mr Rachan Sarakome ຈາກປະເທດໄທ. ນອກຈາກນັ້ນ ຍັງມີຄູຝຶກຕ້ອງໄດ້ສອບເສັງຄືນພາກປະຕິບັດ ປະກອບມີ 4 ທ່ານຄື: ທ່ານ ເວີນສະຫວັນ ສີວິໄຊ ຈາກສະໂມສອນ ພີວີ ເອັຟຊີ, ທ່ານ ຄຳໃສ ຈັນທະວົງ ຈາກໂຮງຮຽນບຸນເກີດສຶກສາ, ທ່ານ ສົມສັກ ແກ້ວດາລາ ຈາກສະຫະພັນບານເຕະແຫ່ງຊາດລາວ, ທ່ານ ນາງ ດອນສະຫວັນ ໄຊຍະສົມບັດ ຈາກແຂວງຈຳປາສັກ.
