ບໍລິສັດສະຕາໂທລະຄົມ (ຢູນິເທວ) ສາຂາແຂວງເຊກອງ ຈັດກິດຈະກຳແຫ່ຄາລະວານເປີດເຄືອຂ່າຍ 4G
ເຊົ້າວັນທີ 17 ກໍລະກົດນີ້ ບໍລິສັດສະຕາໂທລະຄົມ (ຢູນິເທວ) ສາຂາແຂວງເຊກອງ ໄດ້ຈັດກິດຈະກຳແຫ່ຄາລະວານເປີດເຄືອຂ່າຍ 4G ເຊິ່ງຂະບວນດັ່ງກ່າວໄດ້ເລີ່ມຈາກສາຂາຫ້ອງຢູນິເທວໄປຕາມເສັ້ນທາງຫຼັກໃນເທສະບານເມືອງລະມາມລວມໄລຍະ 10 ກວ່າກິໂລແມັດ ເຊິ່ງມາຮອດປັດຈຸບັນບໍລິສັດສະຕາໂທລະຄົມ (ຢູນິເທວ) ສາຂາແຂວງເຊກອງ ໄດ້ຂະຫຍາຍເຄືອຂ່າຍຢ່າງກວ້າງຂວາງໃນທົ່ວແຂວງຫລາຍກວ່າ 52 ສະຖານີ, ໃນນັ້ນສູນ 2G ມີ 48 ສະຖານີ; 3G ມີ 38 ສະຖານີ ແລະ 4G ມີ 20 ສະຖານີ ແລະ ຂະຫຍາຍສາຍສົ່ງແກ້ວໄຍແສງໄດ້ 513 km, ສາມາດປ່ອຍສັນຍານກວມ 100/100 ຂອງບັນດາເມືອງທົ່ວແຂວງ, ໃນນັ້ນປ່ອຍສັນຍານກວມ 97,4% ຂອງພົນລະເມືອງໃນທົ່ວແຂວງ, ມີຊ່ອງທາງຈັດຈຳໜ່າຍທີ່ກວ້າງຂວາງມີ 4 ປ່ອງບໍລິການລູກຄ້າ, ມີຈຸດຂາຍຍ່ອຍ, ຮ້ານຕົວແທນຫຼາຍເຖິງ 365 ຈຸດຂາຍ ມີທຸກບ້ານທີ່ຄອຍຮັບໃຊ້ລູກຄ້າ, ມີສ່ວນແບ່ງການຕະຫຼາດກວມ 73%, ສາມາດສະໜອງການບໍລິການລະບົບໂທລະຄົມໃຫ້ແກ່ປະຊາຊົນທີ່ຢູ່ຫ່າງໄກສອກຫຼີກ ໄດ້ຮັບການຊົມໃຊ້ຢ່າງທົ່ວເຖິງ ແລະ ສະດວກສະບາຍ ພ້ອມທັງສາມາດຕິດຕໍ່ພົວພັນວຽກງານໄດ້ຢ່າງວ່ອງໄວ. ສ່ວນດ້ານການພົວພັນສັງຄົມກໍໄດ້ມອບພັນທະເຂົ້າງົບປະມານຂອງລັດໄດ້ເຖິງ 3,12 ຕື້ກີບຕໍ່ປີ. ນອກນັ້ນ ຍັງຊ່ວຍເຫຼືອປະຊາຊົນຢູ່ຫ່າງໄກສອກຫຼີກອີກເປັນຈຳນວນຫຼາຍ, ເຄືອຂ່າຍຢູນິເທວ ຍັງສາມາດສະໜອງການບໍລິການຫຼາຍຮູບແບບ ເໝາະແກ່ການນຳໃຊ້ໃນສັງຄົມ ໂດຍສະເພາະແມ່ນລະບົບ 4G ແມ່ນມີຄວາມໄວສຸງສູດສຳລັບທຸກຄົນ. ນອກນັ້ນຍັງເປັນເຄືອຂ່າຍດຽວທີ່ສະໜອງແອັບນຳໃຊ້ບໍ່ເສຍຄ່າດາຕ້າ ຄືແອັບໂມຈາ ສາມາດຟັງເພງຮ່ວມກັນໄດ້ກັບໝູ່ເພື່ອນດ້ວຍກັນ ສະໜອງຄວາມບັນເທີງທີ່ຫຼາກຫຼາຍໃໝ່ໆມ່ວນໆຜ່ານແອັບດັ່ງກ່າວ ຈາກນັ້ນກໍຍັງອອກແບບພິເສດເກັບຄ່າບໍລິການດາຕ້າທີ່ຕ່ຳ ເພື່ອຫຼີກເວັ້ນການຕັດຫົວໜ່ວຍດາຕ້າ ຈະເຮັດໃຫ້ປະຢັດເຊັ່ນກັນ ຄືແອັບມ່ວນຫຼາຍ, ສະໜອງການບໍລິການເບິ່ງໂທລະພາບແບບອອນລາຍ, ວິທະຍຸ ເບິ່ງຄລິບຕ່າງໆໄດ້ເປັນຢ່າງດີ.
