ລົດແກ້ວ ຕັ້ງເປົ້າຕິດ 1 ໃນ 3 ແຂ່ງຂັນ ຮາຟມາຣາທອນ 2018 ທີ່ປະເທດໄທ
ນາງ ລົດແກ້ວ ອິນທະກຸມມານ ນັກກິລາແລ່ນທີມຊາດລາວ ຫວັງຕິດ 1 ໃນ 3 ຂອງການແຂ່ງຂັນ ອຸບົນຣາດສະທານີ ຮາຟມາຣາທອນ 2018 ທີ່ຈະຈັດຂຶ້ນທ້າຍເດືອນນີ້ ເພື່ອກຽມຄວາມພ້ອມເຂົ້າຮ່ວມການແຂ່ງຂັນເອຊຽນເກມ 2018 ທີ່ປະເທດອິນໂດເນເຊຍ ທີ່ຈະຈັດຂຶ້ນເດືອນສິງຫານີ້.
ນາງ ລົດແກ້ວ ອິນທະກຸມມານ ໄດ້ໃຫ້ສໍາພາດວ່າ: ປັດຈຸບັນຕົນເອງໄດ້ຝຶກຊ້ອມກຽມຄວາມພ້ອມຢູ່ສະເໝີ ເພື່ອກຽມເຂົ້າຮ່ວມການແຂ່ງຂັນເອຊຽນເກມ 2018 ທີ່ປະເທດອິນໂດເນເຊຍ ໂດຍຕົນເອງໄດ້ເຄື່ອນໄຫວເຂົ້າຮ່ວມການແຂ່ງຂັນລາຍການຕ່າງໆທັງພາຍໃນ ແລະ ຕ່າງປະເທດ ເພື່ອໃຫ້ຮ່າງກາຍມີຄວາມພ້ອມຢູ່ສະເໝີ ເຊິ່ງຫລ້າສຸດຕົນເອງໄດ້ເຂົ້າຮ່ວມການແຂ່ງຂັນ ພັດທະຍາ ຮາຟມາຣາທອນ 2018 ທີ່ຈັດຂຶ້ນໃນວັນທີ 15 ກໍລະກົດນີ້ ເຊິ່ງໄດ້ສ້າງຜົນງານໂດດເດັ່ນພໍສົມຄວນ ດ້ວຍການຍາດໄດ້ 2 ລາງວັນຄື: ລາງວັນຮຸ່ນທົ່ວໄປ ແລະ ຮຸ່ນອາຍຸ 20-34 ປີຍິງ. ນອກຈາກນັ້ນ ຕົນເອງຍັງຈະສືບຕໍ່ເຂົ້າຮ່ວມການແຂ່ງຂັນອຸບົນຣາດສະທານີ ຮາຟມາຣາທອນ 2018 ທີ່ຈະຈັດຂຶ້ນໃນວັນທີ 22 ກໍລະກົດນີ້ ເຊິ່ງຈະເຂົ້າຮ່ວມໃນລາຍການແລ່ນ 21 ກິໂລແມັດ ໂດຍຕັ້ງເປົ້າໝາຍຕິດ 1 ໃນ 3 ຂອງການແຂ່ງຂັນຄັ້ງນີ້.
