ກອງປະຊຸມເປີດກວ້າງຄົບຄະນະບໍລິຫານງານພັກກະຊວງການເງິນສຸມໃສ່ແກ້ໄຂວຽກງານຮີບດ່ວນຫລາຍດ້ານ
ໃນລະຫວ່າງວັນທີ 16 -18 ກໍລະກົດນີ້, ຄະນະບໍລິຫານງານພັກກະຊວງການເງິນ ໄດ້ດຳເນີນກອງປະຊຸມເປີດກວ້າງຄົບຄະນະບໍລິຫານງານຄັ້ງທີ 6 ສະໄໝທີ II ຂອງຕົນ ເພື່ອຈະໄດ້ພ້ອມກັນສຸມໃສ່ຄົ້ນຄວ້າປະກອບຄໍາຄິດຄໍາເຫັນໃສ່ວຽກງານສຳຄັນທີ່ຮີບດ່ວນຕ່າງໆໃຫ້ມີເນື້ອໃນເລິກເຊິ່ງ, ສອດຄ່ອງກັບສະພາບການຕົວຈິງໂດຍການເປັນປະທານກອງປະຊຸມຂອງສະຫາຍ ບຸນທອງ ຈິດມະນີ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ປະທານກວດກາສູນກາງພັກ, ຮອງນາຍົກລັດຖະມົນຕີ, ມີສະຫາຍ ສົມດີ ດວງດີ ກໍາມະການສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ຄະນະພັກ; ຄະນະນໍາກະຊວງເຂົ້າຮ່ວມຢ່າງພ້ອມພຽງ. ສະຫາຍ ສົມດີ ດວງດີ ມີຄຳເຫັນວ່າ: ການດຳເນີນກອງປະຊຸມເປີດກວ້າງຄົບຄະນະບໍລິຫານງານພັກກະຊວງຄັ້ງນີ້ ຈະໄດ້ພ້ອມກັນສຸມໃສ່ຄົ້ນຄວ້າປະກອບຄໍາຄິດຄໍາເຫັນໃສ່ວຽກງານສຳຄັນທີ່ຮີບດວນໃຫ້ມີເນື້ອໃນເລິກເຊິ່ງ, ສອດຄ່ອງກັບບັນຫາຕ່າງໆທີ່ເກີດຂຶ້ນໃນຂະແໜງການເງິນໂດຍສະເພາະກໍາລັງສຸມໃສ່ຈັດຕັ້ງປະຕິບັດແຜນງົບປະມານແຫ່ງລັດ 6 ເດືອນຕົ້ນປີ 2018 ແລະ ກ້າວເຂົ້າສູ່ການຈັດຕັ້ງປະຕິບັດແຜນງົບປະມານແຫ່ງລັດ 6 ເດືອນທ້າຍປີ ແລະ ກະກຽມສ້າງແຜນງົບປະມານແຫ່ງລັດປີ 2019 ໃຫ້ແທດເຖິງຕົວຈິງ. ພ້ອມດຽວກັນນີ້, ຍັງຈະໄດ້ຄົ້ນຄວ້າປະກອບຄຳເຫັນໃສ່ບົດສະຫຼຸບຕີລາຄາການຈັດຕັ້ງປະຕິບັດບັນດາຄາດໝາຍສູ້ຊົນທີ່ໄດ້ກໍານົດໄວ້ໃນມະຕິກອງປະຊຸມໃຫຍ່ຄັ້ງທີ II ຂອງອົງຄະນະພັກກະຊວງການເງິນກາງສະໄໝນັບແຕ່ສູນກາງລົງຮອດທ້ອງຖິ່ນ ໄດ້ດໍາເນີນການຈັດຕັ້ງປະຕິບັດບັນດາມາດຕະການຕ່າງໆ ໂດຍປະສານສົມທົບກັບບັນດາກະຊວງ, ອົງການ ແລະ ອົງການ ປົກຄອງທ້ອງຖິ່ນເພື່ອຕອບສະໜອງດ້ານງົບປະມານຕາມທີ່ກຳນົດໄວ້ໃນແຜນງົບປະມານແຫ່ງລັດໃຫ້ມີຄວາມຄ່ອງຕົວ ໂດຍສະເພາະແມ່ນສາມາດແກ້ໄຂບັນຫາເງິນເດືອນ, ເງິນນະໂຍບາຍໄດ້ເປັນປົກກະຕິທຸກໆເດືອນ; ສາມາດດຸນດ່ຽງງົບປະມານໃຫ້ສູນກາງ ແລະ ທ້ອງຖິ່ນຕາມແຜນທີ່ສະພາແຫ່ງຊາດຮັບຮອງ. ພ້ອມດຽວກັນນັ້ນ, ໄດ້ຕັ້ງໜ້າປັບປຸງຄືນກົງຈັກການຈັດຕັ້ງຂອງຂະແໜງການເງິນແຕ່ສູນກາງລົງຮອດທ້ອງຖິ່ນສຳເລັດ ເຊັ່ນ: ພາລະບົດບາດຂອງກະຊວງການເງິນ, ພາລະບົດບາດ ຂອງບັນດາກົມກອງອ້ອມຂ້າງກະຊວງລວມທັງພາລະບົດບາດຂອງສາມຂະແໜງການສາຍຕັ້ງ (ພາສີ, ສ່ວຍສາອາກອນ ແລະ ຄັງເງິນແຫ່ງຊາດ), ພາລະບົດບາດຂອງພະແນກການເງິນບັນ ດາແຂວງ, ນະຄອນຫຼວງ ແລະ ຫ້ອງການເງິນເມືອງ, ເທສະບານ, ນະຄອນ, ໄປຄຽງຄູ່ກັບການສັບຊ້ອນໝູນວຽນພະນັກງານເປັນແຕ່ລະໄລຍະຢ່າງເປັນລະບົບ ເພື່ອແກ້ໄຂປາກົດການຫຍໍ້ທໍ້ຂອງພະນັກງານ ເພື່ອພ້ອມກັນສຸມໃສ່ຈັດຕັ້ງປະຕິບັດໜ້າທີ່ການເມືອງທີ່ໄດ້ຮັບມອບໝາຍໃຫ້ມີປະສິດທິຜົນກ້າວເຂົ້າສູ່ການກະກຽມບັ້ນດໍາເນີນກອງປະຊຸມໃຫຍ່ 3 ຂັ້ນຂອງຕົນໃຫ້ມີຜົນສໍາເລັດ.
ຂ່າວ-ພາບ: ກະຊວງການ ເງິນ.
