ປະທານາທິບໍດີເວເນຊູເອລາສະເໜີຮ່າງລັດຖະທຳມະນູນສະບັບໃໝ່ທ່າມກາງເຫດປະທ້ວງ
ກາຣາກັດ 2 ພຶດສະພາ: ປະທານາທິບໍດີ ນິໂກລັດ ມາດູໂຣ ຂອງເວເນຊູເອລາ ສະເໜີໃຫ້ມີການຈັດທຳລັດຖະທຳມະນູນສະບັບໃໝ່, ຂະນະທີ່ຝ່າຍຄ້ານບໍ່ເຫັນພ້ອມ, ພ້ອມປະກາດຈັດຊຸມນຸມປະທ້ວງຄັ້ງໃຫຍ່ມື້ອື່ນ.
ປະທານາທິບໍດີ ມາດູໂຣ ປະກາດຕໍ່ໜ້າບັນດາຜູ້ສະໜັບສະໜູນຫລາຍພັນຄົນຢູ່ນະຄອນຫລວງກາຣາກັດ ເນື່ອງໃນວັນກຳມະກອນສາກົນວ່າ: ທ່ານພວມໃຊ້ອຳນາດໃນການຈັດຕັ້ງສະພາຮ່າງລັດຖະທຳມະນູນພົນລະເມືອງທີ່ມີຕົວແທນຈາກພາກສ່ວນຊົນຊັ້ນກຳມະກອນ ແລະ ສະພາທ້ອງຖິ່ນເປັນສະມາຊິກຈຳນວນ 500 ຄົນ ເຂົ້າມາມີບົດບາດໃນການແກ້ໄຂລັດຖະທຳມະນູນ ແທນລັດຖະສະພາທີ່ຝ່າຍຄ້ານຄອງສຽງສ່ວນຫລາຍ. ທ່ານໃຫ້ເຫດຜົນວ່າ: ກົດໝາຍສະບັບໃໝ່ມີຄວາມຈຳເປັນເພື່ອສະກັດກັ້ນການເຮັດລັດຖະປະຫານຂອງຂະບວນການຟາຊິດ ທີ່ພວມສ້າງໄພຄຸກຄາມໃຫ້ແກ່ປະເທດ.
ສ່ວນຝ່າຍຄ້ານອອກມາປະຕິເສດແນວຄິດຂອງຜູ້ນຳລັດຖະບານເວເນຊູເອລາທັນທີ ເພາະເຫັນວ່າລັດຖະທຳມະນູນສະບັບໃໝ່ຈະບໍ່ໄດ້ເປັນຜົນມາຈາກການເລືອກຕັ້ງໂດຍກົງ, ແຕ່ຈະຖືກຮ່າງໂດຍກຸ່ມບຸກຄົນທີ່ເປັນກຳມະກອນ ແລະ ກະສິກອນ ສິ່ງນີ້ຈຶ່ງປຽບເໝືອນການກໍ່ລັດຖະປະຫານ, ຝ່າຍຄ້ານຈຶ່ງຂໍໃຫ້ບັນດາຜູ້ປະທ້ວງອອກມາຊຸມນຸມປິດຖະໜົນ ແລະ ຈະຈັດການຊຸມນຸມໃຫຍ່ໃນວັນທີ 3 ພຶດສະພານີ້.
ທັງນີ້, ສະຖານະການການຊຸມນຸມປະທ້ວງຮຽກຮ້ອງໃຫ້ປະທານາທິບໍດີ ມາດູໂຣ ອອກຈາກຕຳແໜ່ງຍັງດຳເນີນມາຢ່າງຕໍ່ເນື່ອງເປັນເວລາກວ່າ 1 ເດືອນແລ້ວ. ໄອຍະການເປີດເຜີຍວ່າ: ເຫດປະທ້ວງລະຫວ່າງເຈົ້າໜ້າທີ່ ແລະ ຜູ້ຊຸມນຸມສົ່ງຜົນເຮັດໃຫ້ມີຜູ້ເສຍຊີວິດ 28 ຄົນໃນເດືອນຜ່ານມາ. ຜູ້ຊຸມນຸມຄົນໜຶ່ງກ່າວວ່າ: ລາວອອກມາຮຽກຮ້ອງໃຫ້ທ່ານ ມາດູໂຣ ລາອອກ ເພາະລາວເຫັນວ່າທ່ານ ມາດູໂຣ ເປັນຜະເດັດການໃນຮູບແບບປະຊາທິປະໄຕ ແລະ ສະຖານະການຢູ່ເວເນຊູເອລາຍັງຢູ່ສະພາບສະພາບວິກິດຂາດເຂີນອາຫານ.
