ຄະນະກຳມະການເລືອກຕັ້ງກຳປູເຈຍ ລະບຸ ຊວນຄົນຂວ້ຳບາດເລືອກຕັ້ງ ຖືວ່າກໍ່ອາດຊະຍາກຳ
ຄະນະກຳມະການການເລືອກຕັ້ງກຳປູເຈຍ ລະບຸວ່າ: ການປຸກລະດົມຊັກຊວນຄົນຂວ້ຳບາດການເລືອກຕັ້ງວັນທີ 29 ກໍລະກົດ ຖືເປັນການກໍ່ອາດຊະຍາກຳ ແລະ ທາງການໄດ້ຕັ້ງຂໍ້ຫາກັບຜູ້ທີ່ວິພາກວິຈານການເລືອກຕັ້ງແລ້ວ.
ເລຂາທິການຄະນະກຳມະການການເລືອກຕັ້ງກຳປູເຈຍ ກ່າວຕໍ່ສື່ມວນຊົນໃນການຖະແຫລງເປີດຕົວກ່ອງມຶກຈຳນວນຫລາຍສຳລັບພິມນິ້ວມືຜູ້ໃຊ້ສິດເລືອກຕັ້ງວ່າ: ໃນປະເທດປະຊາທິປະໄຕ ການເລືອກຕັ້ງເປັນສິ່ງສຳຄັນທີ່ສຸດ, ການຊັກຊວນຄົນຕໍ່ຕ້ານການເລືອກຕັ້ງ ຫລື ປັ່ນປ່ວນບໍ່ໃຫ້ຄົນໄປໃຊ້ສິດ ຈຶ່ງຖືເປັນການກໍ່ອາດຊະຍາກຳ, ທາງການຈະດຳເນີນການທາງກົດໝາຍກັບທຸກຄົນທີ່ກ່ຽວຂ້ອງກັບການຂວ້ຳບາດ ແລະ ກຳລັງເຝົ້າຕິດຕາມຜູ້ທີ່ວິພາກວິຈານ ແລະ ໃຊ້ຄຳບໍ່ສຸພາບກັບເຈົ້າໜ້າທີ່ເລືອກຕັ້ງ.
ເລຂາທິການຄະນະກຳມະການການເລືອກຕັ້ງ ເນັ້ນຄຳເວົ້າຂອງລັດຖະບານເລື່ອງຈະດຳເນີນຄະດີກັບຜູ້ຊັກຊວນຄົນຂວ້ຳບາດເລືອກຕັ້ງ, ຫລັງຈາກແກນນຳຝ່າຍຄ້ານຫລາຍຄົນ ເຊິ່ງສ່ວນຫລາຍໜີໄປຢູ່ຕ່າງປະເທດປຸກລະດົມໃຫ້ຄົນຂວ້ຳບາດເລືອກຕັ້ງ.
