ແອັດດ້າ ດາວຍິງສູງສຸດຂອງຫລວງພະບາງ ຢູໄນເຕັດ

ແອັດດ້າ ດີຈີຊີລີ ນັກເຕະກອງໜ້າສະໂມສອນ ຫລວງພະບາງ ຢູໄນເຕັດ ຈາກປະເທດເດນມາກ ເປັນດາວຍິງສູງສຸດ ຮອງຈາກ ຄາຊູໂຮມະ ຈາກສະໂມສອນ ລາວໂຕໂຢຕ້າ ເອັຟຊີ ຂອງການແຂ່ງຂັນເປບຊີ ລາວພຣີເມຍລີກ 2018.

ສະໂມສອນ ຫລວງພະບາງ ຢູໄນເຕັດ ຖືວ່າເປັນສະໂມສອນນ້ອງໃໜ່ ເຊິ່ງສາມາດຢູ່ອັນດັບທີ 6 ຂອງຕາຕະລາງຄະແນນ ເຊິ່ງປັດຈຸບັນຍິງໄປແລ້ວ 13 ປະຕູ ຈາກການລົງສະໜາມ 11 ຄັ້ງ ຊະນະ 3 ຄັ້ງ ເສຍ 4 ຄັ້ງ ສະເໝີ 4 ຄັ້ງ ເຊິ່ງໃນນັ້ນ ແອັດດ້າ ດີຈີຊີລີ ສາມາດຍິງປະຕູຊ່ວຍສະໂມສອນໄດ້ 7 ປະຕູ ໂດຍຍິງຫລາຍກວ່າໝູ່ໃນການລົງສະໜາມວັນທີ 14 ກໍລະກົດຜ່ານມາ ທີ່ສະໜາມຫລວງພະບາງ ໂດຍສາມາດເອົາຊະນະ ສະໂມສອນ ກອງທັບ ເອັຟຊີ 3-0, ແອັດດ້າ ດີຈີຊີລີ ເປັນຜູ້ເໝົາຍິງປະຕູທັງໝົດ.

ສໍາລັບດາວຍິງສູງສຸດຂອງການແຂ່ງຂັນເປບຊີ ລາວພຣີເມຍລີກ 2018 ອັນດັບທີ 1 ຄາຊູໂຮມະ ນັກເຕະສະໂມສອນ ລາວໂຕໂຢຕ້າ ເອັຟຊີ ຍິງໄດ້ 19 ປະຕູ, ອັນດັບທີ 2 ແອັດດ້າ ດີຈີຊີລີ ນັກເຕະສະໂມສອນ ຫລວງພະບາງ ຢູໄນເຕັດ ຍິງໄດ້ 7 ປະຕູ, ອັນດັບທີ 3 ພິທັກ ກອງມາທິລາດ ຈາກສະໂມສອນກອງທັບ ເອັຟຊີ ຍິງໄດ້ 6 ປະຕູ.