ລົດແກ້ວ ຍາດໄດ້ 2 ລາງວັນ ໃນລາຍການ ພັດທະຍາ ມາຣາທອນ 2018

ນາງ ລົດແກ້ວ ອິນທະກຸມມານ ນັກກິລາແລ່ນທີມຊາດລາວ ສາມາດຍາດໄດ້ 2 ລາງວັນຄື: ຮຸ່ນທົ່ວໄປຍິງ ແລະ ຮຸ່ນອາຍຸ 20-34 ປີ ໃນໄລຍະ 10 ກິໂລແມັດ ໃນການແຂ່ງຂັນລາຍການພັດທະຍາ ມາຣາທອນ 2018 ທີ່ເມືອງພັດທະຍາ ແຂວງຊົນບູລີ ປະເທດໄທ  ເມື່ອວັນທີ 15 ກໍລະກົດ.

ການແຂ່ງຂັນດັ່ງກ່າວມີຢູ່ 4 ຮຸ່ນ ຊາຍ-ຍິງ ປະກອບມີ: ຮຸ່ນໄລຍະ 42 ກິໂລ, 21 ກິໂລ, 10 ກິໂລ, 3 ກິໂລ ເຊິ່ງມີນັກກິລາເຂົ້າຮ່ວມທັງໝົດ 3.600 ຄົນ, ໃນນັ້ນ ນາງ ລົດແກ້ວ ອິນທະກຸມມານ ໄດ້ລົງແຂ່ງຂັນຮຸ່ນໄລຍະທາງ 10 ກິໂລແມັດ, ຜ່ານການແຂ່ງຂັນຜົນປາກົດວ່າ: ນາງ ລົດແກ້ວ ອິນທະກຸມມານ ສາມາດເຂົ້າເສັ້ນໄຊຍາດໄດ້ອັນດັບທີ 1 ດ້ວຍເວລາ 39 ນາທີ 23 ວິນາທີ ເຊິ່ງສາມາດຍາດໄດ້ 2 ລາງວັນປະກອບມີ: ຮຸ່ນທົ່ວໄປ ແລະ ຮຸ່ນອາຍຸ 20-34 ປີຍິງ.

ນາງ ລົດແກ້ວ ອິນທະກຸມມານ ກຽມເຂົ້າຮ່ວມການແຂ່ງຂັນ 800 ແມັດ ແລະ 1.500 ແມັດ ໃນງານມະຫະກໍາເອຊຽນເກມ 2018 ທີ່ປະເທດອິນໂດເນເຊຍ ທີ່ຈະຈັດຂຶ້ນໃນເດືອນສິງຫານີ້.