ລາວເຜີຍແຜ່ແຜນແມ່ບົດໄອຊີທີອາຊຽນ 2020
ທ່ານຫົວໜ້າກົມແຜນການ ແລະ ການຮ່ວມມື ກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ໃຫ້ຮູ້ໃນກອງປະຊຸມເຜີຍແຜ່ແຜນແມ່ບົດໄອຊີທີອາຊຽນ 2020 (AIM 2020) ແລະແນະນຳກ່ຽວກັບລະບຽບການ ແລະ ຂັ້ນຕອນຕ່າງໆໃນການຂຽນບົດສະເໜີໂຄງການ-ກິດຈະກຳ ພາຍໃຕ້ກອງທຶນຂອງອາຊຽນ ແລະ ປະເທດຄູ່ຮ່ວມ ທີ່ຈັດຂຶ້ນເມື່ອບໍ່ດົນມານີ້ວ່າ: ໃນຜ່ານມາ, ຂອບການຮ່ວມມືພາກພື້ນອາຊຽນແມ່ນໄດ້ຮັບການສະໜັບສະໜູນ ແລະ ຮ່ວມມືຈາກຫລາຍປະເທດເປັນຕົ້ນ: ສປ ຈີນ, ສ.ເກົາຫລີ, ຍີ່ປຸ່ນ, ອິນເດຍ, ສະຫະລັດອາເມຣິກາ, ສະຫະພາບເອີຣົບ ແລະ ສະຫະພາບໂທລະຄົມມະນາຄົມສາກົນ. ສະເພາະລາວເຮົາ ກໍໄດ້ເຄື່ອນໄຫວຫລາຍກິດຈະກຳພາຍໃຕ້ກອງທຶນດັ່ງກ່າວ ເຊັ່ນ: ໃນປີ 2016 ມີ 2 ກິດຈະກຳ ມູນຄ່າປະມານ 60 ພັນໂດລາສະຫະລັດ, ປີ 2017 ມີ 2 ກິດຈະກຳ ມູນຄ່າ 15 ພັນໂດລາສະຫະລັດ ແລະ ໃນປີ 2018 ນີ້ມີ 2 ກິດຈະກຳມູນຄ່າປະມານ 78 ພັນໂດລາສະຫະລັດ. ນອກນີ້, ກໍໄດ້ຈັດງານປະກວດຜະລິດຕະພັນໄອຊີທີທຸກໆປີ ເພື່ອຄັດເລືອກຜົນງານທີ່ດີສົ່ງເຂົ້າປະກວດໃນງານ ອາຊຽນ ໄອຊີທີ ອາວອດ (ASEAN ICT Award) ຊຶ່ງໄດ້ຮັບ 2 ລາງວັນໃນ ປີ 2017 ຄື: ສຳລັບຄົນອໍທິສ ຕິກ (Application) ແລະ ການສ້າງເນື້ອຫາແບບດີຈີຕອນ (Application Navi).
ຫົວໜ້າກົມດັ່ງກ່າວ ໃຫ້ຮູ້ວ່າ: ສໍາລັບແຜນແມ່ບົດໄອຊີທີອາຊຽນ 2020 ໄດ້ຮັບຮອງເອົາໃນກອງປະຊຸມລັດຖະມົນຕີອາຊຽນດ້ານໂທລະຄົມມະນາຄົມ (TELMIN) ຄັ້ງທີ 15 ໃນເດືອນພະຈິກປີ 2015 ທີ່ນະຄອນດານັງ ສສ ຫວຽດນາມ, ແຜນດັ່ງກ່າວຈະເປັນຕົວຂັບເຄື່ອນອາຊຽນສູ່ເສດຖະກິດແບບດີຈີຕອນໃຫ້ມີຄວາມປອດໄພ, ຍືນຍົງ, ການປ່ຽນແປງໃໝ່, ການສ້າງນະວັດຕະກຳ, ການມີສ່ວນຮ່ວມ ແລະ ການເຊື່ອມໂຍງປະຊາຄົມອາຊຽນ.
