ລາວ-ຈີນ ເພີ່ມທະວີຮ່ວມມືສ້າງສູນຄົ້ນຄວ້າເຕັກໂນໂລຊີແບບໃໝ່ດ້ານບໍ່ແຮ່ ແລະ ໂລຫະກຳ
ພິທີລົງນາມຮ່ວມມືສ້າງສູນຄົ້ນຄ້ວາກ່ຽວກັບເຕັກໂນໂລຊີແບບໃໝ່ ດ້ານບໍ່ແຮ່ ແລະ ໂລຫະກຳ, ໄດ້ຈັດຂຶ້ນໃນວັນທີ 11 ກໍລະກົດ ນີ້, ທີ່ ນະຄອນຫລວງວຽງຈັນ ລະຫວ່າງ ທ່ານ ສີມອນ ພິຈິດ ຫົວໜ້າສະຖາບັນຄົ້ນຄວ້າພະລັງງານ ແລະບໍ່ແຮ່ ແລະ ທ່ານ ຫວາງ ເຊັຍຊິນ ອະທິການບໍດີມະຫາວິທະຍາໄລວິທະຍາສາດ ແລະເຕັກໂນໂລຊີ ຄຸນໝິງ ສປ ຈີນ, ໂດຍການເຂົ້າຮ່ວມຂອງທ່ານ ທອງພັດ ອິນທະວົງ ຮອງລັດຖະມົນຕີກະຊວງພະລັງງານ ແລະບໍ່ແຮ່, ທ່ານ ວິຈິດ ຊິນດາວົງ ຮອງປະທານຄະນະກໍາມາທິການຮ່ວມມືລາວ-ຈີນ ເພື່ອແນໃສ່ສົ່ງເສີມການຮ່ວມມືໃນດ້ານພະລັງງານ, ການສຶກສາຄົ້ນຄວ້າວິທະຍາສາດ ແລະ ເຕັກໂນໂລຊີ, ການເບິ່ງແຍງທາງການແພດ ແລະການຫຼຸດຜ່ອນຄວາມທຸກຍາກ ຊຶ່ງໃນເບື້ອງຕົ້ນແມ່ນຈະເລັ່ງໃສ່ 2 ຫົວຂໍ້ຄື: ການຮ່ວມມືສ້າງບຸກຄະລາກອນ ແລະ ການສ້າງສູນຄົ້ນຄວ້າວິໄຈລາວ-ຈີນ ກ່ຽວກັບເຕັກໂນໂລຊີແບບໃຫມ່ທາງດ້ານບໍ່ແຮ່ ແລະໂລຫະກຳ ແລະ ສຶກສາອອກແບບວິສາວະກໍາໃນຂະແໜງບໍ່ແຮ່ ເຊິ່ງມາຮອດປັດຈຸບັນ ແມ່ນໄດ້ບັນລຸຂໍ້ຕົກລົງດ້ວຍການສ້າງສັນຍາຮ່ວມກັນ ວ່າດ້ວຍການສ້າງບຸກຄະລາກອນ ແລະການສ້າງສູນຄົ້ນຄວ້າວິໄຈ ໃຫ້ເປັນເຄື່ອງມືສໍາຄັນແກ່ຂະແຫນງພະລັງງານ ແລະບໍ່ແຮ່.
