ກະຊວງ ຖວທ ເຜີຍແຜ່ເອກະສານສະພາບຊາຍແດນລາວ-ກໍາປູເຈຍ
ໃນວັນທີ 12 ກໍລະກົດນີ້, ທ່ານ ສະຫວັນຄອນ ລາຊະມົນຕີ ຮອງລັດຖະມົນຕີກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ໄດ້ບັນລະຍາຍສະພາບຊາຍແດນລາວ-ກໍາປູເຈຍ ເພື່ອເຮັດໃຫ້ສະມາຊິກພັກ, ພະນັກງານ-ລັດຖະກອນພາຍໃນກະຊວງ ຖວທ ໄດ້ຮັບຮູ້ບັນຫາທີ່ເກີດຂຶ້ນໃນຊາຍແດນລາວ-ກໍາປູເຈຍ ໄດ້ຢ່າງຖືກຕ້ອງ, ເລິກເຊິ່ງ ແລະ ກວ້າງຂວາງ.
ທ່ານຮອງລັດຖະມົນຕີ ໄດ້ຍົກໃຫ້ເຫັນຄວາມເປັນມາທາງດ້ານປະຫວັດສາດແຫ່ງການພົວພັນລະຫວ່າງ ລາວ-ກໍາປູເຈຍ ທີ່ມີມູນເຊື້ອຄວາມສາມັກຄີຮັກແພງຊ່ວຍເຫລືອເຊິ່ງກັນ ແລະ ກັນມາແຕ່ບູຮານນະການ, ມີຊາຍແດນຮ່ວມກັນປະມານ 535 ກິໂລແມັດ, ເບື້ອງລາວ ມີແຂວງຈໍາປາສັກ ແລະ ແຂວງອັດຕະປື, ເບື້ອງກໍາປູເຈຍ ມີແຂວງເພຣຍວີເຮຍ, ແຂວງຊຽງແຕງ ແລະ ແຂວງລັດຕະນະຄິຣີ ເພື່ອເປັນບ່ອນອີງໃຫ້ແກ່ການຈັດຕັ້ງປະຕິບັດວຽກງານສາຍແດນ ກໍຄືການສໍາຫລວດ ແລະ ປັກຫລັກໝາຍຊາຍແດນຮ່ວມກັນ; ໃນວັນທີ 22 ພະຈິກ 1995 ຄະນະຜູ້ແທນລັດຖະບານ ຂອງສອງປະເທດ ໄດ້ພ້ອມກັນພິຈາລະນາ ແລະ ຮັບຮອງເອົາ 4 ຫລັກການພື້ນຖານນໍາກັນ,ໂດຍມີເນື້ອໃນລະອຽດ ບົນພື້ນຖານຮັບຮູ້ເຂດແດນຕິດຕໍ່ກັນ, ທີ່ສາກົນຮັບຮູ້ກ່ຽວກັບການຂີດເສັ້ນຊາຍແດນ, ການຄໍານຶງເຖິງເຂດທີ່ປະຊາຊົນຄຸ້ມຄອງຕົວຈິງ ທີ່ສືບທອດກັນມາຫລາຍເຊັ່ນຄົນແລ້ວ ແລະ ບົນພື້ນຖານຂອງຄວາມສະເໝີພາບທ່ຽງທໍາ, ສົມເຫດສົມຜົນ, ຜ່ອນສັ້ນຜ່ອນຍາວໃຫ້ກັນ, ເຄົາລົບສິດ ແລະ ຜົນປະໂຫຍດຂອງກັນ ແລະ ເປັນເອກະພາບຢ່າງສົມບູນ.
ສປປ ລາວ ແລະ ຣາຊະອານາຈັກ ກໍາປູເຈຍ ໄດ້ເລີ່ມດໍາເນີນການສໍາຫລວດທິດເນັ່ງເສັ້ນຊາຍແດນ ຢູ່ພື້ນທີ່ຕົວຈິງຮ່ວມກັນມແຕ່ປີ 2000 ເປັນຕົ້ນມາ, ເຊິ່ງສາມາດສໍາຫລວດຕົວຈິງສໍາເລັດ 465 ກິໂລແມັດ ແລະ ປັກຫລັກໝາຍຊາຍແດນຮ່ວມກັນແລ້ວ 126 ຫລັກ, ໃນນີ້ທັງສອງຝ່າຍໄດ້ຮັບຮອງເອົາແລ້ວ 121 ຫລັກ. ນັບແຕ່ຕົ້ນເດືອນກຸມພາ 2017 ເປັນຕົ້ນມາ, ບັນຫາຊາຍແດນລະຫວ່າງ ສປປ ລາວ-ກໍາປູເຈຍ ໄດ້ມີຄວາມເຄັ່ງຕຶງ ເນື່ອງຈາກກອງທະຫານຊ່າງແສງຂອງກະຊວງປ້ອງກັນປະເທດກໍາປູເຈຍ ໄດ້ສ້າງເສັ້ນທາງລຽບຕາມຈຸດຊັບຊ້ອນ ພ້ອມທັງວາງກໍາລັງເປັນຈຸດໆ ເຊິ່ງເປັນການລະເມີດຕໍ່ການຕົກລົງຂອງສອງປະເທດ ທີ່ຫ້າມບໍ່ໃຫ້ມີການກໍ່ສ້າງ ຫລື ບຸກເບີກຢູ່ບໍລິເວນຊາຍແດນ ທີ່ທັງສອງຝ່າຍຍັງບໍ່ໄດ້ສໍາຫລວດຮ່ວມກັນ; ຕໍ່ກັບບັນຫາທີ່ເກີດຂຶ້ນພັກ ແລະ ລັດຖະບານເຮົາໄດ້ພະຍາຍາມແກ້ໄຂ ໂດຍສັນຕິວິທີຕາມແນວທາງຂອງພັກ, ໂດຍມີການທັກທ້ວງ ພົບປະຫາລືຫລາຍລະດັບຕໍ່ເນື່ອງ, ຫລີກລ່ຽງການປະທະກັນດ້ວຍອາວຸດ; ພ້ອມນັ້ນ, ພັກ-ລັດຖະບານລາວເຮົາຈະສືບຕໍ່ຄົ້ນຄວ້າ, ຊອກຫາວິທີທາງເພື່ອດໍາເນີນການແກ້ໄຂຮ່ວມກັນຕາມຫລັກການ ທີ່ທັງສອງຝ່າຍໄດ້ເຫັນດີຕົກລົງກັນ ຈົນກວ່າເຂດຄົງຄ້າງຈະໄດ້ຮັບການສໍາຫລວດ ແລະ ປັກຫລັກໝາຍຢ່າງຖາວອນ.
