ແຂວງບໍ່ແກ້ວຈັບຜູ້ຄ້າຢາເສບຕິດລາຍໃຫຍ່ພ້ອມຂອງກາງຢາບ້າເກືອບ 6 ແສນເມັດມາດໍາເນີນຄະດີ
ເມື່ອບໍ່ດົນມານີ້, ທະຫານຊາຍແດນກອງຮ້ອຍ 123 ໄດ້ສົ່ງຕົວທ້າວ ແຊງໂຟ ແຊ່ຜ່ານ ອາຍຸ 62 ປີ ແລະ ທ້າວ ຈຽວຈິງ ແຊ່ຟຸ່ງ ອາຍຸ 45 ປີຢູ່ບ້ານຫ້ວຍແມງ, ເມືອງປາກທາແຂວງບໍ່ແກ້ວ ໃຫ້ເຈົ້າໜ້າທີ່ ປກສ ແຂວງບໍ່ແກ້ວເອົາຕົວໄປດໍາເນີນຄະດີຕາມລະບຽບກົດໝາຍ ໃນຂໍ້ຫາຄ້າຂາຍຢາເສບຕິດ, ພ້ອມຂອງກາງຢາບ້າເກືອບ 6 ແສນເມັດ, ໂດຍທະຫານຊາຍແດນດັ່ງກ່າວໄດ້ສົມທົບກັບອຳນາດການປົກຄອງບ້ານລົງໄປກວດກາສະຖານທີ່ສົ່ງໄສມີການຊຸກເຊື່ອງຢາເສບຕິດເປັນຈໍານວນຫລາຍຢູ່ແຄມນ້ຳໃນເຂດປ່າຊ້າບ້ານຫ້ວຍທຸຍ ເມືອງຫ້ວຍຊາຍ ແລະ ເມື່ອໄປຮອດພົບເຫັນຊາຍ 2 ຄົນທ່າທາງມີພິລຸດ ຈຶ່ງໄດ້ກັກຕົວໄວ້ ແລະ ກວດຄົ້ນຕາມບໍລິເວນປ່າແຄມນໍ້າຂອງ ພົບເຫັນຖົງເປ້ 3 ໜ່ວຍທີ່ມີຢາບ້າເກືອບ 6 ແສນເມັດ ຈຶ່ງໄດ້ກັກຕົວສົ່ງໃຫ້ເຈົ້າໜ້າທີ່ ປກສ ແຂວງ ໄປດຳເນີນຕາມລະບຽບກົດໝາຍ.
ຜ່ານການສືບສວນ-ສອບສວນພວກເຂົາໄດ້ຮັບສາລະພາບວ່າ: ໄດ້ມີຄົນຢູ່ປະເທດເພື່ອນບ້ານຈ້າງພວກຕົນຂົນຢາເສບຕິດດັ່ງກ່າວໄປສົ່ງໃຫ້ຜູ້ຮ່ວມຂະບວນການຢູ່ປະເທດທີສາມ, ແຕ່ໃນຂະນະລໍຖ້າເອົາຢາເສບຕິດໃສ່ເຮືອນັ້ນ ກໍຖືກເຈົ້າໜ້າທີ່ກັກຕົວໄດ້ກ່ອນ ແລະ ປັດຈຸບັນຄະດີຢາເສບຕິດລາຍນີ້, ເຈົ້າໜ້າທີ່ພວມເລັ່ງຂະຫຍາຍຜົນຫາຜູ້ຮ່ວມຂະບວນການມາດໍາເນີນຄະດີຕາມລະບຽບກົດໝາຍ.
