ລາວສະຫຼອງວັນປະຊາກອນໂລກປີ 2018
ໃນວັນທີ 11 ກໍລະກົດນີ້, ກະຊວງແຜນການ ແລະ ການລົງທຶນຮ່ວມກັບ ກະຊວງສາທາລະນະສຸກ ແລະ ອົງການສະຫະປະຊາຊາດກອງທຶນປະຊາກອນ (UNFPA) ໄດ້ຈັດພິທີສະເຫລີມສະຫລອງວັນປະຊາກອນໂລກປະຈໍາປີ 2018 ຄົບຮອບ 31 ປີ (11/7/1989-11/7/2018) ພາຍໃຕ້ຫົວຂໍ້: “ການວາງແຜນຄອບຄົວສໍາລັບທຸກຄົນ” ຂຶ້ນທີ່ໂຮງແຮມ ຄຣາວພາຊາ ນະຄອນຫຼວງວຽງຈັນ, ໂດຍການເຂົ້າຮ່ວມຂອງທ່ານ ກິແກ້ວ ຈະນທະບູຣີ ຮອງລັດຖະມົນຕີກະຊວງ ແຜນການ ແລະ ການລົງທຶນ ແລະ ທ່ານ ນາງ ເຟຣເດີລີກາ ເມເຍີ ຜູ້ຕາງໜ້າອົງການ ສປຊ ກອງທຶນສໍາລັບປະຊາກອນ ແລະ ມີຕາງໜ້າຈາກກະຊວງ, ທູຕານຸທູດ ແລະ ຄູ່ຮ່ວມພັດທະນາເຂົ້າຮ່ວມເປັນຈໍານວນຫຼວງຫຼາຍ.
ທ່ານຮອງລັດຖະມົນຕີກະຊວງ ແຜນການ ແລະ ການລົງທຶນ ກ່າວວ່າ: ການສະຫຼອງວັນດັ່ງກ່າວໃນປີນີ້, ມີຫົວຂໍ້ວ່າ “ການວາງແຜນຄອບຄົວສໍາລັບທຸກຄົນ” ຊຶ່ງການວາງແຜນຄອບຄົວ ບໍ່ພຽງແຕ່ສໍາລັບພໍ່-ແມ່ ຫຼືຄູ່ແຕ່ງງານເທົ່ານັ້ນ ແຕ່ມັນເໝາະສົມສໍາລັບທຸກຄົນ ໂດຍບໍ່ຈໍາກັດເພດ, ໄວ, ສະຖານະພື້ນຖານໂສດ ຫຼືແຕ່າງງານ ແລະ ສະພາບເສດຖະກິດ-ສງຄົມ ທີ່ແຕກຕ່າງກັນ. ປັດຈຸບັນ ສປປ ລາວ ກໍໄດ້ມີຄວາມຄືບໜ້າຫຼາຍໃນການປັບປຸງສຸຂະພາບຈະເລີນພັນ ແລະ ການແກ້ໄຂບັນຫາຕ່າງໆກ່ຽວຂ້ອງກັບປະຊາກອນ, ບັນດາຕົວຊີ້ວັດທີ່ກ່ຽວຂ້ອງກັບສຸຂະພາບຂອງແມ່ຍິງ, ຊາວໜຸ່ມ ແລະ ເດັກນ້ອຍໄດ້ມີຄວາມຄືບໜ້າຫຼາຍເປັນທີ່ໜ້າພໍໃຈເຊັ່ນ: ອັດຕາການຕາຍຂອງແມ່ ແລະ ເດັກໄດ້ຫຼຸດລົງຫຼາຍໃນຊຸມປີຜ່ານມາ, ໃນຂະນະດຽວກັນອັດຕາຄວາມທຸກຍາກໃນຊົນຊະບົດກໍໄດ້ຫຼຸດລົງຢ່າງຕໍ່ເນື່ອງ. ອີງຕາມການສໍາຫຼວດດັດສະນີໝາຍທາງດ້ານສັງຄົມຂອງລາວ (LSIS II) ຫຼ້າສຸດໄດ້ສະແດງໃຫ້ເຫັນວ່າ ການນໍາໃຊ້ຢາຄຸມກໍາເນີດແບບທັນສະໄໝສໍາລັບແມ່ຍິງທີ່ແຕ່ງງານໃນອາຍຸ 15-49 ປີ ເພີ່ມຂຶ້ນຊັກຊ້າ, ແຕ່ປີ 2011-2017 ເພີ່ມຂຶ້ນ 42% ເທົ່ານັ້ນ, ສໍາລັບກຸ່ມຄົນທີ່ຢູ່ໃນຊ່ວງອາຍຸ 15-19 ປີ ແລະ ແມ່ຍິງທີ່ຍັງບໍ່ທັນໄດ້ແຕ່ງງານສ່ວນໃຫຍ່ 75% ແມ່ນຍັງບໍ່ທັນສາມາດເຂົ້າເຖິງການບໍລິການວາງແຜນຄອບຄົວໄດ້ເທື່ອ. ນອກນັ້ນ, ອັດຕາການເກີດລູກຂອງຍິງໝຸ່ມອາຍຸ 15-19 ປີ ຢູ່ເຂດຊົນນະບົດ ຍັງສູງເຖິງ 136 ຄົນຕໍ່ການເກີດ 1.000 ຄົນ ທຽບກັບອັດຕາສະເລ່ຍໃນທົ່ວປະເທດ 83 ຄົນຕໍ່ການເກີດ 1.000 ຄົນ. ສະນັ້ນ, ເພື່ອເຮັດໃຫ້ອັດຕາດັ່ງກ່າວຫຼຸດລົງຕາມແຜນທີ່ວາງໄວ້ ມີຄວາມຈໍາເປັນຕ້ອງໄດ້ລົງທຶນຢ່າງເໝາະສົມເຂົ້າໃນຂະແໜງການດັ່ງກ່າວ ຕາມທີ່ລັດຖະບານໄດ້ກໍານົດໄວ້ 9% ໃນຂະແໜງສາທາລະນະສຸກ.
ໃນໂອກາດດຽວກັນນີ້, ທ່ານ ນາງ ເຟຣເດີລີກາ ເມເຍີ ໄດ້ກ່າວວ່າ: ອົງການUNFPA ໄດ້ໃຫ້ການສະໜັບສະໜູນ ສປປ ລາວ ໃນຂົງເຂດວຽກງານແຜນຄອບຄົວ ມາແຕ່ປີ 1995 ຫຼັງຈາກກອງປະຊຸມ ICPD ໄດ້ມີຄວາມຄືບໜ້າຫຼາຍດ້ານ ໂດຍສະເພາະກິດຈະກໍາການສະໜອງຂໍ້ມູນ ແລະ ບໍລິການວາງແຜນຄອບຄົວສາມາດເຂົ້າເຖິງຫຼາຍສົມຄວນ. ຢ່າງໃດກໍຕາມເມື່ອສັງເກດຈາກຜົນສຳຫຼວດດັດສະນີໝາຍສັງຄົມລາວ (LSIS) ເຫັນວ່າຍັງບໍ່ສາມາດເຂົ້າເຖິງທຸກຄົນໄດ້ເທື່ອ ເພື່ອບັນລຸຕາມເປົ້າໝາຍການພັດທະນາແບບຍືນຍົງ (SDGs), ເພື່ອຮັບປະກັນການພັດທະນາທີ່ມີຄວາມເທົ່າທຽມ ແລະ ມີສ່ວນຮ່ວມຂອງທຸກຄົນໂດຍບໍ່ປ່ອຍປະຜູ້ໃດໄວ້ທາງຫຼັງ. ດັ່ງນັ້ນ, ຕ້ອງໄດ້ເພີ່ມທະວີຄວາມພະຍາຍາມໃຫ້ຫຼາຍຂຶ້ນ ໂດຍສຸມໃສ່ການໂຄສະນາປຸກລະດົມພ້ອມທັງສະແດງໃຫ້ເຫັນການຈັດຕັ້ງປະຕິບັດແຜນງານສົ່ງເສີມດ້ານສຸຂະພາບ ແລະ ການວາງແຜນຄອບຄົວຂອງຂັ້ນທ້ອງຖິ່ນ.
