ຍີ່ປຸ່ນຢືນຢັນຈະໃຫ້ການສະໜັບສະໜູນປັບປຸງໂຄງລ່າງຊົນລະປະທານໃນອ່າງແມ່ນໍ້າຂອງ

ເມື່ອມໍ່ໆມານີ້, ລັດຖະບານຢີ່ປຸ່ນໄດ້ຢືນຢັນຄືນ​ຕໍ່ຄະນະກຳມາທິການແມ່ນໍ້າຂອງສາກົນ (ຄມ​ສ) ໃນການສືບຕໍ່ໃຫ້ການຊ່ວຍເຫລືອປັບປຸງໂຄງລ່າງຊົນລະປະທານຂອງບັນດາປະເທດອ່າງແມ່ນໍ້າຂອງຕອນລຸ່ມ, ເຊິ່ງ​ລວມມີ: ກຳປູເຈຍ, ສປປ ລາວ, ຣາຊະອານາຈັກໄທ ແລະ ສສ.ຫວຽດນາມ, ຊຶ່ງການຢັ້ງຢືນນີ້ໄດ້ມີຂຶ້ນຢູ່ໃນກອງປະຊຸມລະຫວ່າງຫົວໜ້າກອງເລຂາຄະນະກຳມາທິການແມ່ນໍ້າຂອງສາກົນ ແລະ ຜູ້ຕາງໜ້າກະຊວງກະສິກຳ, ປ່າໄມ້ ແລະ ການປະມົງຂອງປະເທດຢີ່ປຸ່ນເມື່ອບໍ່ດົນນີ້ທີ່ນະຄອນຫລວງວຽງຈັນ ໂດຍລະບຸວ່າ: ລັດຖະບານຢີ່ປຸ່ນ ຈະໃຫ້ການສະໜັບສະໜູນໂຄງການດັ່ງກ່າວ ແລະ ບັນດາກິດຈະກຳທີ່ກ່ຽວຂ້ອງຊຶ່ງພວມດຳເນີນຢູ່ ໂດຍຕ້ອງການງົບປະມານຈຳນວນ 1,4 ລ້ານໂດລາສະຫະລັດ, ເພື່ອຈະຈັດຕັ້ງປະຕິບັດໃນໄລຍະເວລາ 4 ປີ (2017-2021) ເພື່ອປັບປຸງໂຄງລ່າງຊົນລະປະທານທີ່ເປັນມິດກັບການເຄື່ອນຍ້າຍຂອງປາ ແລະ ໂຄງການຕິດຕາມການປ່ຽນແປງການນຳໃຊ້ທີ່ດິນກະສິກຳ, ການປັບປຸງຖານຂໍ້ມູນຊົນລະປະທານຂອງ ຄມສ, ສະໜັບ​ສະ​ໜູນການນຳໃຊ້ນໍ້າໃຕ້ດິນທີ່ຍືນ​ຍົງ ແລະ ການຄຸ້ມຄອງການຜະລິດພືດໃນທົ່ວອ່າງຕອນລຸ່ມ ເພື່ອແນໃສ່ຕອ​ບສະໜອງຄວາມຕ້ອງການຂອງການຂະຫຍາຍຊົນລະປະທານ ແລະ ຮັບມືກັບສິ່ງທ້າທາຍໃນການນໍາໃຊ້ນໍ້າໃນອ່າງແມ່ນໍ້າຂອງຕອນລຸ່ມໃຫ້ຍືນ​ຍົງ.

ທ່ານ ຟາມ ຕວນ ພານ ຫົວໜ້າກອງເລຂາຄະນະກຳມາທິການແມ່ນໍ້າຂອງສາກົນ ​ກ່າວ​ວ່າ: ການສະ​ໜັບ​ສະ​ໜູນຂອງລັດຖະບານຢີ່ປຸ່ນ ຈະຊ່ວຍສ້າງປະສິດທິພາບໃນການວາງແຜນຊົນລະປະທານ ແລະ ຊຸກຍູ້ການປັບປຸງຊີວິດການເປັນຢູ່ ແລະ ຫລຸດຜ່ອນຜົນກະທົບທາງສິ່ງແວດລ້ອມຈາກຊົນລະປະທານໃນອ່າງແມ່ນໍ້າຂອງ. ນັບແຕ່ປີ 2001 ເປັນ​ຕົ້ນ​ມາ, ລັດຖະບານຢີ່ປຸ່ນໄດ້ໃຫ້ທຶນຊ່ວຍເຫລືອລ້າຫລາຍກວ່າ 13 ລ້ານໂດລາສະຫະລັດໃຫ້ຫລາຍໂຄງການ, ລວມທັງ​ວຽກ​ງານການຄຸ້ມຄອງນໍ້າຖ້ວມ ແລະ ແຫ້ງແລ້ງ, ຊົນລະປະທານ, ການເດີນເຮືອ, ການປ່ຽນແປງດິນຟ້າອາກາດ ແລະ ການຄຸ້ມຄອງສິ່ງແວດລ້ອມ. ພາຍໃຕ້ການສະ​ໜັບ​ສະ​ໜູນທາງດ້ານການເງິນດັ່ງກ່າວເຊື່ອໝັ້ນວ່າຈະສາມາດສ້າງຄວາມເຂັ້ມແຂງໃຫ້ການພັດທະນາເສດຖະກິດ ໂດຍຜ່ານວຽກງານກະສິກຳ ແລະ ຊົນລະປະທານທີ່ເປັນແຫລ່ງລາຍຮັບ ແລະ ແຫ່ລງສະບຽງອາຫານຂອງຄົນຫລາຍລ້ານຄົນ.