ດອກປີກໄກ່ຝຶກຊ້ອມກຽມຄວາມພ້ອມ ເຂົ້າຮ່ວມໃນງານກິລານັກຮຽນອາຊຽນ
ອາທິດຜ່ານມາ ທີ່ສະໜາມກິລາແຫ່ງຊາດ (ຫຼັກ 16), ທ່ານ ພຸດລຳໄພ ທຽບພະສອນ ຫົວໜ້າພະແນກພະລະ-ສຶກສາ ແລະ ສຶກສາປ້ອງກັນຊາດ-ປ້ອງກັນຄວາມສະຫງົບ ກົມພະລະ ແລະ ສິລະປະສຶກສາ ກະຊວງສຶກສາທິການ ແລະ ກິລາ ທັງເປັນຄະນະກອງເລຂາທັບນັກກິລານັກຮຽນລາວທີ່ຈະເຂົ້າຮ່ວມງານມະຫະກຳກິລານັກຮຽນອາຊຽນ ໄດ້ລົງຕິດຕາມ, ຊຸກຍູ້ ແລະ ໃຫ້ກຳລັງໃຈທັບນັກກິລາດອກປີກໄກ່ລາວທີ່ກຳລັງເກັບຕົວເຝິກຊ້ອມ.
ທ່ານ ບຸນຍະແສງ ນະຊຽງຄຳ ຄູຝຶກກິລາດອກປີກໄກ່ ໄດ້ກ່າວວ່າ: ປັດຈຸບັນການເຝິກຊ້ອມຂອງພວກເຮົາໄດ້ດໍາເນີນມາເປັນເວລາ 5-6 ອາທິດແລ້ວ ເຊິ່ງສາມາດປະເມີນໄດ້ຄວາມພ້ອມຂອງນັກກິລາປະມານ 80-85% ໂດຍໄດ້ເນັ້ນໜັກກ່ຽວກັບເລື່ອງລະບົບຂອງການຫລິ້ນ ແລະ ຮູບເກມການຫລິ້ນ ເພື່ອໃຊ້ເປັນກົນລະຍຸດໃນການເຂົ້າຮ່ວມແຂ່ງຂັນໃນຄັ້ງນີ້.
ສຳລັບການເຂົ້າຮ່ວມແຂ່ງຂັນງານມະຫະກຳກິລານັກຮຽນອາຊຽນ ຄັ້ງທີ 10 ທີ່ປະເທດມາເລເຊຍ, ສະຫະພັນດອກປີກໄກ່ແຫ່ງຊາດລາວ ຈະສົ່ງນັກກິລາເຂົ້າຮ່ວມແຂ່ງຂັນທັງໝົດ 11 ຄົນ, ຍິງ 4 ຄົນ ໃນ 7 ລາຍການຄື: ທີມຊາຍ-ຍິງ, ດ່ຽວຊາຍ-ຍິງ, ຄູ່ຊາຍ-ຍິງ ແລະ ຄູ່ປະສົມ.
