ອາເຊນອລ ຕັດຫນ້າ ສະເປີ ຄວ້າ ລູຄັສ ຕໍຣເຣຣ້າ ກອງກາງທິມຊາດອູຣູໄກວ ເຊັນສັນຍາ 5 ປີ
ອາເຊນອລ ຄວ້າ ລູຄັສ ຕໍຣເຣຣ້າ ກອງກາງທີມຊາດອູຣູໄກວ ຊຸດບານໂລກ 2018 ຈາກສະໂມສອນ ຊາມໂດເຣຍ ດ້ວຍຄ່າຕົວປະມານ 26 ລ້ານ 5 ແສນປອນ ເຊັນສັນຍາ 5 ປີ.
ປັດຈຸບັນ ລູຄັສ ຕໍຣເຣຣ້າ ອາຍຸ 22 ປີ ມີຄວາມສູງ 168 ຊັງຕີແມັດ, ເຖິງຮູບຮ່າງນ້ອຍ ແຕ່ມີຄວາມໄວ ແລະ ຄວາມແຂງແກ່ນ. ຕໍຣເຣຣ້າ ຢູ່ກັບ ຊາມໂດເຣຍ (Sampdoria) ໃນປີ 2015-18 ແລະ ເຄີຍຖືກປ່ອຍໃຫ້ ເປສຄາຣາ (Pescara) ໄລຍະຫນຶ່ງ, ລົງຫລິ້ນໃຫ້ ຊາມໂດເຣຍ 74 ນັດ, ຍິງໄດ້ 4 ປະຕູ.
ຕໍຣເຣຣ້າ ເປັນນັກເຕະຄົນທີ 7 ທີ່ປືນໃຫຍ່ ອາເຊນອລ ເສີມທັບກ່ອນລະດູການໃຫມ່ ຕໍ່ຈາກ Karl Jakob Hein ຜູ້ຮັກສາປະຕູຊາວເອັສໂຕເນຍ, Stephan Lichtsteiner ກອງຫລັງປະສົບການສູງທີມຊາດສະວິສ ຈາກຢູເວນຕຸສ, Bernd Leno ຜູ້ຮັກສາປະຕູຊາວເຢຍລະມັນຈາກໄບເອີເລເວີຄູເຊັນ, Sokratis Papastathopoulos ກອງຫລັງຊາວເກຣັກ ຈາກໂບຣຸສເຊຍ ດ໋ອດມຸນ, Sam Greenwood ກອງຫນ້າຈາກຊັນເດີແລນ ແລະ Matteo Guendouzi ກອງກາງຊາວຝຣັ່ງໄວ 19 ປີ ຈາກລໍລີຢ໋ອງ.
