ກອງປະຊຸມພົບປະຜູ້ຊົງຄຸນວຸທິບັນດາຊົນເຜົ່າທົ່ວປະເທດ ຄັ້ງທີ 3 ຈະຈັດຂຶ້ນໃນຕົ້ນເດືອນສິງຫາ
ສູນກາງແນວລາວສ້າງຊາດ ຈະຈັດກອງປະຊຸມ ພົບປະຜູ້ຊົງຄຸນວຸທິ ບັນດາຊົນເຜົ່າທົ່ວປະເທດ ຄັ້ງທີ 3 ປະຈຳປີ 2018 ໃນລະຫວ່າງວັນທີ 10-14 ສິງຫາ ທີ່ຈະມາເຖິງ ທີ່ຫໍປະຊຸມແຫ່ງຊາດ ນະຄອນຫລວງວຽງຈັນ ພາຍໃຕ້ຫົວຂໍ້ “ເສີມຂະຫຍາຍ ບົດບາດຂອງຜູ້ຊົງຄຸນວຸທິ ບັນດາຊົນເຜົ່າທົ່ວປະເທດ ໃນການເຕົ້າໂຮມຄວາມສາມັກຄີ ປອງດອງ ປະຊາຊົນບັນເຜົ່າ ເຂົ້າຮ່ວມພາລະກິດປົກປັກຮັກສາ ແລະ ພັດທະນາປະເທດຊາດ’’ ເຊິ່ງພິທີເປີດກອງປະຊຸມຢ່າງເປັນທາງການ ຈະໄດ້ຈັດຂຶ້ນໃນວັນທີ 13 ສິງຫາ ກົງກັບວັນສ້າງຕັ້ງສູນກາງແນວລາວສ້າງຊາດ ແລະ ວັນສ້າງຕັ້ງສື່ມວນຊົນ ຄົບຮອບ 68 ປີ (13/8/1950-13/8/2018).
ທ່ານ ຈັນທະວົງ ແສນອາມາດມົນຕີ ຮອງປະທານສູນກາງແນວລາວສ້າງຊາດ ໄດ້ຖະແຫລງຂ່າວຕໍ່ສື່ມວນຊົນ ໃນວັນທີ 6 ກໍລະກົດ 2018 ທີ່ສູນຝຶກອົບຮົມແນວລາວສ້າງຊາດວ່າ: ກອງປະຊຸມໃນຄັ້ງນີ້ ຈະໄດ້ພ້ອມກັນປຶກສາຫາລືໃນຫລາຍບັນຫາທີ່ພົ້ນເດັ່ນ ໂດຍສະເພາະ ຈະໄດ້ຕີລາຄາການຈັດຕັ້ງປະຕິບັດມະຕິກອງປະຊຸມ ພົບປະຜູ້ຊົງຄຸນວຸທິ ບັນດາເຜົ່າທົ່ວປະເທດ ຄັ້ງທີ 2 ປີ 2015 (2015-2018) ແລະ ທິດທາງ, ໜ້າວຽກຈຸດສຸມແຕ່ປີ 2018-2020; ບົດປະກອບຄຳເຫັນຂອງສະພາແຫ່ງຊາດ; ບົດປະກອບຄຳເຫັນຂອງລັດຖະບານ; ສຽງແຄນເຊື້ອຊາດລາວ ມໍລະດົກໂລກ; ບົດບາດຂອງນັກທຸລະກິດ ຕໍ່ການແກ້ໄຂຄວາມທຸກຍາກຂອງປະຊາຊົນ ບ້ານຄຳປາແໜ ເມືອງຈຳພອນ ແຂວງສະຫວັນນະເຂດ; ບົດບາດຂອງຜູ້ຊົງຄຸນວຸທິ ຕໍ່ການຈັດສັນຍົກຍ້າຍພູມລຳເນົາ ແລະ ອາຊີບຂອງບັນດາເຜົ່າຕິດພັນ ກັບການແກ້ໄຂຄວາມທຸກຍາກ; ບົດບາດສາສະໜາຕ່າງໆ ໃນການເຜີຍແຜ່ສິນລະທຳຄຳສອນ ແລະ ການປະກອບສ່ວນຊ່ວຍເຫລືອສັງຄົມ; ການສ້າງບ້ານສາມັກຄີ ຕິດພັນກັບການສ້າງບ້ານພັດທະນາ ແລະ ການແກ້ໄຂຄວາມທຸກຍາກ; ຄູກັບການພັດທະນາການສຶກສາ; ການຢອດຢາ ແລະ ສັກຢາກັນພະຍາດ, ໂພຊະນາການ, ການປ້ອງກັນພະຍາດ ແລະ ການປິ່ນປົວພະຍາດລະບາດ ຍັງເປັນສິ່ງທ້າທ້າຍໃນປັດຈຸບັນ; ຄົນເຊື້ອຊາດລາວ ທີ່ຢູ່ຕ່າງປະເທດຕໍ່ກັບ ການພັດທະນາ ປະເທດຊາດ, ການອະນຸລັກ ແລະ ສົ່ງເສີມວັດທະນະທຳ ຂອງຊາດລາວເປັນຕົ້ນ.
ທ່ານ ຈັນທະວົງ ແສນອາມາດມົນຕີ ໃຫ້ຮູ້ອີກວ່າ: ກອງປະຊຸມ ພົບປະຜູ້ຊົງຄຸນວຸທິ ບັນດາຊົນເຜົ່າທົ່ວປະເທດ ຄັ້ງທີ 3 ນີ້ ແມ່ນເພື່ອເສີມຂະຫຍາຍມູນເຊື້ອ ຄວາມສາມັກຄີ ປອງດອງຂອງປະຊາຊົນ ບັນດາເຜົ່າ, ຍົກສູງບົດບາດຜູ້ຊົງຄຸນວຸດທິບັນດາເຜົ່າ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ.
