ລາວ-ຈີນແລກປ່ຽນຄວາມຮູ້ວຽກງານວາງແຜນຍຸດທະສາດພັດທະນາເສດຖະກິດ

ພິທີປິດຊຸດອົບຮົມການວາງແຜນ ແລະ ການສ້າງຍຸດທະສາດດ້ານການພັດທະນາເສດຖະກິດໃຫ້ແກ່ພະນັກງານກ່ຽວຂ້ອງຂອງ ສປປ ລາວ ໄດ້ມີຂຶ້ນໃນທ້າຍອາທິດຜ່ານມານີ້, ພາຍຫລັງດໍາເນີນມາແຕ່ວັນທີ 19 ມິຖຸນາຫາ 5 ກໍລະກົດທີ່ສູນຝຶກອົບຮົມແນວລາວສ້າງຊາດນະຄອນຫລວງວຽງຈັນ. ໂດຍມີທ່ານທ່ານ ໄຊຊະນະ ສິດທິພອນ ຫົວໜ້າຫ້ອງການຄະນະກໍາມະການຮ່ວມມືລາວ-ຈີນ, ທ່ານ ບຸນຈອມ ວົງເພັດ ຫົວໜ້າສູນຝຶກອົບຮົມແນວລາວສ້າງຊາດ, ພ້ອມດ້ວຍນັກສໍາມະນາກອນ 50 ກວ່າທ່ານເຂົ້າຮ່ວມ.
ຫົວໜ້າຫ້ອງການຄະນະກໍາມະການຮ່ວມມືລາວ-ຈີນ ໃຫ້ຮູ້​ວ່າ: ຊຸດອົບຮົມດັ່ງກ່າວ, ແມ່ນກະຊວງການຄ້າ ສປ ຈີນຮ່ວມກັບສູນຝຶກອົບຮົມພະນັກງານເສດຖະກິດ-ການຄ້າສາກົນ, ສູນຝຶກອົບຮົມແນວລາວສ້າງຊາດ ແລະ ຫ້ອງການຄະນະກໍາມະການຮ່ວມມືລາວ-ຈີນ ຈັດຂຶ້ນ, ເພື່ອປະຕິບັດຕາມການຕົກລົງເຫັນດີຂອງລັດຖະບານສອງປະເທດໃນການແລກປ່ຽນບົດຮຽນ ແລະ ປະສົບການຕົວຈິງ ໃນການວາງແຜນ ແລະ ສ້າງຍຸດທະສາດຂອງຈີນໃນແຕ່ລະໄລຍະ ແລະ ບັນດາຜົນສຳເລັດດ້ານຕ່າງໆຂອງ ສປ ຈີນ ໃນການພັດທະນາ ແລະ ສ້າງສາປະເທດຊາດ, ພາຍຫລັງໄດ້ດຳເນີນນະໂຍບາຍການປະຕິຮູບ ແລະ ເປີດປະຕູສູ່ພາຍນອກຕາມສີສັນຂອງຈີນນັບແຕ່ປີ 1978-2018 ເປັນຕົ້ນມາ, ໂດຍສະເພາະແມ່ນດ້ານນະໂຍບາຍ, ກົນໄກໃນການຄຸ້ມຄອງ, ຕິດຕາມກວດກາ ແລະປະເມີນຜົນແຜນການ, ການເຊື່ອມໂຍງຂອງຈີນກັບສາກົນ ແລະ ພາກພື້ນໃນແຕ່ລະໄລຍະ, ຄວາມຄືບໜ້າ ແລະ ທິດທາງພັດທະນາ “ໜຶ່ງແລວໜຶ່ງເສັ້ນທາງ”, ປະສົບການທີ່ຈີນດຶງດູດເອົາການລົງທຶນຈາກຕ່າງປະເທດ ແລະ ການລົງທຶນພາຍນອກຂອງ ສປ ຈີນ ແລະ ອື່ນໆ ເພື່ອຍົກລະດັບຄວາມຮູ້ຄວາມສາມາດດ້ານວິຊາການໃຫ້ພະນັກງານ ກໍຄືນັກສຳມະນາກອນໃນຂະແໜງແຜນການຂອງ ສປປ ລາວ ຢູ່ຂັ້ນສູນກາງ ແລະ ທ້ອງຖິ່ນໄດ້ນຳເອົາບົດຮຽນ ແລະ ປະສົບການດັ່ງກ່າວມາໝູນໃຊ້ໃຫ້ສອດຄ່ອງກັບສະພາບເງື່ອນໄຂຕົວຈິງໃນການພັດທະນາເສດຖະກິດ-ສັງຄົມ, ສູ້ຊົນເຮັດໃຫ້ປະເທດລາວຫລຸດພົ້ນອອກຈາກສະພາວະປະເທດດ້ອຍພັດທະນາຕາມເປົ້າໝາຍວາງໄວ້.