ພະນັກງານຫລັກແຫລ່ງກະຊວງ ຖວທ ເຊື່ອມຊຶມຄຳສັ່ງຂອງພັກ
ໃນວັນທີ 4 ກໍລະກົດນີ້ທີ່ຫໍວັດທະນະທຳແຫ່ງຊາດ, ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ໄດ້ຈັດເຊື່ອມຊຶມຄຳສັ່ງຂອງກົມການເມືອງສູນກາງພັກ, ໂດຍການເປັນປະທານຂອງສະຫາຍ ບໍ່ແສງຄຳ ວົງດາລາ ເລຂາຄະນະພັກ, ລັດຖະມົນຕີກະຊວງ ຖວທ, ມີບັນດາຮອງລັດຖະມົນຕີ, ຄະນະປະຈຳພັກ, ຄະນະພັກຮາກຖານ ແລະ ຄະນະໜ່ວຍພັກ, ພ້ອມດ້ວຍສະມາຊິກພັກທົ່ວກະຊວງ ຖວທ ເຂົ້າຮ່ວມຢ່າງພ້ອມພຽງ.
ໃນໂອກາດດັ່ງກ່າວ, ສະຫາຍ ບໍ່ແສງຄຳ ວົງດາລາ ໄດ້ເຜີຍແຜ່ຄຳສັ່ງຂອງຄະນະເລຂາທິການສູນກາງພັກສະບັບເລກທີ 04/ຄລສພ, ລົງວັນທີ 07 ພຶດສະພາ 2018 ວ່າດ້ວຍການກະກຽມດຳເນີນກອງປະຊຸມໃຫຍ່ອົງຄະນະພັກກະຊວງ-ອົງການ, ແຂວງ-ນະຄອນຫລວງ, ອົງຄະນະພັກເມືອງ ແລະ ຮາກຖານໃນຂອບເຂດທົ່ວປະເທດ, ເຊິ່ງໄດ້ຍົກໃຫ້ເຫັນຈຸດປະສົງລະດັບຄາດໝາຍບາງເນື້ອໃນວ່າ: ການດຳເນີນກອງປະຊຸມໃຫຍ່ຂອງພັກແຕ່ລະຂັ້ນ ເປັນການປັບປຸງພາຍໃນພັກໃຫ້ມີຄວາມໜັກແໜ້ນເຂັ້ມແຂງ, ເພື່ອຍົກສູງຄວາມສາມາດນຳພາຂອງຄະນະພັກໃຫ້ສົມຄູ່ກັບການເລັ່ງທວງຂອງໜ້າທີ່ການເມືອງໃນໄລຍະໃໝ່, ຮັບປະກັນການຄົ້ນຄວ້າເລືອກເຟັ້ນບຸກຄະລາກອນ ປະກອບເຂົ້າໃນຄະນະພັກແຕ່ລະຂັ້ນໃຫ້ຖືກຕ້ອງຕາມມາດຕະຖານ, ເງື່ອນໄຂທີ່ໄດ້ກຳນົດໄວ້, ພ້ອມນີ້ ເພື່ອຍູ້ແຮງຂະບວນການແຂ່ງຂັນວຽກງານຮອບດ້ານທົ່ວອົງຄະນະພັກ, ປຸກລະດົມພະນັກງານສະມາຊິກພັກ, ປະຊາຊົນ ແລະ ຊັ້ນຄົນຕ່າງໆເຂົ້າຮ່ວມຂະບວນການແຂ່ງຂັນຮັກຊາດ ແລະ ພັດທະນາໃຫ້ກາຍເປັນຂະບວນຟົດຟື້ນ ແລະ ຕໍ່ເນື່ອງ.
ບັນດາຜູ້ເຂົ້າຮ່ວມຍັງໄດ້ຮັບຟັງການເຜີຍແຜ່ເອກະສານຕ່າງໆ ເປັນຕົ້ນ: ຄຳສັ່ງຂອງກົມການເມືອງສູນກາງພັກສະບັບເລກທີ 04/ກມສພ ລົງວັນທີ 03 ມັງກອນ 2018 ວ່າດ້ວຍການເພີ່ມທະວີກໍ່ສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ, ມະຕິກົມການເມືອງສູນກາງພັກສະບັບເລກທີ 032/ກມສພ ລົງວັນທີ 03 ມັງກອນ 2018 ວ່າດ້ວຍວຽກງານສ້າງແຜນກຳນົດພະນັກງານນຳພາ-ຄຸ້ມຄອງ, ເອກະສານສະບັບເລກທີ 030/ກມສພ ລົງວັນທີ 03 ມັງກອນ 2018 ວ່າດ້ວຍມາດຕະຖານຂອງພະນັກງານນຳພາ-ຄຸ້ມຄອງ ແລະ ເອກະສານສະບັບເລກທີ 031/ກມສພ ລົງວັນທີ 03 ມັງກອນ 2018 ວ່າດ້ວຍວຽກງານຄຸ້ມຄອງພະນັກງານ.
