ມະຫາວິທະຍາໄລແຊ່ງຊາດພັດທະນາລະບົບລົງທະບຽນເສັ່ງເຂົ້າຮຽນແບບອອນລາຍ

ທ່ານ ສົມສີ ຍໍພັນໄຊ ວ່າການ ອະທິການບໍດີມະຫາວິທະຍາໄລແຫ່ງຊາດ ໄດ້ໃຫ້ຮູ້ວ່າ: ສົກຮຽນ 2018-2019 ນີ້, ມະຫາວິທະຍາໄລແຫ່ງຊາດ (ມຊ) ໄດ້ມີການພັດທະນາລະບົບລົງທະບຽນສອບເສັງແບບໃໝ່ ແທນການຂາຍແບບຟອມ, ຊຶ່ງເປັນລະບົບສະໝັກລົງທະບຽນແບບອອນລາຍ, ໂດຍນັກຮຽນ ຫຼືຜູ້ສະໝັກ ສາມາດໃຊ້ໂທລະສັບມືຖື ຫຼືເຄື່ອງຄອມພິວເຕີ ຜ່ານອິນເຕີເນັດ ເພື່ອລົງທະບຽນໄດ້ແຕ່ວັນທີ 16 ກໍລະກົດ ນີ້ເປັນຕົ້ນໄປ, ຫຼັງຈາກສະໝັກແລ້ວ ຈະໄດ້ຮັບລະຫັດລົງທະບຽນ ແລະ ເຂົ້າມາເອົາບັດເຂົ້າຫ້ອງສອບເສັງຢູ່ສະໂມສອນໃຫຍ່ ມະຫາວິທະຍາໄລແຫ່ງຊາດໄດ້ ນັບແຕ່ວັນທີ 23 ກໍລະກົດ ເຖິງວັນທີ 22 ສິງຫາ 2018,  ພ້ອມທັງກະກຽມເອກະສານໃຫ້ຄົບຖ້ວນຕາມເງື່ອນໄຂ, ສ່ວນລາຍລະອຽດຂອງການປະກອບເອກະສານ ແມ່ນເຂົ້າເບິ່ງໄດ້ທີ່ເວັບໄຊທ໌ ລົງທະບຽນສອບເສັງອອນລາຍ: http://entrance.nuol.edu.la. ສ່ວນມື້ສອບເສັງເປັນທາງການ ແມ່ນວັນທີ 25 ສິງຫາ 2018.

ຖ້າຫາກຜູ້ສະໝັກມີຂໍ້ສົງໄສ ຫຼືບໍ່ເຂົ້າໃຈໃນຂັ້ນຕອນການສະໝັກລົງທະບຽນແບບອອນລາຍນີ້ ສາມາດສອບຖາມມາຍັງສາຍຕົງ ເບີ 020 5466 5499, 020 9999 3282, 020 5561 4888 ຫຼືອອນລາຍມາໄດ້ທີ່ Facebook ຂ່າວສານ ມຊ: @NUOLOFFICIAL. ວິທີການສະໝັກແບບໃໝ່ນີ້ ຈະຊ່ວຍອໍານວຍຄວາມສະດວກໃຫ້ແກ່ຜູ້ສະໝັກທຸກຄົນ ສາມາດສະໝັກສອບເສັງໄດ້ງ່າຍຂຶ້ນ, ທັງເປັນການປະຢັດເວລາໃນການເດີນທາງ ແລະ ບໍ່ຈໍາເປັນຕ້ອງມາຫຼາຍຄັ້ງ.