ລາວຍັງຫາໄຊຊະນະບໍ່ໄດ້ ຫລັງເສຍໃຫ້ ໄທ 3-0 ມີໂອກາດຕົກຮອບສູງ
ວັນທີ 3 ກໍລະກົດນີ້ ນັກກິລາທີມຊາດລາວ ລົງສະໜາມຄັ້ງທີ 2 ຍັງຫາໄຊຊະນະບໍ່ໄດ້ ຫລັງເສຍໃຫ້ແກ່ ທີມຊາດໄທ 3-0 ຂອງການແຂ່ງຂັນບານເຕະຊີງແຊ້ມອາຊຽນ ຮຸ້ນອາຍຸ 19 ປີ AFF U19 CHAMPIONSHIP 2018 ຈັດຂຶ້ນໃນລະຫວ່າງວັນທີ 1-14 ກໍລະກົດນີ້.
ການແຂ່ງຂັນບານເຕະຊີງແຊ້ມອາຊຽນ ຮຸ້ນອາຍຸ 19 ປີ AFF U19 CHAMPIONSHIP 2018 ມີ 11 ປະເທດເຂົ້າຮ່ວມ ແບ່ງອອກເປັນ 2 ກຸ່ມຄື: ກຸ່ມເອ ປະກອບມີ: ໄທ, ອິນໂດເນເຊຍ, ຫວຽດນາມ, ສິງກະໂປ, ລາວ ແລະ ຟີລິບປິນ; ສ່ວນກຸ່ມບີ ປະກອບມີ: ມາເລເຊຍ, ມຽນມາ, ຕີມໍ ເລສເຕ, ກຳປູເຈຍ ແລະ ບຣູໄນ.
ຂະນະທີ່ຜົນການແຂ່ງຂັນໃນກຸ່ມດຽວກັນ ທີມຊາດຫວຽດນາມ ຊະນະ ຟີລິບປິນ 5-0
ແລະ ທີມຊາດອິນໂດເນເຊຍ ຊະນະ ທີມຊາດສິງກະໂປ 4-0. ສໍາລັບຕາຕະລາງການແຂ່ງຂັນຂອງທີມຊາດລາວ ຍັງອີກ 2 ຄັ້ງຄື: ວັນທີ 7 ກໍລະກົດ ເວລາ 15:30 ໂມງ ພົບກັບ ທີມຊາດສິງກະໂປ, ວັນທີ 9 ກໍລະກົດ ເວລາ 15:30 ໂມງ ພົບກັບ ທີມຊາດຟີລິບປິນ.
