ຕາງໜ້າບັນດາສື່ຈາກແມ່ນ້ຳຂອງ-ແມ່ນ້ຳລ້ານຊ້າງປະກອບຄຳເຫັນ ໃນກອງປະຊຸມຄົບຄະນະສຸດຍອດສື່ມວນຊົນ

​ແຫ​ລ່ງຂ່າວ ຂປລ ລາຍ​ງານ​ວ່າ : ຕາງໜ້າບັນດາສື່ມວນຊົນຈາກ 6 ປະເທດ ແມ່ນ້ຳຂອງ-ແມ່ນ້ຳລ້ານຊ້າງ ມີ ກຳປູເຈຍ, ຈີນ, ລາວ, ໄທ, ມຽນມາ ແລະ ຫວຽດນາມ ໄດ້ຂຶ້ນປະກອບຄຳເຫັນ ໃນກອງປະຊຸມ ຄົບຄະນະ ສຸດຍອດສື່ມວນຊົນ ໃນຂອບການຮ່ວມມື ແມ່ນ້ຳຂອງ-ແມ່ນ້ຳລ້ານຊ້າງ ພາຍໃຕ້ຫົວຂໍ້ “ການຮ່ວມມືໃນປະຊາຄົມແມ່ນ້ຳຂອງ-ແມ່ນ້ຳລ້ານຊ້າງ ເພື່ອແສງສະຫວ່າງໃນອະນາຄົດ”, ເຊິ່ງໄດ້ຈັດຂຶ້ນໃນວັນທີ 2 ກໍລະກົດນີ້ ທີ່ນະຄອນຫລວງວຽງຈັນ ໂດຍການເປັນປະທານຮ່ວມໂດຍ ທ່ານ ສະຫວັນຄອນ ຣາຊມຸນຕີ ຮອງລັດຖະມົນຕີກະຊວງ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ທ່ານ ຖົວ ເຈິ້ນ ຫົວໜ້າບັນນາທິການ ໜັງສືພິມປະຊາຊົນລາຍວັນຈີນ ມີບັນດາຜູ້ຕາງໜ້າສື່ຈາກ ສຳນັກຂ່າວສານປະເທດລາວ, ສຳນັກຂ່າວສານຊິນຮົວ ສປ ຈີນ , ສູນຂ່າວສານ Dermot Ampil ກຳປູເຈຍ, ບໍລິສັດສື່ Shwe Than Lwin ແລະ ໜັງສືພິມປະຊາທິປະໄຕວັນນີ້ ມຽນມາ, ສື່ຈາກປະເທດໄທ, ແລະ ຜູ້ຕາງໜ້າຈາກໜັງສືພິມ Nhan Dan ຫວຽດນາມ. ນອກຈາກນີ້ຍັງມີຜູ້ຕາງໜ້າຈາກບໍລິສັດດາວທຽມລາວ-ອາຊີປາຊີຟິກ ແລະ ບໍລິສັດໂທລະພາບລາວດີຈີຕອນ ຈຳກັດ.

ກອງປະຊຸມດັ່ງກ່າວ ເປັນການສ້າງເງື່ອນໄຂໃຫ້ ສື່ມວນຊົນຈາກທັງ 6 ປະເທດແມ່ນໍ້າຂອງ-ແມ່ນໍ້າລ້ານຊ້າງໄດ້ມີໂອກາດພົບປະ ສົນທະນາ ແລກປ່ຽນບົດຮຽນເຊິ່ງກັນແລະກັນ, ຊອກຊ່ອງທາງກຳນົດກົນໄກ ແລະ ທິດທາງຮ່ວມມືພັດທະນາວຽກງານສື່ສານມວນຊົນ ໃນພາກພື້ນນີ້ໃຫ້ຂະຫຍາຍຕົວຍິ່ງຂຶ້ນ. ພ້ອມທັງເສີມສ້າງສັນຕິພາບ ແລະ ສະຖຽນລະພາບຂອງພາກພື້ນ, ຫຼຸດຜ່ອນຄວາມແຕກໂຕນກັນດ້ານການພັດທະນາ, ເພີ່ມທະວີການຮ່ວມມື ແລະ ຮ່ວມກັນສ້າງປະຊາຄົມຮ່ວມຊາຕາກຳຂອງປະເທດລຽບຕາມແມ່ນ້ຳຂອງ-ແມ່ນໍ້າລ້ານຊ້າງ ດ້ວຍ ການສ້າງຄວາມເຂົ້າອົກເຂົ້າໃຈກັນ, ສາມັກຄີຊ່ວຍເຫລືອ ເຊິ່ງກັນແລະກັນ, ເພີ່ມທະວີການປຶກສາຫາລື ແລະ ແລກປ່ຽນການພົວພັນຮ່ວມມືຢ່າງສະເໝີພາບ, ຕ່າງຝ່າຍຕ່າງໄດ້ຮັບຜົນປະໂຫຍດຮ່ວມກັນ”.

ທ່ານ ສູນທອນ ຄັນທະວົງ ອຳນວຍການຂ່າວສານປະເທດລາວ ໄດ້ກ່າວວ່າ: ໃນ ຍຸກໂລກາພິວັດ ຖືເປັນຍຸກແຫ່ງຂໍ້ມູນຂ່າວສານ ແລະ ເຕັກໂນໂລຊີ ທີ່ບໍ່ມີພົມແດນໄດ້ເຕີບໃຫຍ່ ແລະ ຂະຫຍາຍຕົວຢ່າງວ່ອງໄວ, ສະນັ້ນການກະຈາຍ ແລະ ໄດ້ຮັບ ຂໍ້ມູນຂ່າວສານ ມີຫຼາຍຮູບການ ແລະ ຫຼາຍຊ່ອງທາງ, ແຕ່ສໍາລັບປະເທດທີ່ຍັງທຸກຍາກ ແລະ ດ້ອຍພັດທະນາ ແມ່ນຍັງມີຂີດຈຳກັດທາງດ້ານງົບປະມານ ຈຶ່ງບໍ່ສາມາດນຳໃຊ້ ພາຫະນະ ຫລື ອຸປະກອນວິຊາການສື່ມວນຊົນ ທີ່ມີເຕັກໂນໂລຊີສູງ  ໃນການກະຈາຍຂໍ້ມູນຂ່າວສານຢ່າງມີປະສິດທິຜົນ ແລະ ວ່ອງໄວອອກສູ່ສັງຄົມ. ກອງປະຊຸມສຸດຍອດສື່ມວນຊົນຄັ້ງນີ້ ຖືເປັນຫົວຂໍ້ທີ່ເປັນບາດກ້າວອັນສຳຄັນ ສະໜັບສະໜູນ ແລະ ຊຸກຍູ້ການຮ່ວມມື ພັດທະນາສື່ມວນຊົນ ທັງ 6 ປະເທດດັ່ງກ່າວ ຕາມເປົ້າໝາຍ ແລະ ຈຸດປະສົງຮ່ວມກັນ. ສະນັ້ນ ເພື່ອໃຫ້ ເປົ້າໝາຍ ແລະ ຈຸດປະສົງຮ່ວມກັນ ອົງການສື່ມວນຊົນທັງ 6 ປະເທດ ມີຄວາມຈຳເປັນຕ້ອງໄດ້ ປຶກສາຫາລືຮ່ວມກັນໃນການນຳສະເໜີຂໍ້ມູນຂ່າວສານທີ່ຖືກຕ້ອງເປັນຄວາມຈິງ ແລະ ສ້າງສັນ ໃຫ້ປະຊາຊົນໃນພາກພື້ນນີ້ໄດ້ຮັບຊາບ ດ້ວຍການເຂົ້າໄປມີບົດບາດໃນການນຳພາແນວຄິດຂອງປະຊາຊົນ ແນໃສ່ເພື່ອສ້າງຄວາມເຂົ້າໃຈ ແລະໄວ້ວາງ ໃຈເຊິ່ງກັນແລະກັນ, ພ້ອມກັນນຳໃຊ້ຜົນປະໂຫຍດ ແລະ ທ່າແຮງທີ່ມີຢ່າງຫລວງຫລາຍຮ່ວມກັນໃນອະນາຄົດ ບົນພື້ນຖານຮັດແໜ້ນການພົວພັນ ແລະ ຮ່ວມມືພັດທະນາຮ່ວມກັນໃນພາກພື້ນຂອງພວກເຮົາ ໂດຍສະເພາະເລີ່ມຈາກການຮ່ວມກັນຊຸກຍູ້ສົ່ງເສີມ ແລກປ່ຽນ ແລະ ການໂຄສະນາ ວຽກງານທ່ອງທ່ຽວໃຫ້ກັນ ແລະ ກັນ.

ທ່ານ ນາງ ທັດສະນີ ພົນຊານີໂກ ຮອງເອກອະທິບໍດີ ກົມປະຊາສຳພັນແຫ່ງ ປະເທດໄທ ໄດ້ກ່າວວ່າ: ເພື່ອໃຫ້ເກີດແລວທາງເສດຖະກິດໃນອະນຸພາກພື້ນລຸ່ມນໍ້າຂອງ ແລະ ສາມາດເຊື່ອມຕໍ່ກັບແລວທາງເສດຖະກິດຂອງພາກພື້ນອື່ນໆ ອັນນີ້ຈະນໍາເອົາໂອກາດອັນໃຫຍ່ຫລວງໃຫ້ແກ່ພາກພື້ນນີ້. ສໍາລັບບົດບາດຂອງສື່ມວນຊົນໃນການສະຫນັບະຫນູນ ຂອບການຮ່ວມມືືແມ່ນໍ້າຂອງ-ລ້ານຊ້າງນັ້ນ ປະເທດໄທໄດ້ດຳເນີນການ ແລະ ຍິນດີສະຫນັບສະຫນູນຕະຫລອດມາ, ຢ່າງໃດກໍຕາມ  ກໍຕ້ອງໄດ້ຮັບຍອມຮັບວ່າ ໃນຍຸກສະໄໝດີຈີຕອນ ທີ່ເຕັກໂນໂລຊີ ແລະ ນະວັດຕະກໍາປ່ຽນແປງທຸກໆມື້ ພວກເຮົາໃນຖານະເປັນຜູ້ບໍລິຫານ ແລະ ນັກຂ່າວສານມວນຊົນຈຶ່ງຕ້ອງປັບຕົວ ໃຫ້ສອດຄ່ອງກັບພຶດຕິກໍາຂອງຜູ້ບໍລິໂພກຂ່າວສານໃນຍຸກທີ່ມີການຫລອມລວມຂອງສື່ (Media Convergence) ເນື່ອງຈາກການສື່ສານເກີດຂຶ້ນຕະຫລອດເວລາ ບົນພື້ນທີ່ສາທາລະນະ ແລະ ພື້ນທີ່ສ່ວນຕົວ ຜູ້ຊົມໃຊ້ສື່ມີເສລີພາບຍິ່ງຫລາຍຂຶ້ນ ໃນການກຳນົດເນື້ອຫາ ແລະ ຮູບແບບການນໍາໃຊ້ປະໂຫຍດ, ປັດໄຈເຫລົ່ານີ້ສົ່ງຜົນກະທົບໃຫ້ກົມປະຊາສຳພັນ ໃນຖານະອົງການດ້ານການປະຊາສຳພັນ ແລະ ສື່ສານມວນຊົນພາກລັດ ຕ້ອງປັບຕົວໃຫ້ບໍລິການໃນລັກສະນະມັນຕິມີເດຍ (Mantimidia) ໃນການເພີ່ມຊ່ອງທາງໃຫ້ຄວາມຫລາກຫລາຍເປັນທາງເລືອກ ສໍາລັບປະຊາຊົນ ຈາກທີ່ເຄີຍໃຫ້ຄວາມສຳຄັນກັບວິທະຍຸກະຈາຍສຽງ ແລະ ໂທລະພາບ ເຊິ່ງເປັນສື່ມວນຊົນຫລັກ ຕ້ອງຫັນມາວາງຍຸດທະສາດອອກແບບເນື້ອຫາ ເພື່ອບໍລິການກຸ່ມເປົ້າຫມາຍທີ່ແຕກຕ່າງກັນໄປ ຫລາກຫລາຍຊ່ອງທາງທັງ ອອນໄລນ໌ (online) ແລະ ສື່ສັງຄົມຮ່ວມກັນ.