ສະໂມສອນ ອີໂວ ຢູໄນເຕັດ ຄວ້າແຊ້ມບານເຕະ ຊີງຂັນເຈົ້າຄອງນະຄອນຫລວງ 2018
ໃນວັນທີ 30 ມິຖຸນາຜ່ານມາ ຢູ່ສະຫນາມກິລາເຈົ້າອານຸວົງ ໄດ້ມີການແຂ່ງຂັນບານເຕະຊີງຂັນເຈົ້າຄອງນະຄອນຫລວງ 2018 ຄູ່ຊີງຊະນະເລີດຮຸ່ນຊາວຫນຸ່ມເປັນການພົບກັນລະຫວ່າງ ອີໂວ ຢູໄນເຕັດ ຕົວແທນຈາກເມືອງນາຊາຍທອງ ພົບກັບ ເມືອງໄຊເສດຖາ, ຜ່ານການແຂ່ງຂັນຜົນປາກົດວ່າ 90 ນາທີ ທັງ 2 ທີມ ສະເຫມີ 0-0 ຕ້ອງມາຕັດສິນດ້ວຍການດວນຈຸດໂທດ ເປັນທາງດ້ານ ອີໂວ ຢູໄນເຕັດ ທີ່ຍິງຄົມກວ່າ ເປັນຝ່າຍເອົາຊະນະ ເມືອງໄຊເສດຖາ 6-5 ປະຕູ ຄວ້າແຊ້ມບານເຕະຊີງຂັນເຈົ້າຄອງນະຄອນຫລວງ 2018 ໄປຄອງ ພ້ອມຮັບຂັນ ແລະ ເງິນ ຈຳນວນ 8 ລ້ານກີບ, ອັນດັບ 2 ເມືອງໄຊເສດຖາ, ອັນດັບ 3 ເມືອງຈັນທະບູລີ ແລະ ອັນດັບ 4 ເມືອງປາກງື່ມ.
ສຳລັບສະໂມສອນ ອີໂວ ຢູໄນເຕັດ ແມ່ນເລີ່ມກໍ່ຕັ້ງທີມນັບແຕ່ເດືອນເມສາ 2018 ເປັນຕົ້ນມາ ໂດຍມີເປົ້າຫມາຍເພື່ອເຂົ້າຮ່ວມການແຂ່ງຂັນ ດີວິຊັນ 1.
ອີໂວ ຢູໄນເຕັດ ແມ່ນມາຈາກຍີ່ຫໍ້ເຄື່ອງ ແລະ ຮ້ານເຄື່ອງກິລາ ອີໂວ໌ສຕໍລ ມີປະທານທີມໂດຍ ທ່ານ ສີສະຫວັນ ມ່າຢົງເຊິນ ທີ່ແຂວງຫລວງນໍ້າທາ ທັ້ງເປັນຜູ້ບໍລິຫານ ບໍລິສັດ ຮຸ່ງອາລຸນການຄ້າ ແລະ ຂົນສົ່ງ ຂາອອກ-ຂາເຂົ້າຈຳກັດ .
ສຳລັບເປົ້າຫມາຍຂອງ ອີໂວ ຢູໄນເຕັດ ຄືການສ້າງນັກກິລາເພື່ອເຂົ້າແຂ່ງຂັນ ລາວດິວິຊັນ1 ລວມທັງຄວາມເປັນໄປໄດ້ໃນການຂຶ້ນລີກສູງສຸດຂອງປະເທດ ລາວພຣີເມຍລີກ 2019 ຄຽງຄູ່ກັບການສ້າງອາຄາເດມີເຍົາວະຊົນໃຫ້ມີທັກສະ ເວທີສະແດງຄວາມສາມາດໃຫ້ກ້າວສູ່ລະດັບນາໆຊາດໃນອະນາຄົດອັນໃກ້ນີ້.
