ລາວ-ຈີນຮ່ວມສຳມະນາທິດສະດີຄັ້ງທີ 7

ແຫລ່ງຂ່າວ ຂປລ ລາຍງານວ່າ: ໃນວັນທີ 2 ກໍລະກົດນີ້ ທີ່ນະຄອນຫລວງວຽງຈັນ ໄດ້ຈັດກອງປະຊຸມສຳມະນາທິດສະດີລະຫວ່າງພັກປະຊາຊົນປະຕິວັດລາວ ແລະ ພັກກອມມູນິດຈີນຄັ້ງທີ 7 ພາຍໃຕ້ຫົວຂໍ້: “ພຶດຕິກຳ ແລະ ບົດຮຽນ ແຫ່ງການດຳເນີນການປ່ຽນແປງໃໝ່ຮອບດ້ານມີຫລັກການຢູ່ ສປປ ລາວ ແລະ ການປະຕິຮູບເປີດປະຕູສູ່ໂລກພາຍນອກຢູ່ ສປ ຈີນ”, ຄະນະຜູ້ແທນຂອງພັກປະຊາຊົນປະຕິວັດລາວນຳໂດຍສະຫາຍ ບຸນທອງ ຈິດມະນີ ກຳມະການກົມການເມືອງສູນກາງພັກ, ຄະນະເລຂາທິການສູນກາງພັກ, ປະທານຄະນະກວດກາສູນກາງພັກ, ຮອງນາຍົກລັດຖະມົນຕີ, ສະຫາຍ ກິແກ້ວ ໄຂຄຳພິທູນ ຄະນະເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ ແລະ ຄະນະຜູ້ແທນພັກກອມມູນິດຈີນນຳໂດຍສະຫາຍ ຮວງ ຄຸນມິງ ກຳມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກກອມມູນິດຈີນ, ສະຫາຍ ຫວັງ ເວີນທຽນ ເອກອັກຄະລັດຖະທູດຈີນ ປະຈຳລາວ, ພ້ອມດ້ວຍນັກຄົ້ນຄວ້າທິດສະດີ, ນັກວິທະຍາສາດ-ສັງຄົມ ລາວ-ຈີນເຂົ້າຮ່ວມເປັນຈໍານວນຫລາຍ.

ກອງປະຊຸມຄັ້ງນີ້, ໄຂຂຶ້ນໃນທ່າມກາງທີ່ສອງພັກ, ສອງລັດ ແລະ ປະຊາຊົນສອງຊາດລາວ-ຈີນ ພວມອອກແຮງແຂ່ງຂັນຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XIX ຂອງພັກກອມມູນິດຈີນ ແລະ ກອງປະຊຸມໃຫຍ່ຄັ້ງທີ X ຂອງພັກປະຊາຊົນປະຕິວັດລາວ. ພິເສດກົງກັບການສະເຫລີມສະຫລອງວັນສ້າງຕັ້ງພັກກອມມູນິດຈີນທີ່ມີກຽດສະຫງ່າຄົບຮອບ 97 ປີ (1 ກໍລະກົດ 1921-1 ກໍລະກົດ 2018) ແລະ ວັນສ້າງຕັ້ງພັກປະຊາຊົນປະຕິວັດລາວຄົບຮອບ 63 ປີ (22 ມີນາ 1955-22 ມີນາ 2018).

ໃນໂອກາດດັ່ງກ່າວ, ໄດ້ຮັບຟັງບົດຄຳເຫັນຈາກສະຫາຍ ບຸນທອງ ຈິດມະນີ ພາຍໃຕ້ຫົວຂໍ້ “ພັກປະຊາຊົນປະຕິວັດລາວລິເລີ່ມ ແລະ ນຳພາການປ່ຽນແປງໃໝ່ຮອບດ້ານທີ່ມີຫລັກການຢູ່ ສປປ ລາວ” ແລະ ຮັບຟັງບົດຄຳເຫັນຈາກ ສະຫາຍ ຮວງ ຄຸນມິງ ໃນຫົວຂໍ້ “ການຊອກຄົ້ນດ້ານພຶດຕິກຳ ແລະ ບົດຮຽນສຳ

ຄັນຂອງການປະຕິຮູບ ແລະ ເປີດປະຕູສູ່ພາຍນອກຂອງປະເທດຈີນ”. ພ້ອມນີ້, ຍັງໄດ້ຮັບຟັງການນຳສະເໜີຫົວຂໍ້ຕ່າງໆຂອງຄະນະຜູ້ແທນລາວ-ຈີນທີ່ປີ່ນອ້ອມຫົວຂໍ້ຫລັກຂອງກອງປະຊຸມທັງໝົດ 13 ຫົວຂໍ້, ໃນນັ້ນຄະນະຜູ້ແທນລາວສະ

ເໜີ 7 ຫົວຂໍ້ຄື: (1) ພັກກຳນົດເສັ້ນທາງກ້າວຂຶ້ນສັງຄົມນິຍົມຢູ່ປະເທດເຮົາ, (2) ສ້າງສັງຄົມສາມັກຄີປອງດອງ, ປະຊາທິປະໄຕ, ຍຸຕິທຳ ແລະ ສີວິໄລ. (3) ເປີດກວ້າງການພົວພັນຮ່ວມມືກັບຕ່າງປະເທດ. (4) ພັດທະນາເສດຖະກິດຕະຫລາດຕາມທິດສັງຄົມນິຍົມຢູ່ລາວ. (5) ເດັດດ່ຽວປົກປັກຮັກສາໝາກຜົນຂອງການປະຕິວັດ ແລະ ປະເທດຊາດ. (6) ສ້າງລັດປະຊາທິປະໄຕ ປະຊາຊົນທີ່ປົກຄອງດ້ວຍກົດໝາຍ ແລະ (7) ຍົກສູງຄວາມສາມາດກຳອຳນາດຂອງພັກປະຊາຊົນປະຕິວັດໃນເງື່ອນໄຂພັກດຽວກຳອຳນາດ.

ພ້ອມນີ້, ຄະນະຜູ້ແທນຈີນສະເໜີ 6 ຫົວຂໍ້ຄື: (1) ການປະຕິຮູບ ແລະ ເປີດປະຕູສູ່ພາຍນອກ ແມ່ນການປະຕິວັດຄັ້ງທີສອງຂອງປະເທດຈີນ. (2) ບົດຮຽນອັນລ້ຳຄ່າຂອງການປະຕິຮູບ ແລະ ເປີດປະຕູສູ່ພາຍນອກຂອງປະເທດຈີນ. (3) ຜົນສຳເລັດທີ່ເປັນລັກສະນະປະຫວັດສາດ ແລະ ການປ່ຽນແປງຄັ້ງປະຫວັດສາດໃນພາລະກິດຂອງພັກ ແລະ ຂອງຊາດນັບແຕ່ກອງປະຊຸມໃຫຍ່ຄັ້ງທີ 18 ຂອງພັກກອມມູນິດຈີນເປັນຕົ້ນມາ. (4) ສັງຄົມນິຍົມທີ່ມີສີສັນພິເສດຂອງຈີນ ແມ່ນຫົວຂໍ້ຫລັກທັງໝົດຕະຫລອດໄລຍະ 40 ປີແຫ່ງການປະຕິຮູບ ແລະ ເປີດປະຕູສູ່ພາຍນອກ. (5) ກໍ່ສ້າງ ແລະ ບູລະນະດ້ານພຶດຕິກຳຂອງການຊອກຄົ້ນ ແລະ ຄວາມຮັບຮູ້ທີ່ເປັນກົດເກນຂອງລະບອບເສດຖະກິດຕະຫລາດຂອງສັງຄົມນິຍົມ ແລະ ເອົາການເປີດກວ້າງມາຊຸກຍູ້ການປະຕິຮູບ, ຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດ.

ນອນນີ້, ຄະນະຜູ້ແທນສອງຝ່າຍໄດ້ຄົ້ນຄວ້າແລກປ່ຽນຄຳຄິດເຫັນຮ່ວມກັນຫລາຍບັນຫາທີ່ສຳຄັນຢ່າງກົງໄປກົງມາ, ເປີດອົກເປີດໃຈ ແລະ ພາວະວິໄສ ລົງເລິກບັນຫາທີ່ທັງສອງຝ່າຍມີຄວາມສົນໃຈກ່ຽວກັບການປ່ຽນແປງໃໝ່ຢູ່ ສປປ ລາວ ແລະ ການປະຕິຮູບເປີດປະຕູສູ່ໂລກພາຍນອກຢູ່ ສປ ຈີນ ອັນໄດ້ເປັນການປະກອບສ່ວນດ້ານສະຕິປັນຍາ, ທິດສະດີວິທະຍາສາດ ແລະ ພຶດຕິກຳ ແຫ່ງການນຳພາຂອງທັງສອງພັກ ກາຍເປັນເວທີແລກປ່ຽນບົດຮຽນທີ່ສຳຄັນ, ເພີ່ມທະວີຄວາມເຂົ້າອົກເຂົ້າໃຈ ແລະ ເພີ່ມທະວີໄມຕີຈິດມິດຕະພາບທີ່ເປັນມູນເຊື້ອຮ່ວມຊາຕາກຳສັງຄົມນິຍົມລະຫວ່າງສອງພັກລາວ-ຈີນ.