ຈົດຈໍ່ເບິ່ງບານໂລກ 2018 ທີ່ປະເທດລັດເຊຍ

ໂດຍ: ທິດກ່ຳ

ນັບແຕ່ວັນທີ 14 ມິຖຸນາ ເປັນຕົ້ນມາ, ເສີກບານໂລກ ໄດ້ເປີດສາກຂຶ້ນ ໂດຍເລີ່ມ ຈາກຮອບແບ່ງກຸ່ມຈົນມາ ຮອດປັດຈຸບັນແມ່ນເລີ່ມເຂົ້າ ຮອບຕັດເຊືອກ (Nock Out) ແລ້ວ, ໃຜຊິໄປໃຜຊີຢູ່ ຫລື ໃຜຈະໄດ້ແຊ້ມກໍແມ່ນ ຈະ ພິສູດກັນໃຫ້ເຫັນໃນບໍ່ຊ້າ.
ໃນມື້ວັນທີ 30 ມິຖຸນາ ຜ່ານມາ, ຜົນການພິສູດເລີ່ມ ແລກແຮກໝານໃນຮອບຕັດ ເຊືອກກໍແມ່ນທີມຝຣັ່ງບຽດ ຊະນະອູຣູໄກວ, ສ່ວນວັນທີ 1 ກໍລະກົດນີ້ກໍແມ່ນ ເຈົ້າພາບ ລັດເຊຍມີດວງເຮັງຫລາຍ ກວ່າເລີຍຊະນະທີມສະເປນ ດ້ວຍການເຕະຈຸດໂທດເຂົ້າ ໂກນສະເປນໄດ້ 3 ໜ່ວຍ. ສ່ວນຄູ່ອື່ນໆຕໍ່ໄປກໍຂໍໃຫ້ພວກເຮົາພ້ອມກັນຕິດຕາມເສິກລູກໜັງໃນຄັ້ງນີ້ວ່າໃຜຈະໄດ້ເປັນແຊ້ມໂລກໃນຍຸກໂລກາພິວັດ.

+  ເກົາຫລີ ທີມທຳອິດຂອງອາຊີ ລົ້ມ ເຢຍລະມັນ ໃນບານໂລກ 2018

+ ບຣາຊິລ ຜ່ານຮອບແບ່ງກຸ່ມບານໂລກ ດວນກັບ ເມັກຊິໂກ ຮອບ 16 ທີມ ບານໂລກ 2018

ຄືດັ່ງພວກເຮົາເຫັນນຳ ກັນຜ່ານມາວ່າ, ປະເທດທີ່ເຄີຍ ແຂ່ງແກ່ນ ແລະ ເຄີຍເປັນແຊ້ມ ໂລກຜ່ານມາໃຜກໍບໍ່ຄາດຄິດວ່າຈະຕົກຮອບດັ່ງທີມເຢຍ ລະ ມັນທີ່ເຄີຍມີສາຍານາມວ່າ: ອີນຊີເຫລັກ ແຕ່ສຸດທ້າຍ ກໍ ຕ້ອງເສຍແຕ້ມໃຫ້ທີມເກົາຫລີ ຍອດພະລັງໂສມສູ້ແບບບໍ່ ຖອຍເພື່ອກຽດສັກສີຂອງຄົນອາຊີ ສຸດທ້າຍກໍກອດຄໍພາກັນ ຕົກຮອບ, ສ່ວນວ່າທີມເຕະ ບານຂອງອາຊີເຮົາກໍຍັງແຕ່ ຍີ່ປຸ່ນທີ່ໄດ້ກ້າວເຂົ້າໄປຫລິ້ນ ໃນຮອບ 16 ທີມທີ່ຕາງໜ້າ ໃຫ້ຄົນອາຊີຈຳນວນຫລາຍ ຕື້ຄົນ.

ແນວໃດກໍຕາມ, ຜ່ານ ການເດີນທາງມາຮອດຈຸດນີ້ ທິດກ່ຳ ກໍເຫັນມີຫລາຍປະ ເທດໄດ້ມີການພັດທະນາໃນ ດ້ານກິລາບານເຕະຢ່າງເຫັນທັນຕາ, ເປັນຕົ້ນບັນດາປະ ເທດ ທີ່ໂດດເດັ່ນທີ່ສຸດກໍແມ່ນ ແຖວ ເອີຣົບ ແລະ ອາເມລິກາ ໃຕ້ເຊັ່ນ: ອູຣູໄກວເຂົາມີພົນລະ ເມືອງພຽງແຕ່ສາມລ້ານກວ່າ ແລະ ປະເທດອື່ນໆອີກທີ່ ຢູ່ ແຖວນັ້ນ.

ເມື່ອຕັ້ງໂຈດກັນວ່າ: ເປັນ ຫຍັງເຂົາຈັ່ງເກັ່ງກິລາບານ ເຕະໃນລະດັບໂລກ? ຄຳຕອບ ກໍຄືຍ້ອນເຂົາມັກ ແລະ ໄຝຝັນ ຫາກິລາບານເຕະທີ່ນິຍົມໃນ ທົ່ວໂລກ ຫລື ຖ້າຈະໃຫ້ຕອບ ເດັດໆກໍແມ່ນຍ້ອນມີການພັດທະນາຢ່າງຈິ່ງຈັງເວົ້າແລ້ວ ຕ້ອງພ້ອມກັນເຮັດ.
ໃນສະໄໝນີ້, ການພັດທະ ນາກິລາ ຖືເປັນຍຸດທະສາດ ເພື່ອການພັດທະນາປະເທດ ຊາດຂອງທຸກປະເທດໃນໂລກ ຂໍພຽງແຕ່ວ່າມີປັດໄຈໃນ ຄວາມພ້ອມ, ແຕ່ ເມື່ອເວົ້າເຖິງ ບັນຍາກາດການພັດທະນາກິລາບ້ານເພິ່ນມາທຽບໃສ່ບ້ານເຮົາ ທິດກ່ຳຍັງບໍ່ຮູ້ວ່າຍັງອີກ ຈັກປີ ຫລື ຈັກສະຕະວັດ ຈຶ່ງ ຈະໄດ້ໄປແຂ່ງຂັນບານໂລກ ນຳເຂົາ, ແຕ່ເມື່ອຍົກບັນຫານີ້ ຂຶ້ນມາຫລາຍຫາງສຽງພັດ ວ່າມັນຍັງຄາຍ້ອນບ້ານເຮົາ ຍັງທຸກຍາກ, ບໍ່ມີເງິນ, ບໍ່ມີງົບ ວ່າຊັ້ນ! ຕາມທິດກ່ຳຄິດບັນ ຫານີ້ມັນກໍມີສ່ວນ, ແຕ່ອັນ ສຳຄັນຍ້ອນມັນຄາແທ້ໆແມ່ນຜູ້ເຮັດ, ຊາຫຍັງຂະໜາດໄປ ແຂ່ງຂັນໃນລະດັບພາກພື້ນ ກໍຍັງພາກັນລົ້ມບານໂດຍບໍ່ ຄິດເຫັນຄວາມເປັນຊາດໜຶ່ງຊາດດຽວຂອງຕົນເອງ, ຄັນ ວ່າມີເງິນ, ມີງົບໃຫ້ ຫລື ໄດ້ມາ ຍ້ອນໄປແຂ່ງຂັນນາຍຊ້ຳພັດປັນພູດຫລາຍກວ່າລູກນ້ອງ.

ນັກກິລາເຂົາຜູ້ອອກເຫື່ອ ເທແຮງຈົນເຫື່ອໄຫລໄຄຍ້ອຍ, ຕັບຈົນລີບ, ອົກສັ່ນຂວັນຫາຍ ກັບມາບ້ານກໍພໍໄດ້ແຕ່ຍ້ອມ ນ້ຳໃຈ ສ່ວນທີ່ເຫລືອນາຍປັນ ກັນກິນ, ອັນໂຕທິດກ່ຳຍົກມາ ນີ້ແມ່ນໃນຫລາຍປີຜ່ານມາເດີ ບໍ່ແມ່ນໃນສະພາບປັດຈຸບັນ.

ນອກຈາກໂຕທີ່ເວົ້າມາ ນີ້ ແລ້ວ, ເວລາໄປແຂ່ງຢູ່ຕ່າງ ປະເທດເພິ່ນເຮັດຄືໄປທ່ອງ ທ່ຽວ ຜູ້ເຕະເກັ່ງພັດບໍ່ໄດ້ໄປ, ຫລິ້ນພັກຫລິ້ນພວກເອົາຫູ ໜວກກິນຟານ ບາດສູ້ເສິກຊີງ ໄຊກໍພໍໄດ້ແຕ່ລັດໜ້າລັດຫລັງ.

ຈາກສາເຫດທີ່ກ່າວມາ ຂ້າງເທິງ, ຈຶ່ງເຮັດໃຫ້ວົງການ ກິລາບານເຕະຢູ່ບ້ານເຮົາບໍ່ ຄ່ອຍຈະລາບລື້ນມີຂຶ້ນມີລົງ, ມາຮອດປັດຈຸບັນປາກົດເຫັນວ່າທົດຖອຍ, ຂະບວນການ ກໍສີມິດໆ, ອືດໆອາດໆຄືໂສ້ ບໍ່ເຄັ່ງ, ບໍ່ມີໃຜຢາກອຸປະຖຳ ແລະ ສົ່ງເສີມຍ້ອນຜົນໄດ້ຮັບ ບໍ່ຄຸ້ມຄ່າ ແລະ ຊ້ຳບໍ່ໜຳປະ ເທດຊາດເສຍບົດບາດ ຍ້ອນ ພວກຫົວໃສທີ່ໄຖຫາກິນແຮງງານໝູ່. ໃນທາງກົງກັນຂ້າມ ຕົກເຂົ້າໃນຍຸກໂລກາພິວັດ ບ້ານ ເຮົາຍິ່ງດັ່ງໄປໃນທາງ ບໍ່ເຂົ້າຮ່ອມຫລາຍຢ່າງເຊັ່ນ: ດັງ ເລື່ອງກ໊ອກເປັນໜຶ່ງໃນ ອາຊຽນ, ດັງເລື່ອງຢາເສບ ຕິດຈັບຢູ່ຊາຍແດນໝ້ອງໃດ ກໍວ່າແມ່ນຄົນລາວ, ດັງເລື່ອງ ການສໍ້ລາດບັງຫລວງ, ດັງ ເລື່ອງໂຄງການບໍ່ມີຕົນມີໂຕ, ດັງເລື່ອງການເກັບລາຍຮັບ ບໍ່ໄດ້, ຢາກພົ້ນທຸກມັນກໍຄາ ນຳຄວາມທຸກຍາກ ແລະ ເມື່ອ ເວົ້າມາລະມັນປຸກປານຢາ ບ້ານຫ້ອມ.