ລົງນາມສັນຍາໂຄງການພັດທະນາເຂດເສດຖະກິດໃໝ່ສີທັນດອນ

ພິທີລົງນາມສັນຍາໂຄງການພັດທະນາເຂດເສດຖະກິດໃໝ່ສີທັນດອນ, ເມືອງໂຂງແຂວງຈໍາປາສັກ ໄດ້ຈັດຂຶ້ນໃນວັນທີ 30 ມິຖຸນານີ້ທີ່ໂຮງແຮມແລນມາກ, ນະຄອນຫລວງວຽງຈັນ, ໂດຍການເຂົ້າຮ່ວມຂອງທ່ານຮອງນາຍົກລັດຖະມົນຕີ ສອນໄຊ ສີພັນດອນ, ມີລັດຖະມົນຕີກະຊວງແຜນການ ແລະ ການລົງທຶນ, ເຈົ້າແຂວງຈໍາປາສັກ ແລະ ພາກສ່ວນກ່ຽວຂ້ອງເຂົ້າຮ່ວມ.

ທ່ານ ສຸພັນ ແກ້ວມີໄຊ ລັດຖະມົນຕີກະຊວງແຜນການ ແລະ ການລົງທຶນ ໃຫ້ຮູ້ວ່າ: ໂຄງການດັ່ງກ່າວໄດ້ມີແນວຄິດລິເລີ່ມມາຫລາຍປີແລ້ວ ແລະ ມາຮອດປີ 2009 ລັດຖະບານໄດ້ຕົກລົງໃຫ້ມີການພັດທະນາ, ເຊິ່ງໃນຂະນະນັ້ນ ໄດ້ມີຫລາຍບໍລິສັດທັງພາຍໃນ ແລະ ຕ່າງປະເທດໃຫ້ຄວາມສົນໃຈ ແລະ ສະເໜີຂໍສຶກສາສໍາຫລວດຄວາມເປັນໄປໄດ້ ແຕ່ບໍ່ສໍາເລັດຍ້ອນຂາດທຶນຮອນ ແລະ ປະສົບການ. ຈົນມາຮອດປີ 2017 ຈຶ່ງຄັດເລືອກໄດ້ບໍລິສັດ Guangdong Yellow  River Industries ຈາກ ສປ ຈີນ ແລະ ບໍລິສັດ ແອລທີວີ ກໍ່ສ້າງຂົວ-ທາງ ແລະ ເຄຫາສະຖານຈໍາກັດ, ຊຶ່ງເປັນເອກະຊົນພາຍໃນຂອງລາວຮ່ວມກັບດໍາເນີນການສຶກສາຫລວດນັບແຕ່ກາງປີ 2017 ເປັນຕົ້ນມາ, ໂດຍໄດ້ດໍາເນີນຕາມຂັ້ນຕອນທີ່ກົດໝາຍກໍານົດ ແລະ ເຫັນວ່າໂຄງການມີປະສິດທິຜົນທາງສດຖະກິດ, ທັງຮັບປະກັນໄດ້ຜົນປະໂຫຍດລວມຂອງລັດ, ຜູ້ພັດທະນາ ແລະ ປະຊານ ໂດຍສະເພາະຈະສ້າງວຽກເຮັດງານທໍາແລະ ຜົນປະໂຫຍດໃຫ້ປະຊາຊົນທ້ອງຖິ່ນ ທັງທາງກົງ ແລະ ທາງອ້ອມ. ດັ່ງນັ້ນລັດຖະບານຈຶ່ງໄດ້ຕົກລົງໃຫ້ມີການເຊັນສັນຍາພັດທະນາໂຄງການກັບບໍລິສັດ ລາວ ມະຫານະທີ ສີທັນດອນ (ຮົງກົງ) ອິນເວສເມັນ ຈໍາກັດ ແລະ ບໍລິສັດ ແອລທີວີ ກໍ່ສ້າງ-ຂົວທາງ ແລະ ເຄຫາສະຖານ ແລະ ຊົນລະປະທານຈໍາກັດ ລວມມີມູນຄ່າ 9 ຕື້ໂດລາສະຫະລັດ, ໃນເນື້ອທີ່ 9.840 ກວ່າເຮັກຕາ ແລະ ມີອາຍຸສໍາປະທານ 50 ປີ, ໂດຍຈະສຸມໃສ່ການພັດທະນາຕົ້ນຕໍຄື: ການພັດທະນາທີ່ດິນ, ອະສັງຫາລິມະຊັບ, ຄາຊິໂນ, ໂຮງແຮມ ແລະ ການທ່ອງທ່ຽວ.