ໄຟຂຽວແລ້ວ ! ຣີລ ມາດຣິດ ຫລຸດຄ່າຈີກສັນຍາ ໂຣນັລໂດ້
ຣີລ ມາດຣິດ ອາດຈະເປີດໄຟຂຽວໃຫ້ ຄຣິສເຕຍໂນ້ ໂຣນັລໂດ້ ດາວເຕະປະຈຳທີມ ຍ້າຍອອກໄປໄດ້ດັ່ງໃຈປາຖະໜາແລ້ວ ເມື່ອຕົກເປັນຂ່າວວ່າຍອມຫລຸດຄ່າຈີກສັນຍາ ຫລັງຈາກ ໂຣນັລໂດ້ ສະແດງທ່າທີຈະແຈ້ງມາແຕ່ພາທີມຖະຫລົ່ມ ລິເວີພູລ 3-1 ຄວ້າແຊ້ມ ຢູຟາ ແຊມປ້ຽນລີກ 3 ສະໄໝຊ້ອນ ໃນທ້າຍເດືອນພຶດສະພາຜ່ານມາ.
ມາກ້າ ສື່ຊື່ດັງຂອງສະເປນ ລາຍງານຂ່າວວ່າ: ຣີລ ມາດຣິດ ຫລຸດຄ່າຈີກສັນຍາຂອງກັບຕັນທີມຊາດໂປຣຕຸເກສ ອາຍຸ 33 ປີ ຈາກ 884 ລ້ານປອນ ລົງມາເຫລືອ 100 ລ້ານປອນ.
ອະດີດປີກ ແມນເຊັສເຕີ ຢູໄນເຕັດ ຕົກເປັນຂ່າວມາດົນແລ້ວວ່າ ມີຂໍ້ຂັດແຍ່ງກັບ ຟໍເຣນຕິໂນ່ ເປເຣຊ ປະທານສະໂມສອນ ຣີລ ມາດຣິດ ເລື່ອງບໍ່ຍອມເພີ່ມຄ່າເມື່ອຍໃຫ້ຕາມສັນຍາ ຫລງຈາກຕ້ອງການຈະເຊັນສັນຍາໃໝ່ເພື່ອຮັບຄ່າແຮງອາທິດລະ 1,35 ລ້ານປອນ ແຕ່ ເປເຣຊ ພັດບໍ່ໃສ່ໃຈທີ່ຈະເພີ່ມໃຫ້.
ເຖິງວ່າ ປາຣີສ ແຊງແຊກແມງ ຈະເປັນໜຶ່ງໃນບໍ່ເທົ່າໃດສະໂມສອນທີ່ພ້ອມຈະມອບຄ່າຈ້າງໃຫ້ ໂຣນັລໂດ້ ຢ່າງສົມໃຈກໍຕາມ, ແຕ່ຄາເງື່ອນໄຂທີ່ວ່າອາດຈະສ່ຽງຕໍ່ການເຮັດຜິດກົດຄວບຄຸມການເງິນ ຂອງສະຫະພັນບານເຕະເອີຣົບ (ຢູຟາ).
ປັດຈຸບັນ ໂຣນັລໂດ້ ຮັບຄ່າເມື່ອຍອາທິດລະ 350.000 ປອນ ຈາກ ຣີລ ມາດຣິດ ແຕ່ທຽບບໍ່ໄດ້ກັບຄ່າແຮງອາທິດລະ 619.000 ປອນ ທີ່ ເນມາ ກອງໜ້າທີມຊາດບຣາຊິລ ຮັບຢູ່ກັບ ເປເອສເຊ.
