ບຣາຊິລ ຜ່ານຮອບແບ່ງກຸ່ມບານໂລກ ດວນກັບ ເມັກຊິໂກ ຮອບ 16 ທີມ ບານໂລກ 2018
ນັດສຸດທ້າຍຂອງກຸ່ມອີ ວັນທີ 27 ມິຖຸນາ ບຣາຊິລ ແຊ້ມໂລກ 5 ສະໄຫມ ຍັງຢູ່ໃນເສັ້ນທາງການລຸ້ນແຊ້ມສະໄຫມທີ 6 ຫລັງຊະນະ ເຊີເບຍ 2-0 ຈາກ ເປົາລິນໂຢ້ ນາທີ 36 ແລະ ເຕຍໂກ້ ຊິນວາ ນາທີ 68, ຂະນະທີ່ ສະວິດເຊີແລນ ສະເໝີກັບ ຄອສຕາຣີກາ 2-2.
ບຣາຊິລ ເປັນທີ 1 ຂອງກຸ່ມມີ 7 ຄະແນນຈາກ 3 ນັດ, ທີ 2 ສະວິດເຊີແລນ ມີ 5 ຄະແນນ ເຂົ້າຮອບ 16 ທີມຕໍ່ໄປ, ເຊີເບຍ ມີ 3 ຄະແນນ, ຄອສຕາຣີກາ ມີ 1 ຄະແນນຕົກຮອບ.
ບຣາຊິລ ຜ່ານຮອບແບ່ງກຸ່ມບານໂລກ 13 ຄັ້ງຕິດຕໍ່ກັນ ຕັ້ງແຕ່ປີ 1970 ເຖິງປັດຈຸບັນ. ເຊີເບຍ ຕົກຮອບແບ່ງກຸ່ມບານໂລກເປັນຄັ້ງທີ 3 ຕິດຕໍ່ກັນ (2006, 2010 ແລະ 2018). ເນມາ ມີອິດທິພົນກັບເກມບຸກຂອງບຣາຊິລຊັດເຈນ ຖືກນັກເຕະຄູ່ແຂ່ງເຂົ້າປະທະ 119 ຄັ້ງ, ຫລາຍກວ່ານັກເຕະທຸກຄົນໃນບານໂລກຄັ້ງນີ້. ຟີລິບເປີ ຄູຕິນໂຢ້ ມີສ່ວນຮ່ວມກັບ 6 ປະຕູຈາກ 7 ນັດຜ່ານມາຂອງບຣາຊິລໃນປີນີ້ (ຍິງ 4 ຈ່າຍ 2) ນັດນີ້ສົ່ງໃຫ້ເພື່ອນຍິງ 1 ປະຕູ. ບຣາຊິລ ຊະນະ 19 ນັດຈາກ 24 ນັດຫລັງສຸດ ພາຍໃຕ້ການຄຸມທີມຂອງຄູຝຶກ ຕີເຕ້ ທີ່ເຫລືອສະເໝີ 4 ເສຍ 1 ສະເລ່ຍໂອກາດຊະນະຕໍ່ນັດສູງເຖິງ 79%.
ສ່ວນ ສະວິດເຊີແລນ ສາມາດເຂົ້າສູ່ຮອບ 16 ທີມເປັນຄັ້ງທີ 4 ຈາກ 5 ຄັ້ງຫລັງສຸດ. ຮອບ 16 ທີມ: ບຣາຊິລ ພົບ ເມັກຊິໂກ ຈະແຂ່ງຂັນໃນວັນທີ 2 ກໍລະກົດນີ້ ແລະ ສະວີເດັນ ພົບ ສະວິດເຊີແລນ ຈະແຂ່ງຂັນໃນວັນທີ 3 ກໍລະກົດນີ້.
