ກຳປູເຈຍເຊີນປະເທດອາຊຽນ ຮ່ວມສັງເກດການເລືອກຕັ້ງ
ລັດຖະບານພະນົມເປັນເຊີນຄະນະຈາກຕ່າງປະເທດ ລວມທັງຈີນ ແລະ ປະເທດໃນອາຊຽນ ຄືສິງກະໂປ, ມຽນມາ ແລະ ໄທ ເຂົ້າຮ່ວມສັງເກດການການເລືອກຕັ້ງທົ່ວໄປ ໃນວັນທີ 29 ກໍລະກົດນີ້ ເຊິ່ງທຸກຝ່າຍຄາດຄະເນໄປໃນທາງດຽວກັນວ່າ: ພັກຂອງທ່ານ ຮຸນເຊນ ຈະໄດ້ຮັບໄຊຊະນະ.
ສຳນັກຂ່າວຕ່າງປະເທດລາຍງານວ່າ: ຄະນະກຳມະການການເລືອກຕັ້ງແຫ່ງຊາດຂອງກຳປູເຈຍ (NEC) ອອກຖະແຫລງການໃນວັນທີ 27 ມິຖຸນາວ່າ: ໄດ້ມີການເຊີນຄະນະຜູ້ສັງເກດການ 50.000 ຄົນ ຈາກຈີນ, ສິງກະໂປ, ມຽນມາ ແລະ ໄທ ຮ່ວມສັງເກດການການເລືອກຕັ້ງທົ່ວໄປ ເຊິ່ງຈະມີຂຶ້ນໃນວັນທີ 29 ກໍລະກົດນີ້ ໂດຍລະບຸວ່າ: ການເຊີນຄະນະຜູ້ສັງເກດການຈາກພາຍນອກຮ່ວມລົງພື້ນທີ່ຕາມໜ່ວຍເລືອກຕັ້ງ ຄືການສະແດງຄວາມບໍລິສຸດໃຈວ່າການເລືອກຕັ້ງທີ່ກຳລັງຈະເກີດຂຶ້ນນັ້ນໂປ່ງໃສ ແລະ ກວດສອບໄດ້ ແລະ ກຳລັງພິຈາລະນາຄຳຮ້ອງຂອງຄະນະຜູ້ສັງເກດການຈາກພາກລັດ ແລະ ເອກະຊົນຂອງປະເທດທີ່ຢູ່ນອກເໜືອກຸ່ມໄດ້ຮັບເຊີນອີກປະມານ 800 ຄົນ.
ສຳລັບການເລືອກຕັ້ງຄັ້ງນີ້ມີພັກການເມືອງຂະໜາດໃຫຍ່ພຽງພັກດຽວ ຄືພັກປະຊາຊົນກຳປູເຈຍ (CPP) ຂອງນາຍົກລັດຖະມົນຕີ ຮຸນເຊນ ເຊິ່ງປະກາດວ່າຈະຕ້ອງຊະນະເທົ່ານັ້ນ. ຂະນະທີ່ພັກແກນນຳຝ່າຍຄ້ານ ຄືພັກກູ້ຊາດກຳປູເຈຍ (CNRP) ຖືກຍຸບໄປແຕ່ເດືອນພະຈິກປີຜ່ານມາ ເຊິ່ງບັນຫາດັ່ງກ່າວກາຍເປັນຂໍ້ຂັດແຍ່ງລະຫວ່າງລັດຖະບານພະນົມເປັນກັບກຸ່ມປະເທດຕາເວັນຕົກ ໂດຍສະເພາະອາເມລິກາ ເຊິ່ງເຕືອນວ່າ: ລັດຖະບານວໍຊິງຕັນອາດບໍ່ຍອມຮັບຜົນການເລືອກຕັ້ງຄັ້ງນີ້ ແລະ ໃນລະຫວ່າງນີ້ໄດ້ໂຈະການຮ່ວມມືຫລາຍດ້ານກັບໜ່ວຍງານຫລາຍແຫ່ງຂອງກຳປູເຈຍແລ້ວ.
