ກອງປະຊຸມສະພາເພື່ອແກ້ໄຂບັນຫາຂອງຊາດ
ໂດຍ: ທິດກໍ່າ
ດັ່ງພວກເຮົາຮັບຮູ້ນໍາກັນແລ້ວວ່າ, ກອງປະຊຸມສະໄໝສາມັນເທື່ອທີສາມຂອງສະພາແຫ່ງຊາດຊຸດທີ 8 ໄດ້ໄຂ ຂຶ້ນຢ່າງເປັນທາງການມາແຕ່ວັນທີ 25 ເມສາຜ່ານມາ ແລະ ຈະດໍາເນີນໄປຮອດວັນທີ 18 ພຶດສະພານີ້ຈຶ່ງຈະໄດ້ອັດລົງຢ່າງເປັນທາງການ. ດັ່ງທ່ານປະທານສະພາແຫ່ງຊາດ ປານີ ຢາທໍ່ຕູ້ ໄດ້ກ່າວໃນພິທີເປີດກອງປະຊຸມວ່າ: ກອງປະຊຸມຄັ້ງນີ້ແມ່ນຈະໄດ້ພິຈາລະນາ ແລະ ຮັບຮອງເອົາຫລາຍບັນຫາສໍາຄັນຂອງຊາດ ເປັນຕົ້ນອັນທີໜຶ່ງແມ່ນ ຮັບຟັງລາຍງານໂດຍສັງເຂບຂອງທ່ານນາຍົກລັດຖະມົນຕີກ່ຽວກັບການຈັດຕັ້ງປະຕິບັດວຽກງານຈຸດສຸມໃນໄລຍະ 6 ເດືອນຜ່ານມາ ແລະ ທິດທາງແຜນວຽກຈຸດສຸມໃນ 6 ເດືອນຕໍ່ໜ້າຂອງລັດຖະບານ. ອັນທີສອງແມ່ນຮັບຟັງລາຍງານກ່ຽວກັບການສະຫລຸບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມໝົດປີ 2016 ແລະ ການຜັນຂະຫຍາຍການຈັດຕັ້ງປະຕິບັດແຜນປີ 2017. ອັນທີສາມແມ່ນຮັບຟັງລາຍງານກ່ຽວກັບຜົນການຈັດຕັ້ງປະຕິບັດແຜນງົບປະມານແຫ່ງລັດ 3 ເດືອນຂ້າມຜ່ານທ້າຍປີ 2016, ສະພາບການຈັດຕັ້ງປະຕິບັດແຜນງົບປະມານແຫ່ງຊາດງວດທີ 1 ປີ 2017 ແລະ ຄາດຄະເນແຜນການ 9 ເດືອນປີ 2017. ອັນທີສີ່ແມ່ນພິຈາລະນາ ແລະ ຮັບຮອງເອົາບົດລາຍງານກ່ຽວກັບສະພາບການຄຸ້ມຄອງລາຄາສິນຄ້າ ແລະ ມາດຕະການແກ້ໄຂໃນຕໍ່ໜ້າ. ອັນທີຫ້າແມ່ນພິຈາລະນາ ແລະຮັບຮອງການເລືອກຕັ້ງປະທານອົງການກວດສອບແຫ່ງລັດ ແລະ ການຈັດຕັ້ງປະຕິບັດວຽກງານກວດສອບໃນໄລຍະ 5 ປີຜ່ານມາ ແລະ ທິດທາງ 5 ປີຕໍ່ໜ້າ (2017-2021). ອັນທີຫົກພິຈາລະນາ ແລະ ຮັບຮອງເອົາບົດລາຍງານກ່ຽວກັບການປະຕິບັດສິດສັ່ງຟ້ອງຄະດີອາຍາຂຶ້ນສານ ແລະ ການເຂົ້າຮ່ວມຄະດີແພ່ງຢູ່ທີ່ປະຊຸມສານໃນໄລຍະຜ່ານມາ, ທິດທາງປັບປຸງ ແລະ ຍົກສູງຄຸນນະພາບກ່ຽວກັບວຽກງານດັ່ງກ່າວໃນຊຸມປີຕໍ່ໜ້າ. ອັນທີເຈັດແມ່ນພິຈາລະນາ ແລະ ຮັບຮອງເອົາບົດລາຍງານກ່ຽວກັບການດໍາເນີນຄະດີຢູ່ສານຂັ້ນຕົ້ນ ແລະສານອຸທອນໄລຍະຜ່ານມາ, ທິດທາງປັບປຸງ ແລະ ຍົກສູງວຽກງານດັ່ງກ່າວໃນຊຸມປີຕໍ່ໜ້າ.ອັນທີແປດແມ່ນພິຈາລະນາຮັບຮອງເອົາການແຕ່ງຕັ້ງຮອງປະທານກໍາມາທິການກົດໝາຍຂອງສະພາແຫ່ງຊາດຕາມການສະເໜີຂອງຄະນະປະຈໍາສະພາແຫ່ງຊາດ. ອັນທີເກົ້າແມ່ນພິຈາລະນາຮັບຮອງເອົາບົດລາຍງານກ່ຽວກັບການປະຕິບັດໜ້າທີ່ຂອງຄະນະປະຈໍາສະພາແຫ່ງຊາດລະຫວ່າງສອງກອງປະຊຸມສະພາແຫ່ງຊາດ ແລະ ທິດທາງວຽກງານ 9 ເດືອນປະຈໍາປີ 2017 ໃນຕໍ່ໜ້າ. ອັນທີສິບແມ່ນພິຈາລະນາຮັບຮອງເອົາກົດໝາຍສ້າງໃໝ່, ກົດໝາຍສະບັບປັບປຸງ ແລະ ປະກອບຄໍາເຫັນໃສ່ກົດໝາຍທາບທາມລວມມີ 14 ສະບັບ, ໃນນັ້ນມີກົດໝາຍສ້າງໃໝ່ 4 ສະບັບ, ກົດໝາຍສະບັບປັບປຸງມີ 9 ສະບັບ ແລະ ກົດໝາຍທາບທາມມີ 1 ສະບັບ. ນີ້ແມ່ນບັນດາໜ້າວຽກ ແລະ ແຜນງານຕ່າງໆທີ່ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ 8 ຈະໄດ້ນໍາເອົາມາຄົ້ນຄວ້າ, ແກະໄງ້ ແລະ ແກ້ໄຂໃຫ້ໄປຕາມປ່ອງລ່ອງຕາມແປວ ແລະ ມີຜົນປະໂຫຍດຕາມມາໃຫ້ຊາດ ແລະ ປະຊາຊົນ.
ເຖິງຢ່າງໃດກໍດີ, ຕາມມະຫາຊົນ ກໍຄືປວງຊົນລາວທັງຊາດຮຽກຮ້ອງຕ້ອງການຢາກໃຫ້ສະພາ ກໍຄືລັດຖະບານແກ້ໄຂໂດຍຊິ້ນເຊີງນັ້ນແມ່ນສິ່ງຫຍໍ້ທໍ້ຕ່າງໆທີ່ມັນຍັງກົດໜ່ວງຄວາມຈະເລີນຂອງຊາດ ຄືອັນທີໜຶ່ງແມ່ນການສໍ້ລາດບັງຫລວງ, ອັນທີສອງແມ່ນບັນຫາຢາເສບຕິດ,ອັນທີສາມແມ່ນການປະຕິບັດຕົວບົດກົດໝາຍຕ້ອງເດັດຂາດ ແລະ ເຂັ້ມງວດ ບໍ່ໃຫ້ເຮັດຄືໂສ້ບໍ່ເຄັ່ງ, ເວົ້າໜ້ອຍຕ້ອງເຮັດໃຫ້ຫລາຍໆ. ສ່ວນວ່າອັນສຸດທ້າຍເວົ້າເລື່ອງແຜນວຽກ, ແຜນງານ, ແຜນຄົນ, ແຜນເງິນຕ້ອງໄປພ້ອມກັນເພືອບໆ ຫລຸດຊ່ອງຫວ່າງຊ່ອງໂຫວ່ຫັນສູ່ການປະຢັດຢ່າງເຄັ່ງຄັດ ແລະ ເຕັມຮູບແບບ ທັງນີ້ກໍເພື່ອສ້າງເງື່ອນໄຂໃຫ້ການພັດທະນາກ້າວໄປຢ່າງໄວວາ ແລະ ບໍ່ຢຸດຢັ້ງ. ຂໍໃຫ້ກອງປະຊຸມສະພາຊຸດນີ້ຈົ່ງປະສົບຜົນສໍາເລັດຢ່າງຈົບງາມ.
