ຮອງນາຍົກເນັ້ນໃຫ້ຮັບປະກັນຄວາມສະຫງົບໃນໂຄງການກໍ່ສ້າງທາງລົດໄຟລາວ-ຈີນ

ໃນໂອກາດເຂົ້າຮ່ວມເປັນປະທານກອງປະຊຸມປຶກສາຫາລືກ່ຽວກັບການປະສານງານວຽກງານ ປກສ-ປກຊ ຂອງໂຄງການທາງລົດໄຟລາວ-ຈີນ ທີ່ນະ ຄອນຫລວງພະບາງໃນທ້າຍອາທິດຜ່ານມາຂອງທ່ານ ບຸນທອງ ຈິດມະນີ ຮອງນາຍົກລັດຖະມົນຕີ, ປະທານຄະນະກວດກາສູນກາງພັກ-ລັດ, ທັງຫົວໜ້າອົງ ການຕ້ານການສໍ້ລາດບັງຫລວງຂັ້ນສູນກາງ, ເຊິ່ງພາຍຫລັງໄດ້ຮັບຟັງການລາຍງານສະພາບການຄຸ້ມຄອງ, ການປ້ອງກັນຄວາມສະຫງົບໂຄງການກໍ່ສ້າງທາງລົດໄຟລາວ-ຈີນ ແຕ່ລະໄລຍະ, ແຕ່ລະຊ່ວງ, ສະພາບຄວາມຫຍຸ້ງຍາກ ແລະ ປະກົດການຫຍໍ້ທໍ້ຕ່າງໆທີ່ເກີດຂຶ້ນໃນໄລຍະຜ່ານມາ, ລວມທັງການຊອກວິທີແກ້ໄຂ, ການປ້ອງກັນຄວາມສະຫງົບໃນຂອບເຂດບໍລິເວນໂຄງການກໍ່ສ້າງຈາກບັນດາພາກສ່ວນທີ່ກ່ຽວຂ້ອງແລ້ວ, ທ່ານຮອງນາຍົກລັດຖະມົນຕີໄດ້ເນັ້ນໃຫ້ຄະນະນໍາຂອງບັນດາແຂວງທີ່ມີເສັ້ນທາງລົດໄຟຜ່ານ, ບັນດາຄະນະນໍາກະຊວງກ່ຽວຂ້ອງຕ່າງໆ ລວມທັງບັນດາບໍລິສັດຮັບເໝົາກໍ່ສ້າງເສັ້ນທາງລົດໄຟລາວ-ຈີນ ເອົາໃຈໃສ່ຕໍ່ວຽກງານ ປກສ-ປກຊ, ບໍ່ໃຫ້ມີປາກົດການຫຍໍ້ທໍ້ທີ່ບໍ່ດີຕ່າງໆເກີດຂຶ້ນ ແລະ ພ້ອມທັງຮຽກຮ້ອງໃຫ້ພາກສ່ວນກ່ຽວຂ້ອງນັບທັງສູນກາງ ແລະ ທ້ອງຖິ່ນ ໂດຍສະເພາະຄະນະຄຸ້ມຄອງໂຄງການກໍ່ສ້າງທາງລົດໄຟລາວ-ຈີນ, ກະຊວງປ້ອງກັນປະເທດ, ກະຊວງປ້ອງກັນຄວາມສະຫງົບ, ບັນດາແຂວງທີ່ທາງລົດໄຟຜ່ານ, ບໍລິສັດຮັບເໝົາກໍ່ສ້າງໃນແຕ່ລະສັນຍາໃຫ້ພ້ອມກັນເອົາໃຈໃສ່ສ້າງແບບແຜນໃນການປະສານງານຢ່າງກົມກຽວແໜ້ນ, ປະຕິບັດໜ້າທີ່ຂອງໃຜລາວໃຫ້ມີປະສິດທິພາບສູງກວ່າເກົ່າ, ຮັບປະກັນໃຫ້ໂຄງການກໍ່ສ້າງທາງລົດໄຟລາວ-ຈີນ ດຳເນີນໄປດ້ວຍຄວາມສະຫງົບປອດໄພ ແລະ ສຳເລັດຕາມແຜນການທີ່ວາງໄວ້.