ສະຖິຕິທີ່ຫນ້າສົນໃຈ ຫລັງທີມຊາດອັງກິດ ຊະນະ ນ້ອງໃຫມ່ ປານາມາ 6-1 ບານໂລກ 2018
ບານໂລກ 2018 ຮອບແບ່ງກຸ່ມນັດທີ 2 ຂອງກຸ່ມຈີ ວັນທີ 24 ມິຖຸນາ ທີມຊາດອັງກິດ ແຊ້ມໂລກປີ 1966 ໄລ່ຖະຫລົ່ມນ້ອງໃຫມ່ ປານາມາ 6-1 ຈາກ ແຮຣີ ເຄນ ກອງຫນ້າຈາກສະເປີ 3 ປະຕູ, ຈ໋ອນ ສະໂຕນ ກອງຫລັງຈາກແມນຊິຕີ້ 2 ປະຕູ ແລະ ເຈັສຊີ້ ລິນກ໊າດ ປີກຕົວບຸກຈາກແມນຢູ 1 ປະຕູ.
ທີມຊາດອັງກິດ ຊະນະ 2 ນັດທຳອິດໃນຮອບແບ່ງກຸ່ມບານໂລກ ເປັນຄັ້ງທີ 3 ຕໍ່ຈາກປີ 1982 ແລະ 2006 ແລະ ເປັນການຊະນະຄູ່ແຂ່ງຂາດສຸດໃນລາຍການລະດັບສາກົນເຊັ່ນ: ບານໂລກ ແລະ ຢູໂຣ.
ຈ໋ອນ ສະໂຕນ ກາຍເປັນກອງຫລັງທີມຊາດອັງກິດຄົນທຳອິດ ຍິງ 2 ປະຕູໃນນັດດຽວ ໃນບານໂລກຮອບສຸດທ້າຍ. ແຮຣີ ເຄນ ກາຍເປັນນັກເຕະຄົນທີສອງ ຍິງຢ່າງຕໍ່າ 2 ປະຕູ 2 ນັດຕິດຕໍ່ກັນ ໃນການເຂົ້າຮ່ວມບານໂລກ ຄັ້ງທຳອິດຕໍ່ຈາກ ເກີເຊກໍຣ ລາໂຕ້ ກອງຫນ້າທີມຊາດໂປແລນ ໃນປີ 1974 ຊຶ່ງ ລາໂຕ້ ໄດ້ລາງວັນດາວຍິງສູງສຸດໃນຄັ້ງນັ້ນ.
ປັດຈຸບັນ ແຮຣີ ເຄນ ຍິງ 5 ປະຕູ ຈາກ 2 ນັດ ນຳດາວຍິງສູງສຸດໃນບານໂລກຄັ້ງນີ້ ນຳ ຄຣິສເຕຍໂນ ໂຣນັລໂດ້ ຈາກໂປຣຕຸເກສ ແລະ ໂຣເມຣູ ລູກາກູ ຈາກເບວຢ້ຽມ 1 ປະຕູ. ນອກຈາກນີ້ ແຮຣີ ເຄນ ກາຍເປັນນັກເຕະອັງກິດຄົນທີ 3 ສາມາດຍິງແຮັດທຣິກໃນບານໂລກຮອບສຸດທ້າຍ ຕໍ່ຈາກ ເຈັຟ ເຮີດສ໌(Geoff Hurst) ໃນປີ 1966 ແລະ ແກຣີ ລາຍເກີ (Gary Lineker) ປີ 1986. ຂະນະທີ່ ເຟລິບເປ້ ບາລອຍ (Felipe Baloy) ຍິງປະຕູປະຫວັດສາດໃຫ້ທີມຊາດປານາມາ ໃນການເຂົ້າຮ່ວມບານໂລກ ຄັ້ງທຳອິດ.
ໃນກຸ່ມນີ້ ຜ່ານໄປ 2 ນັດ ອັງກິດ ແລະ ເບວຢ້ຽມ ເຂົ້າຮອບ 16 ທີມແນ່ນອນແລ້ວ ມີ 6 ຄະແນນ ປະຕູໄດ້ເສຍເທົ່າກັນ ຍິງ 8 ເສຍ 2 ແຕ່ອັງກິດມີໃບເຫລືອງຫນ້ອຍກວ່າ ເບວຢ້ຽມ 1 ໃບ, ເບວຢ້ຽມ 3 ໃບ ອັງກິດ 1 ໃບ. ຂະນະທີ່ ຕູນີເຊຍ ແລະ ປານາມາ ບໍ່ມີຄະແນນຕົກຮອບ. ນັດສຸດທ້າຍຈະແຂ່ງຂັນໃນວັນທີ 28 ມິຖຸນານີ້ ອັງກິດ ພົບ ເບວຢ້ຽມ ແລະ ປານາມາ ພົບ ຕູນີເຊຍ ແຂ່ງພ້ອມກັນເວລາ 01:00.
