ເຜີຍແຜ່ກິລາຕໍ່ສູ້ປ້ອງກັນຕົວ

ການສະແດງທັກສະກິລາຕໍ່ສູ້ປ້ອງກັນຕົວ (ເທຄວັນໂດ) ຂອງຄະນະນັກສຶກສາມະຫາວິທະຍາໄລ ໂກຊິນ (KOSIN) ສ ເກົາຫລີ ຈັດຂຶ້ນວັນທີ 21 ມິຖຸນາຜ່ານມາ ທີ່ໂຮງຮຽນມັດທະຍົມສົມບູນໜອງບອນ ມີທ່ານ ສົມພອນ ສອນດາລາ ຮອງຫົວໜ້າພະແນກສຶກສາທິການ ແລະ ກິລາ ນະຄອນຫລວງວຽງຈັນ, ທ່ານ ລີ ຈອງ ກິ ຄູເຝິກກິລາເທຄວັນໂດ ຂອງມະຫາວິທະຍາໄລໂກຊິນ ພ້ອມດ້ວຍຄູ-ອາຈານ ແລະ ນ້ອງນັກຮຽນເຂົ້າຮ່ວມ.

ການສະແດງຄັ້ງນີ້ຂອງຄະນະນັກສຶກສາມະຫາວິທະຍາໄລ ໂກຊິນ ຈໍານວນ 23 ຄົນ ເພື່ອເປັນການເຜີຍແຜ່ທັກສະຂອງກິລາເທຄວັນໂດໃຫ້ແກ່ນ້ອງໆນັກຮຽນໄດ້ຮຽນຮູ້ເຂົ້າໃຈ ແລະ ຍັງເປັນການສ້າງແຮງຈູງໃຈແກ່ນ້ອງນັກຮຽນຫັນມາຫລິ້ນກິລາເພື່ອສຸຂະພາບ ແລະ ຫ່າງໄກຈາກສິ່ງເສບຕິດຕ່າງໆ.

ທ່ານ ຄັງ ເຊິງວອນ ຜູ້ຊ່ຽວຊານກິລາເທຄວັນໂດ ປະຈໍາພະແນກສຶກສາທິການ ແລະ ກິລາ ນະຄອນຫລວງວຽງຈັນ ຍັງໄດ້ມອບຂອງຂວັນໃຫ້ແກ່ທ່ານຮອງຫົວໜ້າພະແນກສຶກສາທິການ ແລະ ກິລາ ນະຄອນຫລວງວຽງຈັນ ແລະ ຕາງໜ້າຜູ້ອໍານວຍການໂຮງຮຽນພ້ອມ ພິເສດທ່ານ ລີ ຈອງ ກິ ຍັງໄດ້ນໍາເອົາອຸປະກອນກິລາເທຄວັນໂດ (ຊຸດຢູນີຟອມ 5 ຊຸດ ແລະ ເປົ້າເຕະ 2 ອັນ) ມອບໃຫ້ແກ່ໂຮງຮຽນດັ່ງກ່າວອີກດ້ວຍ.