ສຸກອາພອນ ຍ້າຍຮ່ວມ ສີສະເກດ ເອັຟຊີ ທີມຈາກໄທລີກ 2
ທ້າວ ສຸກອາພອນ ວົງຈຽງຄໍາ ອະດີດນັກກິລາກອງໜ້າທີມຊາດລາວ ຍ້າຍຮ່ວມ ສະໂມສອນ ສີສະເກດ ເອັຟຊີ ຈາກໄທລີກ 2 ໃນວັນທີ 21 ມິຖຸນາຜ່ານມານີ້ ໄດ້ປະກາດເປັນທາງການດ້ວຍການເຊັນສັນຍາເພື່ອກຽມເຂົ້າຮ່ວມໄທລີກ 2 ໃນຮອບຂາກັບ.
ທ້າວ ສຸກອາພອນ ວົງຈຽງຄຳ ເກີດໃນວັນທີ 9 ມີນາ 1992 ເກີດຢູ່ບ້ານດອນຕະຫລາດ ເມືອງ ຈຳປາສັກ ແຂວງຈຳປາສັກ ເຊິ່ງເປັນອະດີດນັກເຕະເຍົາວະຊົນມາຈາກສະໂມສອນ ເອັສຣາ ເອັຟຊີ, ເຄີຍຫລິ້ນໃຫ້ກັບ ສະໂມສອນ ບີອີຊີເທໂລ (ລຸ້ນເຍົາວະຊົນ ລຸ້ນດຽວກັບ ຊະນາທິບ ສົງກະສິນ), ກະບີ່ ເອັຟຊີ, ພິດສະນຸໂລກ ເອັຟຊີ, ກັລ ສາລະບູລີ ເອັຟຊີ, ລ້ານຊ້າງ ຢູໄນເຕັດ ແລະ ນະຄອນຫລວງ ຢູໄນເຕັດ. ສ່ວນຜົນງານລະດັບທີມຊາດ ເປັນກຳລັງຫລັກໃຫ້ແກ່ທີມຊາດລາວນັບແຕ່ຊຸດເຍົາວະຊົນ 14 ປີ, 16 ປີ, 19 ປີ, 23 ປີ ແລະ ຊຸດໃຫຍ່ຫລ້າສຸດໃນປີ 2016 AFF SUZUKI CUP 2016 ຮອບຄັດເລືອກຢູ່ທີ່ປະເທດກຳປູເຈຍ.
ມາຮອດປັດຈຸບັນ ໃນປີ 2018 ມີນັກເຕະລາວ ທີ່ໄດ້ເຊັນສັນຍາເປັນທາງການຮ່ວມສະໂມສອນຈາກ ໄທ ປະກອບມີທ້າວ ພັດທະນາ ພົມມະເທບ ສະໂມສອນ ສຸຣາດທານີ ເອັຟຊີ, ທ້າວ ພຸດທະໄຊ ໂຄຈະເລີນ ສະໂມສອນ ນະຄອນປະຖົມ ຢູໄນເຕັດ, ທ້າວ ຈັນທະພອນ ແຫວນວົງສົດ ສະໂມສອນ ນ່ານ ເອັຟຊີ, ທ້າວ ທົດນີລາດ ສີບຸນເຮືອງ ສະໂມສອນ ສະຫມຸດປະການ ເອັຟຊີ ແລະ ທ້າວ ມິດສະດາ ສາຍໄຕ້ຟ້າ ສະໂມສອນ ປັດຕານີ ເອັຟຊີ.
