ໂອເປັກຈະເພີ່ມການຜະລິດນ້ຳມັນ
ໂອເປັກ ຈະເພີ່ມກຳລັງການຜະລິດນ້ຳມັນອີກວັນລະ 1 ລ້ານບາເຣລ ມີຜົນ 1 ກໍລະກົດນີ້ເປັນຕົ້ນໄປ, ພາຍຫລັງເຄີຍຕົກລົງຫລຸດເພດານການຜະລິດລົງນັບແຕ່ປີ 2016 ເພື່ອຮັກສາສົມດູນໃນຕະຫລາດນ້ຳມັນໂລກ.
ກອງປະຊຸມກຸ່ມປະເທດຜູ້ສົ່ງອອກນ້ຳມັນ ຫລື ໂອເປັກ ໄດ້ຂໍ້ສະຫລຸບ ຈະເພີ່ມກຳລັງການຜະລິດນ້ຳມັນອີກວັນລະ 1 ລ້ານບາເຣລ ມີຜົນແຕ່ວັນທີ 1 ກໍລະກົດນີ້ເປັນຕົ້ນໄປ, ຫລັງຈາກສະມາຊິກໂອເປັກ ເຄີຍຕົກລົງຫລຸດເພດານການຜະລິດລົງວັນລະ 1,2 ລ້ານບາເຣລ ແຕ່ປີ 2016 ເພື່ອຮັກສາສົມດູນໃນຕະຫລາດນ້ຳມັນໂລກ ສົ່ງຜົນໃຫ້ລາຄານ້ຳມັນເພີ່ມສູງຂຶ້ນເຖິງ 80 ໂດລາສະຫະລັດຕໍ່ບາເຣລ ຈາກທີ່ເຄີຍຕົກຕໍ່າລົງເຫລືອພຽງ 27 ໂດລາສະຫະລັດຕໍ່ບາເຣລ ໃນທ້າຍປີ 2016.
ການເພີ່ມກຳລັງການຜະລິດ 1 ລ້ານບາເຣລຕໍ່ວັນ ຈະສອດຄ່ອງກັບທີ່ອາຣັບບີ ຊາອຸດິດ ສະເໜີກ່ອນໜ້ານີ້. ຂະນະທີ່ຣັດເຊຍສະເໜີໃຫ້ປັບເພີ່ມຂຶ້ນ 1,5 ລ້ານບາເຣລຕໍ່ວັນ, ແຕ່ເນື່ອງຈາກສະມາຊິກໂອເປັກບາງປະເທດບໍ່ສາມາດເພີ່ມກຳລັງການຜະລິດນ້ຳມັນ ເນື່ອງຈາກຂັດຂ້ອງຈາກປັດໄຈພາຍໃນປະເທດ.
