ທະນາຄານແຫ່ງ ສປປ ລາວ ເຕືອນໃຫ້ລະວັງມີກຸ່ມຄົນບໍ່ດີນຳເງີນຕາປອມມາຈຳໜ່າຍ
ເມື່ອທ້າຍອາທິດຜ່ານມານີ້, ທະນາຄານແຫ່ງ ສປປ ລາວ ໄດ້ອອກແຈ້ງເຕືອນປະຊາຊົນ, ຊາວຄ້າຂາຍໃນຂອບເຂດທົ່ວປະເທດ ໃຫ້ເພີ່ມທະວີສະຕິລະວັງຕົວໃນການນຳໃຊ້ເງີນຕາຕ່າງປະເທດເຂົ້າໃນການຊຳລະຕ່າງໆ, ຫລັງຈາກໄດ້ຮັບລາຍງານວ່າ: ປັດຈຸບັນໄດ້ມີກຸ່ມຄົນບໍ່ດີຊາວຕ່າງຊາດນຳເງີນຕາຕ່າງປະເທດປອມ (ເງີນໂດລາສະຫະລັດ) ເຂົ້າມາຈໍລະຈອນຢູ່ບັນດາແຂວງພາກເຫນືອຂອງ ສປປ ລາວ ເປັນຈຳນວນຫລາຍ ແລະ ຕໍ່ສະພາບທີ່ບໍ່ດີດັ່ງກ່າວ, ທະນາຄານແຫ່ງ ສປປ ລາວ ຂໍແຈ້ງມາຍັງປະຊາຊົນບັນດາເຜົ່າໃນທົ່ວປະເທດ ໃຫ້ເພີ່ມທະວີເອົາໃຈໃສ່ ແລະ ມີສະຕິໃນການກວດກາເງີນຕາຕ່າງປະເທດທີ່ຕົນເອງນຳໃຊ້ ແລະ ການຖືຄອງຕ່າງໆ ເພື່ອຫລີກລ່ຽງຜົນເສຍຫາຍທີ່ຈະເກີດຂຶ້ນ ຂ່າວຍໃຫ້ຮູ້ຕື່ມວ່າ: ເມື່ອບໍ່ດົນມານີ້, ເຈົ້າໜ້າທີ່ ປກສ ເມືອງຈັນທະບູລີ ສາມາດຈັບຕົວກຸ່ມແກ້ງທີ່ເຄື່ອນໄຫວນຳເງີນປອມມາຈຳໜ່າຍໄດ້ 6 ຄົນຄື: ທ້າວ ບັນຊາ ອາຍຸ 55 ປີ, ທ້າວ ອ່ອນມະນີ ອາຍຸ 43 ປີ, ທ້າວ ສັນນະຄອນ ອາຍຸ 22 ປີຢູ່ເມືອງບໍລິຄັນແຂວງບໍລິຄຳໄຊ, ທ້າວ ສີຄອນ ອາຍຸ 66 ປີ, ທ້າວ ພູໄຊ ອາຍຸ 42 ປີ, ນາງ ສຸພັດຕາ ອາຍຸ 34 ປີຢູ່ເມືອງສີໂຄດຕະບອງນະຄອນຫລວງວຽງຈັນ, ພ້ອມຂອງກາງເງີນຕາປອມຈຳນວນ 66 ພັນບາດ (ສະກຸນເງີນໄທ) ແລະ 11 ລ້ານກ່ວາກີບ.
ຜ່ານການສືບສວນ-ສອບສວນຂອງເຈົ້າໜ້າທີ່ພວກກ່ຽວໄດ້ຮັບສາລະພາບວ່າ: ໄດ້ນຳເອົາເງີນຕາປອມມາຈາກກຸ່ມແກ້ງດຽວກັນຢູ່ແຂວງບໍລິຄຳໄຊ, ຈາກນັ້ນ ໄດ້ເອົາມາຈຳໜ່າຍຢູ່ໃນຕະລາດ, ໂດຍການແລກປ່ຽນຊື້-ຂາຍໃນສັງຄົມ ກ່ອນຖືກເຈົ້າໜ້າທີ່ຈັບຕົວມາດຳເນີນຄະດີຕາມລະບຽບກົດໝາຍ.
ທະນາຄານແຫ່ງ ສປປ ລາວ ຍັງແຈ້ງວ່າ: ໃນກໍລະນີພົບເຫັນໃບເງີນຕາຕ່າງປະເທດປອມ ຫລື ສົງໃສເປັນເງີນຕາຕ່າງປະເທດປອມແປງ ກະລຸນາແຈ້ງໄປຍັງກົມບໍລິການທະນາຄານແຫ່ງ ສປປ ລາວ ໝາຍເລກໂທລະສັບ 021-264036 ຫລື 020-54792626 ຫລື ສາຂາທະນາຄານແຫ່ງ ສປປ ລາວ ປະຈຳພາກ, ເພື່ອກວດກາຢັ້ງຢືນ ແລະ ປະສານສົມທົບກັບເຈົ້າໜ້າທີ່ດຳເນີນການກວດກາແຫລ່ງທີ່ມາຕາມຂັ້ນຕອນລະບຽບກົດໝາຍ.
