ຮອງນາຍົກລັດຖະມົນຕີ ສອນໄຊ ສີພັນດອນຢ້ຽມຢາມກຸ່ມບໍລິສັດການບິນອາວະກາດຈີນ
ໃນວັນທີ 20 ມິຖຸນານີ້, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ປະທານຄະນະກໍາມະການຄຸ້ມຄອງອິນເຕີເນັດແຫ່ງຊາດ ພ້ອມຄະນະໄດ້ໄປຢ້ຽມຢາມ ແລະ ເຮັດວຽກຢູ່ສໍານັກງານໃຫຍ່ກຸ່ມບໍລິສັດການບິນອາວະກາດຈີນທີ່ນະຄອນຫລວງປັກກິ່ງ, ໂດຍໄດ້ຮັບການຕ້ອນຮັບຈາກທ່ານ ຢ້າງ ປາວຫົວ ຮອງຜູ້ອໍານວຍການໃຫຍ່ກຸ່ມບໍລິສັດວິທະຍາສາດ-ເຕັກໂນໂລຊີ ການບິນອາວະກາດຈີນ (CASC) ພ້ອມ ດ້ວຍຄະນະຢ່າງອົບອຸ່ນ.
ກຸ່ມບໍລິສັດ ວິທະຍາສາດ-ເຕັກໂນໂລຊີ ການບິນອາວະກາດຈີນ (CASC) ແມ່ນລັດວິສາຫະກິດທີ່ມີເຕັກໂນໂລຊີສູງ ເປັນເຈົ້າຂອງລິຂະສິດຊັບສິນທາງປັນຍາ ເຊິ່ງເປັນຍີ່ຫໍ້ທີ່ມີຊື່ສຽງໂດ່ງດັ່ງ, ມີຄວາມສາມາດຄົ້ນຄວ້າປະດິດສ້າງອັນພົ້ນເດັ່ນ ແລະ ແຂ່ງຂັນທີ່ແຂງແຮງທີ່ສໍາຄັນທີ່ສຸດ, ເປັນ 1 ໃນແຖວໜ້າຈໍານວນ 500 ບໍລິສັດໃນໂລກ, ໂດຍປະຕິບັດໜ້າທີ່ທົດສອບການອອກແບບ ແລະ ການຜະລິດ, ຜະລິດຕະພັນອາວະກາດ ແລະ ອາວຸດທີ່ເປັນລະບົບ, ເຊິ່ງໃນນັ້ນລວມທັງຍານສົ່ງ, ດາວທຽມທຸກຊະນິດ, ຍານອາວະກາດທີ່ມີຄົນຂັບ, ຍານອາວະກາດຂົນສົ່ງວັດຖຸ, ພາຫະນະສໍາຫລວດຊ່ວງເລິກອາວະກາດ, ສະຖານີອາວະກາດ ແລະ ອື່ນໆ.
ສໍາລັບສະຖາບັນເຕັກໂນໂລຊີ ກໍແມ່ນໜຶ່ງໃນສາຂາຂອງກຸ່ມບໍລິສັດວິທະຍາສາດເຕັກໂນໂລຊີ ການບິນອາວະກາດຈີນ ທີ່ເປັນສູນກາງຜະລິດຍານສົ່ງອາວຸດ ແລະ ລູກສອນໄຟໃຫຍ່ທີ່ສຸດຂອງປະເທດຈີນ, ເຊິ່ງປະຕິບັດໜ້າທີ່ການທົດສອບ, ການອອກແບບ, ການຄົ້ນຄວ້າ ແລະ ການຜະລິດຢ່າງຄົບຊຸດ. ນອກນີ້ ຍັງເປັນບ່ອນລິເລີ່ມການບິນອາວະກາດຂອງປະເທດຈີນ.
ສ່ວນບໍລິສັດ ຊາຍນາ ລອກເກັດ (China Rocket) ແມ່ນສາຂາຂອງສະຖາບັນເຕັກໂນໂລຊີຍານສົ່ງແຫ່ງ ສປ ຈີນ ແລະ ເປັນເວທີສາກົນໜຶ່ງໃນດ້ານການບິນອາວະກາດແບບທຸລະກິດ ແລະ ຫັນການນໍາໃຊ້ເຕັກໂນໂລຊີອາວະກາດຈີນໄປສູ່ສາກົນ ໂດຍທຸລະກິດຫລັກແມ່ນບໍລິການສົ່ງດາວທຽມ, ການນໍາໃຊ້ລະບົບເຄືອຂ່າຍຂໍ້ມູນຂ່າວສານ ເພື່ອສື່ສານເຊື່ອມຕໍ່ທັງພາກອາວະກາດ ແລະ ທັງພາກພື້ນດິນເວົ້າລວມ, ເວົ້າສະເພາະເປັນຜູ້ຮັບເໝົາລວມໂຄງການດາວທຽມລາວ ແລະ ເປັນຂາຫຸ້ນຮ່ວມບໍລິສັດດາວທຽມລາວເອເຊຍ-ປາຊີຟິກ ຈໍາກັດອີກດ້ວຍ.
ໃນໂອກາດນີ້, ທ່ານ ຫານ ສີ້ງຜີ້ງ ຮອງປະທານສະພາບໍລິຫານບໍລິສັດ China Rocket ໄດ້ລາຍງານສະພາບການດໍາເນີນທຸລະກິດຂອງບໍລິສັດ Laosat ໃຫ້ຄະນະຂອງທ່ານຮອງນາຍົກລັດຖະມົນຕີຊາບວ່າ: ໃນວັນທີ 21 ພະຈິກ 2015 ໄດ້ສົ່ງດາວທຽມ Laosat 1 ສູ່ອາວະກາດປະສົບຜົນສໍາເລັດ ແລະ ໃນວັນທີ 25 ກຸມພາ 2016 ບໍລິສັດດາວທຽມລາວ ກໍໄດ້ຮັບການສ້າງຕັ້ງຂຶ້ນ, ເຊິ່ງມີ 4 ພາກສ່ວນຮ່ວມຫຸ້ນນໍາກັນ, ໜຶ່ງໃນນັ້ນກໍມີລັດຖະບານລາວ.
ໂຄງການດາວທຽມລາວ, ແມ່ນໝາກຜົນທີ່ສະແດງເຖິງສາຍພົວພັນຄູ່ຮ່ວມມືຍຸດທະສາດຮອບດ້ານທີ່ໄດ້ຮັບການສະໜັບສະໜູນ ແລະ ການຊຸກຍູ້ຊ່ວຍເຫລືອຂອງການນໍາຂັ້ນສູງຂອງສອງປະເທດລາວ-ຈີນ ຕະຫລອດມາ. ໃນໄລຍະຜ່ານມາ ດາວທຽມລາວ ໄດ້ປະກອບສ່ວນຊຸກຍູ້ການພັດທະນາຂະແໜງວິທະຍາສາດ ແລະ ເຕັກໂນໂລຊີ ລະດັບສູງຂອງປະເທດລາວ ແລະ ພາຍຫລັງໄດ້ປ່ອຍສູ່ວົງໂຄຈອນ ກໍໄດ້ເລີ່ມປ່ອຍສັນຍານໃຫ້ບໍລິການໂດຍແມ່ນລັດຖະບານລາວ ແລະ ບໍລິສັດຈີນ ໄດ້ຮ່ວມກັນສ້າງຕັ້ງເປັນບໍລິສັດຮ່ວມທຶນມີອາຍຸການນຳໃຊ້ 15 ປີ, ໂດຍຖືເອົາຕະຫລາດລາວ ເປັນຈຸດເລີ່ມຕົ້ນ ແລະ ຂະຫຍາຍຕະຫລາດໂທລະຄົມມະນາຄົມທາງດາວທຽມໄປໃນຂົງເຂດອະນຸພາກພື້ນ ກວມເອົາຫລາຍກວ່າ 30 ປະເທດໃນອາຊີ-ປາຊີຟິກ ທີ່ນອນໃນແຖບເສດຖະກິດເສັ້ນທາງສາຍໄໝ ເພື່ອອຳນວຍຄວາມສະດວກໃຫ້ແກ່ການຖ່າຍທອດສົດໂທລະພາບຜ່ານດາວທຽມ, ທັງເປັນການເຕົ້າໂຮມເອົາລະບົບໂທລະຄົມມະນາຄົມດ້ານດາວທຽມ, ບໍລິການທາງເຂົ້າຈຸດເຊື່ອມອິນເຕີເນັດບໍ່ໃຊ້ສາຍ ດ້ວຍຄວາມໄວສູງ ແລະ ບໍລິການອື່ນໆ. ມາຮອດປັດຈຸບັນ, ເປັນໄລຍະເວລາກວ່າ 3 ປີບໍລິສັດສາມາດບໍລິການຮັບ-ສົ່ງໂທລະພາບຈຳນວນ 130 ຊ່ອງ, ເຊິ່ງລວມມີ ຊ່ອງລາວ, ຈີນ ແລະ ຊ່ອງຕ່າງປະເທດ, ໂດຍສາມາດຕອບສະໜອງຄວາມຕ້ອງການຮັບຊົມໂທລະພາບຂອງປະຊາຊົນລາວ, ເຊິ່ງມີລູກຄ້າຈໍານວນ 30 ພັນຄອບຄົວ ແລະ ວາງແຜນຈະພະຍາຍາມສູ້ຊົນໃຫ້ໄດ້ລູກຄ້າ 5 ແສນຄອບຄົວໃນຕໍ່ໜ້າ. ນອກ ຈາກຜົນສໍາເລັດທີ່ກ່າວມານັ້ນ, ບໍລິສັດຍັງເຫັນວ່າມີສິ່ງທ້າທາຍຈໍານວນໜຶ່ງ ເປັນຕົ້ນ: ຈໍານວນປະລິມານອັດຕາການເຊົ່າຊົມໃຊ້ຂອງຈໍານວນປະຊາກອນພາຍໃນປະເທດລາວຍັງເຫັນວ່າຕໍ່າ, ເນື່ອງຈາກຍັງມີຫລາຍອຸປະກອນຮັບ-ສົ່ງສັນຍານທີ່ນໍາເຂົ້າຈາກພາກສ່ວນອື່ນ, ເຊິ່ງໄດ້ເຮັດໃຫ້ມີຜົນກະທົບທາງດ້ານລາຍຮັບຂອງບໍລິສັດໂດຍກົງ.
ໃນໂອກາດດັ່ງກ່າວ, ທ່ານຮອງນາຍົກລັດຖະມົນຕີ ກໍໄດ້ສະແດງຄວາມຂອບໃຈຕໍ່ລັດຖະບານຈີນ ທີ່ໄດ້ສ້າງເງື່ອນໄຂໃຫ້ລາວໄດ້ມີສິດນໍາໃຊ້ວົງໂຄຈອນຂອງຕົນເອງ, ເຊິ່ງຂົງເຂດອາວະກາດກໍເປັນຂົງເຂດທີ່ສໍາຄັນປະກອບສ່ວນເຮັດໃຫ້ປະເທດໃດໜຶ່ງມີສະຖຽນລະພາບ ແລະ ໝັ້ນຄົງ, ໂດຍສະເພາະແມ່ນການພັດທະນາ ທາງດ້ານເຕັກໂນໂລຊີຂໍ້ມູນຂ່າວສານ, ອັນໄດ້ກາຍເປັນການປະກອບສ່ວນເຂົ້າ ໃນການພັດທະນາເສດຖະກິດ-ສັງຄົມ, ພ້ອມນີ້ ກໍສະແດງຄວາມຍ້ອງຍໍຊົມເຊີຍບໍລິສັດທີ່ໄດ້ພະຍາຍາມສູ້ຊົນບຸກບືນໃນການປະຕິບັດວຽກງານດັ່ງກ່າວ ຈົນໄດ້ຮັບຜົນສໍາເລັດດີຂຶ້ນເປັນກ້າວໆ ແລະ ເພື່ອເຮັດໃຫ້ດາວທຽມລາວໄດ້ຖືກນໍາໃຊ້ຢ່າງມີ ປະສິດທິພາບ ແລະ ມີຜົນປະໂຫຍດສູງສຸດ, ທ່ານຮອງນາຍົກລັດຖະມົນຕີ ໄດ້ສະເໜີໃຫ້ບໍລິສັດນໍາໄປສຶກສາຄົ້ນຄວ້າຕື່ມບາງບັນຫາຄື: (1). ກ່ຽວກັບກົນໄກການຕະຫລາດ ນອກຈາກຕະຫລາດພາຍໃນປະເທດແລ້ວເຫັນຄວນຊອກຫາການຕະຫລາດຢູ່ຕ່າງປະເທດຕື່ມອີກ ເພື່ອສາມາດສ້າງລາຍຮັບໃຫ້ໄດ້ເພີ່ມ, ເນື່ອງຈາກປະຊາກອນ ຢູ່ພາຍໃນປະເທດລາວຍັງມີຈໍານວນໜ້ອຍ. (2) ສະເໜີໃຫ້ບໍລິສັດເອົາໃຈໃສ່ໂຄ ສະນາເຜີຍແຜ່ໃນສັງຄົມ, ໃນເບື້ອງຕົ້ນອາດຈະເນັ້ນໃສ່ປະລິມານລູກຄ້າກ່ອນລາຍຮັບ ຄຽງຄູ່ກັບການປັບປຸງບັນດາຊ່ອງລາຍການໃຫ້ມີລາຍການທີ່ດີ ແລະ ມີຄວາມຮູ້ແກ່ຜູ້ຊົມໃຊ້, ສິ່ງສໍາຄັນແມ່ນເລັ່ງໃສ່ປະຊາຊົນທີ່ຢູ່ເຂດຊົນນະບົດຫ່າງໄກສອກຫລີກ ເພື່ອສ້າງເງື່ອນໄຂໃຫ້ແກ່ເຂົາເຈົ້າ, ອາດຈະມີກົນໄກ ຫລື ນະໂຍບາຍທາງດ້ານລາຄາລະຫວ່າງເຂດຕ່າງໆ, ເນື່ອງຈາກປະຊາຊົນຢູ່ເຂດຊົນນະບົດມີລາຍຮັບໜ້ອຍ, ທັງເປັນຂໍ້ສະດວກໃຫ້ແກ່ການເຜີຍແຜ່ໂຄສະນາແນວທາງນະໂຍບາຍຂອງພັກ-ລັດຖະບານລົງສູ່ຮາກຖານຕົວຈິງ. ຄຽງຄູ່ກັບການສຶກສາເກັບກໍາຂໍ້ມູນບັນດາລາຍການທີ່ຜູ້ຊົມໃຊ້ຢູ່ພາຍໃນລາວສ່ວນຫລາຍມີຄວາມຕ້ອງການຫຍັງແທ້. ແນວໃດກໍຕາມ ໃນອະນາຄົດຍັງເຊື່ອໝັ້ນວ່າການບໍລິການຂອງບໍລິສັດດາວທຽມ Laosat 1 ຈະມີຄຸນນະພາບດີຂຶ້ນ ແລະ ສິ່ງສໍາຄັນຈະມີຕະຫລາດພາຍໃນກວ້າງຂວາງ ແລະ ເພີ່ມຂຶ້ນເປັນລໍາດັບ ເພື່ອປະກອບສ່ວນສ້າງລາຍຮັບເຂົ້າງົບປະມານຫລາຍຂຶ້ນເທື່ອລະກ້າວ.
ໃນວັນດຽວກັນ, ທ່ານຮອງນາຍົກລັດຖະມົນຕີ ສອນໄຊ ສີພັນດອນ ພ້ອມດ້ວຍຄະນະ ຍັງໄດ້ໄປຢ້ຽມຢາມສູນທົດລອງຄວາມປອດໄພທາງອິນເຕີເນັດຂອງບໍລິສັດຫົວເວີຍ ທີ່ມີສໍານັກງານຕັ້ງຢູ່ນະຄອນຫລວງປັກກິ່ງຕື່ມອີກ.
