ນະຄອນຫລວງເລັ່ງລວງຄອງເພື່ອຕ້ານຖ້ວມໃນລະດູຝົນນີ້
ຫົວໜ້າຂະແຫນງຊົນລະປະທານພະແນກກະສິກຳ ແລະ ປ່າໄມ້ນະຄອນຫລວງວຽງຈັນ ໃຫ້ຮູ້ວ່າ: ປັດຈຸບັນ, ການລວງຄອງສຸກເສີນເພື່ອກຽມຮັບມືກັບສະພາບນ້ຳຖ້ວມຂັງໃນລະດູຝົນນີ້ແມ່ນມີຄວາມຄືບໜ້າສົມຄວນ, ໂດຍມີຜູ້ສະເຫນີມາລວງຄອງທັງໝົດ 11 ບໍລິສັດ ແລະ 30 ຜູ້ປະກອບການ ແລະ ສຳເລັດແລ້ວໃນຄວາມຍາວ 42 ພັນກວ່າແມັດເທົ່າກັບ 29,8% ຂອງໜ້າວຽກທັງໝົດ. ໃນນັ້ນເຂດເມືອງໄຊເຊດຖາແບ່ງອອກເປັນ 9 ຈຸດ, ມີຄວາມຍາວ 19 ພັນແມັດ, ແມ່ນ 1 ບໍລິສັດກັບ 8 ຜູ້ປະກອບການ, ເຂດເມືອງສີສັດຕະນາກ ແບ່ງອອກເປັນ 2 ຈຸດ, ມີຄວາມຍາວ 2 ພັນແມັດ, ມີ 1 ບໍລິສັດ ແລະ 1 ຜູ້ປະກອບການປະຕິບັດວຽກງານອະນາໄມຜັກຕົບ ແລະ ຕະກອນສຳເລັດແລ້ວ 100%. ສ່ວນເຂດເມືອງຫາດຊາຍຟອງແບ່ງອອກເປັນ 5 ຈຸດ, ມີຄວາມຍາວທັງໝົດ 7 ພັນກວ່າແມັດ, ມີ 3 ບໍລິສັດ ແລະ 15 ຜູ້ປະກອບການ ເຮັດອະນາໄມຜັກຕົບ ແລະ ຕະກອນສຳເລັດແລ້ວ 11 ພັນກວ່າແມັດ ແລະ ສໍາລັບເຂດເມືອງນາຊາຍທອງແບ່ງອອກເປັນ 4 ຈຸດ, ມີຄວາມຍາວ 18 ພັນແມັດ, ມີ 3 ບໍລິສັດ ແລະ 1 ຜູ້ປະກອບການປະຕິບັດສຳເລັດແລ້ວ 100%.
ຫົວໜ້າຂະແໜງຊົນລະປະທານ ໃຫ້ຮູ້ວ່າ: ນອກຈາກການລວງຄອງສຸກເສີນແລ້ວ, ຍັງໄດ້ເລັ່ງເອົາຜັກຕົບອອກຈາກຮ່ອງລະບາຍນ້ຳຕ່າງໆ, ໂດຍສະເພາະແມ່ນຢູ່ຄອງບຶງທາດຫລວງເຂດຂົວໜອງໜ່ຽງ, ເຂດຂົວຊຳເຄ້ ແລະ ຂົວທາດຫລວງ ແລະ ຈຸດອື່ນໆ ເພື່ອໃຫ້ນໍ້າໃນເຂດບຶງດັ່ງກ່າວໄຫລດີ ແລະ ຮັບປະກັນບໍ່ໃຫ້ມີນ້ຳຖ້ວມຂັງຢູ່ເຂດຕົວເມືອງ.
