ຊົວເຣັສ ຍິງປະຕູໄຊສະຫລອງຮັບໃຊ້ຊາດ 100 ນັດ ພາ ອູຣຸໄກວ ເຂົ້າຮອບ 16 ທີມ ບານໂລກ 2018
ອູຣຸໄກວ ແຊ້ມໂລກ 2 ສະໄຫມ ເອົາຊະນະ ຊາອຸດິອາຣະເບຍ 1-0 ຈາກປະຕູໄຊຂອງ ລຸຍ ຊົວເຣັສ (Luis Suárez) ກອງຫນ້າຈາກ ບາເຊໂລນາ ນາທີ 23 ສະຫລອງການລົງສະຫນາມຮັບໃຊ້ຊາດ 100 ນັດ ແລະ ເປັນດາວຍິງສູງສຸດຂອງທີມຊາດ 52 ປະຕູ, ກາຍເປັນນັກເຕະຄົນທຳອິດຂອງ ອູຣຸໄກວ ຍິງປະຕູໃນບານໂລກຮອບສຸດທ້າຍ 3 ຄັ້ງຕິດຕໍ່ກັນ, ພາ ອູຣຸໄກວ ຜ່ານເຂົ້າຮອບ 16 ທີມສຸດທ້າຍເປັນທີມທີສອງຕໍ່ຈາກເຈົ້າພາບຣັດເຊຍ.
ອູຣຸໄກວ ຊະນະ 2 ນັດທຳອິດໃນບານໂລກຮອບສຸດທ້າຍເປັນຄັ້ງທຳອິດໃນຮອບ 64 ປີ ຫລ້າສຸດປີ 1954 ທີ່ສະວິດເຊີແລນ ແລະ ຊະນະທີມຈາກອາຊີ 4 ນັດຊ້ອນໃນບານໂລກຮອບສຸດທ້າຍ.
ສ່ວນ ຊາອຸດິອາຣະເບຍ ບໍ່ຊະນະໃຜເລີຍໃນ 12 ນັດຫລັງສຸດໃນບານໂລກຮອບສຸດທ້າຍ ແລະ ຍິງບໍ່ໄດ້ 9 ຈາກ 11 ນັດຫລັງສຸດໃນບານໂລກຮອບສຸດທ້າຍ ຕົກຮອບກັບ ເອຢິບ ເສຍສອງນັດຊ້ອນເໝືອນກັນ.
ອູຣຸໄກວ ແລະ ເຈົ້າພາບຣັດເຊຍ ມີ 6 ຄະແນນເທົ່າກັນ ແຕ່ປະຕູໄດ້ເສຍເຈົ້າພາບດີກວ່າ +7 ອູຣຸໄກວ + 2 ນັດສຸດທ້າຍພົບກັນວັດກັນວ່າໃຜຈະເປັນທີ 1 ຂອງກຸ່ມ ຈະແຂ່ງຂັນໃນວັນທີ 25 ມິຖຸນານີ້ ເວລາ 21:00.
