ອີຣານອະນຸຍາດໃຫ້ຜູ້ຍິງເຂົ້າ ສະໜາມບານໂລກເປັນເທື່ອທຳອິດ
ທາງການອີຣານອະນຸຍາດໃຫ້ຜູ້ຍິງເຂົ້າສະໜາມກິລາໃນນະຄອນເຕຮາລານໄດ້ ເພື່ອຮ່ວມຊົມການຖ່າຍທອດສົດບານໂລກ 2018 ທີ່ຣັດເຊຍ ຄູ່ລະຫວ່າງ ອີຣານ ກັບ ສະເປນ ໃນວັນທີ 20 ມິຖຸນາ, ເຖິງວ່າ ອີຣານ ຈະເສຍໄປຢ່າງໜ້າເສຍດາຍ 1-0 ແຕ່ຖືເປັນຄວາມຍິນດີທີ່ຜູ້ຍິງອີຣານໄດ້ເຂົ້າສະໜາມ ເພື່ອຮ່ວມຊົມການແຂ່ງຂັນບານໂລກໄດ້ເປັນເທື່ອທຳອິດໃນຮອບເກືອບ 40 ປີ.
ທີມຊາດອີຣານ ພົບ ສະເປນ ໃນວັນທີ 20 ມິຖຸນາ ເວລາ 01:00 ໂມງ ເປັນການລົງສະໜາມນັດສອງໃນຮອບແບ່ງກຸ່ມບານໂລກ 2018. ຜູ້ຍິງອີຣານໄດ້ເຂົ້າສະໜາມກິລາໃຫຍ່ທີ່ສຸດຂອງປະເທດ ເພື່ອຊົມການແຂ່ງຂັນຜ່ານໜ້າຈໍຂະໜາດໃຫຍ່ໄດ້ເປັນເທື່ອທຳອິດ ນັບແຕ່ການປະຕິວັດອິດສະລາມຂອງອີຣານ ໃນປີ 1979. ສະພາທ້ອງຖິ່ນນະຄອນຫລວງເຕຮາລານລົງມະຕິອະນຸມັດໃນນາທີສຸດທ້າຍ ເຊົ້າວັນທີ 20 ມິຖຸນາ ເພື່ອໃຫ້ຜູ້ຍິງເຂົ້າຊົມການຖ່າຍທອດສົດທີ່ສະໜາມກິລາໄດ້ເປັນເທື່ອທຳອິດ ພາຍຫລັງອາທິດກ່ອນ ອີຣານ ໄດ້ຮັບໄຊຊະນະເທື່ອທຳອິດໃນບານໂລກ ນັບແຕ່ປີ 1998 ເຮັດໃຫ້ຜູ້ຊາຍ ແລະ ຜູ້ຍິງໃນອີຣານ ອອກມາສະແດງຄວາມດີໃຈກັນຖ້ວນໜ້າຕາມຖະໜົນເສັ້ນຕ່າງໆ.
