ແຕ່ລະປີທົ່ວໂລກມີແຮງງານ 2,34 ລ້ານຄົນເສຍຊີວິດຍ້ອນການປະກອບອາຊີບ
ຕາມການຄາດຄະເນຂອງອົງການແຮງງານສາກົນເຫັນວ່າ: ໃນແຕ່ລະປີມີແຮງງານທົ່ວໂລກຈໍານວນ 2,34 ລ້ານຄົນເສຍຊີວິດຍ້ອນການປະກອບອາຊີບ, ສະເລ່ຍ 5.500 ຄົນຕໍ່ມື້ຍ້ອນອຸປະຕິເຫດແຮງງານ ແລະ ພະຍາດອາຊີບ ແລະ ມີທ່າອຽງນັບມື້ເພີ່ມຂຶ້ນ. ບັນຫາດັ່ງກ່າວ, ນັກຄົ້ນຄ້ວາ ແລະ ຊ່ຽວຊານດ້ານຄວາມປອດໄພແຮງງານໄດ້ໃຫ້ທັດສະນະວ່າ 80% ຂອງຜູ້ອອກແຮງງານທີ່ໄດ້ຮັບເຄາະຮ້າຍນັ້ນແມ່ນສາມາດປ້ອງກັນໄດ້ຖ້າລັດຖະບານ, ອົງການຈັດຕັ້ງສັງຄົມ, ຫົວໜ່ວຍແຮງງານຫາກມີນະໂຍບາຍ, ມີແຜນການ, ມີລະບຽບ ແລະ ມີມາດຕະການທີ່ດີເພື່ອປ້ອງກັນ.
ທ່ານ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ໄດ້ໃຫ້ສຳພາດໃນວັນທີ 19 ມິຖຸນານີ້ວ່າ: ສຳລັບຢູ່ ສປປ ລາວ ໃນໄລຍະຜ່ານມາ, ກໍມີອຸປະຕິເຫດແຮງງານ ແລະ ພະຍາດອາຊີບເກີດຂຶ້ນປີ, ແຕ່ສ່ວນຫລາຍບໍ່ທັນໄດ້ຮັບການລາຍງານແບບເປັນລະບົບເທື່ອ, ຍ້ອນບໍ່ມີຖານຂໍ້ມູນຂ່າວສານ, ບໍ່ມີລະບົບການເກັບກໍາ ແລະ ການລາຍງານທີ່ມີປະສິດທິພາບເທື່ຶອ, ອີງຕາມການລາຍງານຂອງພະແນກແຮງງານ ແລະ ສະຫວັດດີການສັງຄົມຂັ້ນແຂວງໃນປີ 2017 ຜ່ານມານີ້ມີອຸປະຕິເຫດເກີດຂຶ້ນທັງໝົດ 20 ກໍລະນີ, ໃນນັ້ນເສຍຊີວິດ 8 ຄົນ (ສະເພາະຫົວໜ່ວຍແຮງງານທີ່ຜ່ານການກວດກາຈໍານວນ 1.168 ແຫ່ງເທົ່ານັ້ນ).
ທ່ານລັດຖະມົນຕີ ກ່າວຕື່ມວ່າ: ປັດຈຸບັນ, ສປປ ລາວ ຍັງບໍ່ທັນມີກົດໝາຍວ່າດ້ວຍຄວາມປອດໄພ ແລະ ສຸຂະພາບແຮງງານສະເພາະ, ມີແຕ່ກົດໝາຍວ່າດ້ວຍແຮງງານ, ໄດ້ກໍານົດເນື້ອໃນກ່ຽວກັບວຽກງານຄວາມປອດໄພ ແລະ ສຸຂະພາບແຮງງານໄວ້ໃນກົດໝາຍ, ໂດຍສະເພາະກົດໝາຍແຮງງານສະບັບປຸງປີ 2013 ໄດ້ລະບຸໄວ້ໃນມາດຕາ 117-129 ແຕ່ກໍຍັງກໍານົດແບບລວມໆ, ແຕ່ກໍໄດ້ມີຂໍ້ຕົກລົງວ່າດ້ວຍຄວາມປອດໄພ ແລະ ສຸຂະພາບແຮງງານໃນຂະແໜງກໍ່ສ້າງ, ຂໍ້ຕົກລົງວ່າດ້ວຍວຽກເບົາ ແລະ ວຽກອັນຕະລາຍສໍາລັບແຮງງານໄວໜຸ່ມ, ມີແຈ້ງການແນະນໍາວ່າດ້ວຍການແຕ່ງຕັ້ງພະນັກງານ ແລະ ໜ່ວຍງານຄວາມປອດໄພ ແລະ ສຸຂະພາບແຮງງານປະຈໍາຢູ່ສະຖານທີ່ເຮັດວຽກ. ປັດຈຸບັນ, ກະຊວງແຮງງານ ແລະ ສະຫວັດດີການສັງຄົມ ກໍາລັງຮ່າງດໍາລັດວ່າດ້ວຍຄວາມປອດໄພ ແລະ ສຸຂະພາບແຮງງານ ແລະ ຮ່າງຂໍ້ຕົກວ່າດ້ວຍການກໍານົດບັນຊີລາຍຊື່ພະຍາດອາຊີບທີ່ເກີດຂຶ້ນຍ້ອນການເຮັດວຽກ.
